Titus 1:10 - Taaz Weru Witu u Nunuwu'en Tombulu

¹⁰ Pahpaan in tarékan im wia sé jamaat é lakezo sé mahsasarumokan, kataré-taré é sé im wia sé tou Yahudi sé ma'émano taan mahkiitpé' an tinotoz im pahsunaten. Ni séra menuwu-nuwu' an towo i mahlululu sé tou.

Titus 1:10 Iomraidhean Croise

Matius 23:14

Ikaléwo'la kamu sé tou tulap un Torat wo kamu sé sana réwok tou Farisi, é kamu sé tou mahgau-gau lé'os. Pahpaan sé wéwéné mahesa-esamokan ém pahtowoan niou ing kumahat am walé néra. Am pakahpengaléi niou é lambo' i mahwuwuni a léwo'an niou. Pahpaano niitu, ni kamu én ukumen totoz wutez.]

Kisah Rasul-rasul 11:2

Niitumo, i si Petrus nimawurimomé sumaup witi Yerusalem, sé sana réwok tou Yahudi sé ma'émano si Yesus é mahzéi-zéi'an kariana.

Kisah Rasul-rasul 15:1

Wéwéhan sé woopira tou sé witi Yudea niméyé witi Antiokhia a mahtuzu' wia sé katuari esa pa'émanen witu, in téntii, “Sa kamu zéi'kan sinunat mengiit ung kinanaram méituzu'ma ni Musa, ni kamu én zéi'kan ipilot im witu un ukuman wana a singkéla' niou.”

Kisah Rasul-rasul 15:24

Ni kai én timalingamola im wéwéhan sé woopira tou im wia ni kai, sé zéi'kan méiatu naima é nimangémo wia ni kamu. Ni séra é nimangunola ni kamu mahzua-zua genang wo nimalinganga karia an tutuzu' néra.

Kisah Rasul-rasul 20:29

Totoz ing kata'uangku sa kamu itula'ukumoma, sé tou léwo' sé tanumokan sé serigala totoz léwo' é méyé witu un unez niou. Wo ni séra é mahtututu' i mékumayo' sé jamaat sé pahtéizan niou itii.

Galatia 2:4

Un tumoro si Titus zéi'kan sinunat é méikakuamé pahpaan im witu ém wéwéhan sé mahkua-kua ma'éman wia si Yesus, taan un ulitna ni séra én towo, ni séra mahtututu' wo si Titus é sunaten. Ni séra é mahwuni-wuni i nimuntepé kimariala ni kai sé uli-ulit ma'émano si Kristus. Ni séra nimangunla an téntu wo séra toro mahilek apa um pahwangunenta i ni kita zéi'mo mahkiit un ukum Torat pahpaan nimaesa karia ni Kristus Yesus. Ni séra é mahtututu' wo kita ikakiit sumaup i mahwangun un ukum Torat. Sa kita ikakiitla, ni kita én tanu pahata-atan un ukum Torat itii.

Galatia 3:1

É kamu tou ma'éman witi Galatia sé lemou! Séi si rimiarala ni kamu taka-takazan ni kamu én timamburimola wia si Yesus Kristus? Zéi'kankuaa méipapata'ukumola lumé'o-lé'os wia ni kamu tumoro si Yesus Kristus si nimaté witu u salip itii?

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

1 Timutius 1:4

Ikua kasiila wia ni séra in tia'mo mahsirita a sirita zéi'kan ulit wo a sirita tumoro sé nimaopo an zéi'kan siapa akazna. A sirita itii é mahwangun uman am pahéndo-éndoan wo mahsaru uman ung ginenang ni Opo Empung i milot sé tou im witu un ukuman wana a singkéla', ung kinata'uanta mengiité um pa'émanenta wia si Kristus.

1 Timutius 1:6

Taan wéwéhan sé tou sé zéi'mo mahwangun niana péléng wo méilulu um pahéndo-éndoan un zéi'kan siapa torona.

1 Timutius 1:9

Pahpaan kata'uanta un ukum Torat itii én zéi'kan méiwéhé wia sé tou mahwangun an ulit, taan iwéhé wia sé tou mahsaru si Opo Empung wo sé soo mahtali-talinga ni Sia, sé soo mahkiit um paaz-Na wo sé mahsingkéla', sé zéi'kan siapa pa'émanen wo sé megena-genang uman am wia ung kaayahan, mahwunu' si ama' wo si ina' wo sé mahwunu' sé kasuat tou,

2 Timutius 3:13

taan sé tou léwo' wo tantowo kahuman éng kalousna i mahwangun a léwo'an, ni séra mahlulu sé tou wo ilulu né tou walina.

2 Timutius 4:4

Ni séra é soomo tumalinga an tutuzu' ulit, taan paaz uman tumalinga a sirita zéi'kan ulit.

Titus 1:6

Si tou maéndo penatua é léwo'zéi' in zéi'kan siapa pahséro'an, si mahayona én esa uman, sé oki'na é ma'éman wia si Yesus wo zéi'kan pahtawuruken né tou pahpaan zéi'kan ipahkua-kua i sangaya kaapa menou-nou zéi'kan kaimekan.

Yakobus 1:26

Sa si tou mahgenangla i ni sia é mahragés wia si Opo Empung, taan zéi'kan makaimek u lila'na, ni sia é mahtowomo witu un touna in esa. U raragésna wia si Opo Empung én zéi'kan siapa torona.

1 Yohanes 2:18

É kamu in oki'ku, in tarékan é merétémoma ung kaakazan ung kaayahan, wo tanu an tinalinga niouo i si kakoro' ni Kristus é méyé, wo in tarékan lakez sé kakoro' ni Kristus ém wiamo. Nianamo an tumuzu'mé wia ni kita sa un oras kenu én uli-ulit merétémoma ung kaakazan ung kaayahan.

1 Yohanes 2:4

Séi si mahkua, “Ni aku é mata'u ni Sia”, taan zéi'kan mahkiit am perénta-Na, ni sia én tantowo wo im wia ni sia én zéi'kan siapa ang kaulitan.

1 Yohanes 4:1

Katuari-katuari ikararaatéku, péléng sé roh én tia' pa'émanen niou, taan pahtata'ula lumé'o-lé'os sé roh itii, sa sé roh itii ém wia si Opo Empung a méyé kaapa zéi'kan. Pahpaan lakez sé nabi towo sé nimapaileko un tou néra wo mahliklik ung kaayahan.

Wahyu 2:14

Taan wéwéhan ang kasoo-Ku wia ni kamu: Sé woopira im wia ni kamu é mahkiit an tutuzu' ni Bileam, si mahtuzu' si Balak i mahlululu sé tou Israel ing kuman ang kakanen a mémoiragés wia sé opo-opo wo mahsamek.

Wahyu 2:6

Taan wéwéhan am wangun am wia ni kamu. Ikazi'zis niou am pahmualin né tou ni Nikolaus, ni Aku kangkasii é mazi'zis am pahmualin néra itii.