Roma 8:13 - Taaz Weru Witu u Nunuwu'en Tombulu

¹³ Pahpaan, sa ung katou-touan niou é mahkiit ung kapaaz un awak in esa, ni kamu é makailek um patéan. Taan sa ung katou-touan niou é mahkiit ung kapaaz ni Roh Lenas, ni kamu é mahpapaté um pahwangunen un awak niou u mahsingkéla', wo ni kamu é mamenou-nou.

Roma 8:13 Iomraidhean Croise

Roma 6:21

In toro niitu, apa u méikaawesé wia ni kamu? Um pahwangunen niou itii é nimangun uman taréma ni kamu i maizang, péléng niitu é mahwali ni kamu witu um patéan makaz ing kauré-uré.

Roma 6:23

Pahpaan um wawaér i mahsingkéla' ém patéan, taan un tatambér ni Opo Empung éng katou-touan makaz ing kauré-uré pahpaan nimaesa karia ni Kristus Yesus, si Mahpiarata.

Roma 7:5

Pahpaan im puuna ni kita i menou-nou é mahkiitpé' um paaz in tou uman, u lelo i mahwangun a léwo'an ung kimawasa witu un awakta. Kata'uanta niitu é singkéla' pahpaan sinéro' un ukum Torat. Pahpaan i mahwangun niitu ni kita makailek um patéan.

Roma 8:12

Niitumo katuari-katuari, ni kita ém wéwéhan u léwo'zéi' im wangunen, taan zéi'kan mengiit ung kapaaz un awak in esa. Ni kita én tia' menou-nou mahkiit ung kapaaz un awak in esa.

1 Korintus 9:27

Taan ni aku mahtututu' i mahnanaram un touku wo toro kumiit ang ginenangku, wo sa aku nimakawoka'mola u Nuwu' Lé'os tumoro si Kristus wia sé tou, tia' wo ni aku si zéi'kan wangun i makailek ung kukulu.

Galatia 5:24

Séi uman sé toumo ni Kristus Yesus, ni sia én zéi'mo mahkiit u lelo un awak i mahwangun a léwo' wo ung genang i mangun a léwo'an. Ni sia é simalipo péléng a lelo un awak i mahwangun a léwo' wo um paaz i mangun a léwo'an.

Galatia 6:8

Pahpaan séi si mahkiit uman u lelo un awakna i mahwangun a léwo', ni sia é makailek um patéan pahpaan u lelo un awakna i mahwangun a léwo', taan sé mahkiit um paaz ni Roh Lenas, ni sia é makailek ung katou-touan makaz ing kauré-uré un ipahwéhémé ni Roh Lenas itii.

Efesus 4:22

Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

Efesus 4:30

Tia'mo mahwangun un até ni Roh ni Opo Empung i rumara pahpaan si Roh ni Opo Empung si tumuzu'mé i ni kamu én anu ni Opo Empung makaz witu un endo kaakazan ung kaayahan i si Opo Empung méhé ung katou-touan makaz ing kauré-uré.

Efesus 5:18

Tia'mo kamu matewelen pahpaan un anggor, pahpaan niitu é luméwo' uman ung katou-touan niou. Taan, tawimo ni kamu kinawasa ni Roh ni Opo Empung.

Titus 2:12

Ni Sia é mahtuzu' ni kita wo kita zéi'mo menou-nou i mahsaru ni Sia wo zéi'mo mahkiit a lelo léwo' né tou wia ung kaayahan wo menou-nou karia in tulap, zéi'kan mahsanaweka wo mahkiit uman um paaz-Na im wia ung kaayahan in tarékan.

1 Petrus 1:22

Pahpaan ung katou-touan niou é linenas nioula wia si Opo Empung karia i mahtali-talinga an tutuzu' ulit, taka-takazan ni kamu én uli-ulit rimaraatémola sé katuari niou. Niitumo pahaléiengku wia ni kamu in totoz uli-ulit i mahraa-raatéan.

1 Petrus 2:11

Katuari-katuari ikararaatéku, ni kamu én tou sé siméngkot wana am wanua né tou walina wo sé limepuh umané wia ung kaayahan. Niitumo, isésakuma wia ni kamu i zumou'la im wana a lelo léwo' un awak, u makahkoro' wo a lelo un até niou wana am wangun.