Titus 2:10 - Taaz Weru Witu u Nunuwu'en Tombulu

¹⁰ tia' mahremu', taan tia' mazéi' mapailek in uli-ulit mahpaayang wo toro pa'émanen. Karia in téntu, ni séra im wana am péléng é mahsigi' wo mahlooz an tutuzu' ni Opo Empung, si Milot ni kita im witu un ukuman wana a singkéla'.

Titus 2:10 Iomraidhean Croise

Matius 24:45

Kuano kasii ni Yesus, “Sa téntu, séi si ata mahtali-talinga wo tulap si éndon ni tuangna i maéndo tonaas né ata walina wo mahwéhé ung kanen wia ni séra witu un oras tinotozo?

Matius 5:16

Téntumo kangkasii ni kamu, un ayah wia ni kamu é léwo'zéi' i mahsena'ma wia sé tou, wo u lé'os pahwangunen niou toro ka- ilekan néra wo séra mahsigi' wo mahlooz si Ama' niou si witi kasendukan.”

Lukas 1:47

un atéku kangkasii é mahpaa-paaz, pahpaan si Opo Empung si milot ni aku im witu un ukuman wana a singkéla'.

Lukas 1:80

Si Yohanes é makatarétumoumomé wo um pa'émanenna wia si Opo Empung éng kaenté'namo. Ni sia é mahento' witi kapelasan makaz witu un endo i ni sia mapailek un touna wia sé tou Israel i maayang am papaayangenna.

Lukas 16:10

Si tou toro pa'émanen i mahpaayang ang kori', ni sia kangkasii én toro pa'émanen i mahpaayang a selah. Taan séi si zéi'kan mata'u pa'émanen i mahpaayang ang kori', ni sia kangkasii én zéi'kan mata'u pa'émanen i mahpaayang a selah.

Yohanes 12:6

Niitu méikuanama zéi'kan pahpaan ni sia mahwéhé genang wia sé tou zéi'kan siapa apa, taan pahpaan ni sia é maremu'. Ni sia sekezé é mahéndo an zoit méilé'os wia ni sia.

1 Korintus 4:2

Niitumo, un totoz pahaléien wia sé mahpaa-paayang-Na én uli-ulit mahpaayang am paayangen néra.

Efesus 4:1

Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

Filipi 1:27

Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

Filipi 4:8

Ung kamurian katuari-katuari, péléng an ulit, péléng am wangun im pahloozen, péléng an zéi'kan mahsanaweka, péléng am weresi, péléng an tombal, péléng an tariis im pahtalingan, péléng am wéwéhan torona wo an toro pahloozen, niana péléng é léwo'zéi' ing genangen nioula.

1 Timutius 1:1

Um pinantik kenu ém wia ni aku Paulus a mangé, si aatu ni Kristus Yesus mengiit u méiperénta ni Opo Empung, si nimilot ni kita im witu un ukuman wana a singkéla', wo si Kristus Yesus si nimaéndo pahéré'anta.

1 Timutius 5:17

Sé penatua sé uli-ulit mahpaayang am papaayangen néra é léwo'zéi' makailek u sisigi'an u makazuamé, lumouspé' kasiimé é sé siga' i mahwoka' u Nuwu' ni Opo Empung wo i mahtuzu' sé jamaat.

1 Timutius 6:1

Péléng sé ata ma'éman si Kristus é léwo'zéi' i mahgenangla sa si tuangna ém wangun im pahsigi-sigi'en. Karia in téntu u ngaran ni Opo Empung wo an tutuzu' ulit am pahkiitenta én zéi'kan séro'an né tou zéi'kan ma'éman.

1 Timutius 6:3

Séi si mahtuzu' an tutuzu' an zéi'kan masuat wo soo kumiit an tutuzu' ni Yesus Kristus Mahpiarata wo kasii nimawalinaan karia an tutuzu' kaulitan tanu am pahkiitenta i mahragés wia si Opo Empung,

Titus 1:3

Im witu un oras tinotoz-Na, ni Sia nimapaileko u Nuwu'-Na mengiité u Nuwu' Lé'os tumoro si Yesus u méitarawésa in iwoka'ku mengiit um perénta ni Opo Empung, si nimilot ni kita im witu un ukuman wana a singkéla'.

Titus 3:4

Taan i mémoikatuzu'mé u lé'os ni Opo Empung, si Milot ni kita im witu un ukuman wana a singkéla', wo u raraatéan-Na wia sé tou,

1 Petrus 2:12

Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

1 Petrus 3:16

wo karia ung genang lé'os. Sa um pakahwingkot niou én téntu, niitu é mangun sé tou menuwu-nuwu' a léwo'an tumoro ni kamu sé mahwangun a lé'os pahpaan i mahkiit si Kristus é maizang, pahpaan a léwo'an penuwu-nuwu'en néra itii.

2 Yohanes 1:9

Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.