Titus 1:8 - Taaz Weru Witu u Nunuwu'en Tombulu

⁸ taan paaz sumungkul sé tou i mento' witi waléna, paaz péléng am wangun wo lé'os, tulap, zéi'kan mahsanaweka, mahkiit um paaz ni Opo Empung, makaezen wana a lelo,

Titus 1:8 Iomraidhean Croise

Lukas 2:25

In toro niitu im witi Yerusalem ém wéwéhan si tou makangaran Simeon. Ni sia én tou ulit wo mahkiit uman am paaz ni Opo Empung wo mengento-ngento' un oras ni Opo Empung i milot sé tou Israel. Si Roh Lenas én totoz memali-mali kariana.

Kisah Rasul-rasul 24:25

Taan i si Paulus mahkua tumoro kura i menou-nou ulit witu u sinaru ni Opo Empung, kura i mahimek un tou im wana a léwo'an, wo kasii tumoro un endo in tumondong i si Opo Empung métumotoz ulit kaapa zéi'kan am pahwangunen né tou, si Feliks éng kinaindé'an ang kumua, “Téntupé', wo in tarékan é mangémo. Sa wéwéhano endo lé'os, ni ko én tawahengkumokané sumaup.”

1 Tesalonika 2:10

Ni kamu, téntu kangkasii si Opo Empung é mata'u i ni kai é menou-nou karia un até weresi, zéi'kan mahsanaweka wo zéi'kan penuwu-nuwu'en né tou i menou-nou mahwali-wali karia niou, sé ma'émano.

1 Timutius 3:2

Niitumo, si tonaas né jamaat é léwo'zéi' in téntii: zéi'kan penuwu-nuwu'en né tou, makamahayo uman si esa, mata'u mahime-imek un touna, tulap, mahsigi' sé tou, paaz mahsungkul sé tou méyéma witi waléna, tulap i mahtuzu' sé tou,

1 Timutius 4:12

Tia' wo wéwéhan sé tou mahgenangla i ni ko én tou roros pahpaan ni ko ém weru tou. Mahtututu'la i maéndo kékéréan wangun né tou ma'éman wia si Opo Empung, wana an ipahkuamu, wana am pemangu-mangunennu, wana a raraatéannu, witu um pa'émanennu wo witu ung katou-touannu un zéi'kan penéro-néro'an né tou.

1 Timutius 6:11

Taan ni ko in tou ni Opo Empung, zumou-zou' im wana péléng niitu, mahtututu'la in zéi'kan mahsanaweka, mahragésla wia si Opo Empung, tia' mazéi' ma'éman wia ni Sia, rumaraaté sé kasuat tou, ezen wana an zézéha wo eluz uman wia si kasuat tou.

2 Timutius 2:22

Pahpaano niitu, ma'katla im wana a lelo léwo' un awak né weru tou. Mahtututu'la i mahkiit um paaz ni Opo Empung, ma'éman an tutuzu'-Na, rumaraaté si kasuat tou wo mahlé'o-lé'osan karia néra sé mengaléi wia si Opo Empung i mekitulung karia un até weresi.

2 Timutius 3:3

zéi'mo rumaraaté si kasuat tou, soo u mahlé'o-lé'osan, mahtawuruk si kasuat tou, zéi'mo makaezen un upi', totoz léwo' wo kasii mazi'zis am wangun.

Titus 2:7

wo wangunela ung katou-touannu i maéndo kékéréan wangun wia ni séra. I mahtuzu' wia sé tou, ni ko é léwo'zéi' in uli-ulit mahtuzu' wo tia' mahtowo,

1 Yohanes 3:14

Kata'uanta, i ni kita é niméramomé im witu um patéan a mangé witu ung katou-touan, pahpaan ni kita é rumaraaté sé katuarita esa pa'émanen. Séi si zéi'kan rumaraaté, ni sia éng kinawasapé' um patéan.

1 Yohanes 5:1

Si tou ma'éman i si Yesus éng Kristus, si tou itii én oki' ni Opo Empung. Si tou rumaraaté si ama', ni sia kangkasii é rumaraaté si oki' ni ama'.