Roma 7:5 - Taaz Weru Witu u Nunuwu'en Tombulu

⁵ Pahpaan im puuna ni kita i menou-nou é mahkiitpé' um paaz in tou uman, u lelo i mahwangun a léwo'an ung kimawasa witu un awakta. Kata'uanta niitu é singkéla' pahpaan sinéro' un ukum Torat. Pahpaan i mahwangun niitu ni kita makailek um patéan.

Roma 7:5 Iomraidhean Croise

Matius 15:19

Pahpaan witu un até mahondolé péléng ang genang léwo', u mahwunu' tou, u mahmuali a sinéro' im pahmualin né zéi'kampé' kimawéng, u mahsamek, u mahremu', u mahkua an zéi'kan ulit tumoro a niilek wo an tinalingana, wo kasii u mahtawuruk.

Yohanes 3:6

Si tou matoumé im wia si tou é mahkiit uman um paazna in tou uman, taan si tou si matoumé im wia si Roh ni Opo Empung, menou-nou mahkiit um paaz ni Roh ni Opo Empung.

Roma 1:26

Niitumo ni séra é méiwaya ni Opo Empung ing kinawasa a lelo léwo' un awak néra wana ang kaizangnokané. Taka-takazan sé wéwéné zéi'mo mahwangun an toro uman wangunen né wéwéné wo né tuama, sinawelan néra uman taréla im pahwangunen karia né kawéwéné néra.

Roma 3:20

Zéi'kan siapa zozo' in esa si tou niéndo ulit im witu u sinaru ni Opo Empung pahpaan mahwangun un ukum Torat. Taan, pahpaan wéwéhan un ukum Torat, a sé tou mata'ula im wéwéhan a singkéla'.

Roma 4:15

Pahpaan ang kasumalaan wana an ukum Torat é mahalimé un upi' ni Opo Empung, taan sa zéi'kan siapa an ukum Torat, tantumo én zéi'kan siapa sé sumala'.

Roma 5:20

Si Opo Empung niméhémé un ukum Torat wo kata'uala né tou ing kalakeznamo a singkéla' né tou. Taan zozo' ing kalakezna a singkéla', ung kamang méitambér-Na kangkasii éng kalakezna.

Roma 6:13

Tia' un awak niou iwéhé ing kawasaan a singkéla' i mangun a léwo'an. Taan iwéhéla un tou niou wia si Opo Empung, tanu si tou im puuna nimatémo wo in tarékan é nimakaileko ung katou-touan weru, wo iwéhémola un awak niou i mahwangun um paaz ni Opo Empung.

Roma 6:19

Ni aku i mahkuama éng karia u nunuwu'en toro katulapan ung kinanaram im pengungua né tou sekez in endo. Pahpaan ni kamu in tou én zéi'kan enté', niitumo ni kamu ngerez i mahtutulap niitu. Im puuna ni kamu é niméhé péléng un tou niou i maéndo ata im wana ang kasamekan wo a mahsaru si Opo Empung a nimangun ni kamu kalousna i mahsaru ni Sia. In tarékan, ni kamu é léwo'zéi' méhéla péléng un tou niou i maéndo ata im wana ang kaulitan a mangun ni kamu lenasen ni Opo Empung.

Roma 6:21

In toro niitu, apa u méikaawesé wia ni kamu? Um pahwangunen niou itii é nimangun uman taréma ni kamu i maizang, péléng niitu é mahwali ni kamu witu um patéan makaz ing kauré-uré.

Roma 6:23

Pahpaan um wawaér i mahsingkéla' ém patéan, taan un tatambér ni Opo Empung éng katou-touan makaz ing kauré-uré pahpaan nimaesa karia ni Kristus Yesus, si Mahpiarata.

Roma 7:23

Taan am witu un touku ém wéwéhan an tinotoz walina u makahkoro' wo an tinotoz ni Opo Empung ung kapaazku witu ung genangku. Niitu u nimangun ni aku im pahata-atan an tinotoz a singkéla' ang kimawasa un awakku.

1 Korintus 15:56

U séséhéz um patéan é singkéla' ni tou, wo ung kawasa a singkéla' ni tou é un ukum Torat. Ung kalakoan niitu é si tou memua-muali a singkéla' é léwo'zéi' in ukumen pahpaan simingkéla' witu un ukum itii.

2 Korintus 10:3

Zozo' ni kai é menou-noupé' wia ung kaayahan, taan um pakahsaru nai sé tou mahtuzu' an zéi'kan ulit én zéi'kan tanu um pakahsaru né tou wia ung kaayahan.

Galatia 3:10

Pahpaan péléng sé tou sé mahtututu' in éndon ulit witu u sinaru ni Opo Empung karia i mahkiit un ukum Torat, ni séra é makailek un epa' ni Opo Empung. Pahpaan witu um Pinantik Lenas é méipantik téntii, “Péléng sé tou zéi'kan uli-ulit mahwangun péléng un ukum Torat, ni séra é makailek un epa' ni Opo Empung.”

Galatia 5:24

Séi uman sé toumo ni Kristus Yesus, ni sia én zéi'mo mahkiit u lelo un awak i mahwangun a léwo' wo ung genang i mangun a léwo'an. Ni sia é simalipo péléng a lelo un awak i mahwangun a léwo' wo um paaz i mangun a léwo'an.

Efesus 2:11

Niitumo gena-genangen, rengan ni kamu nimatoumé ni kamu én zéi'kan tou Yahudi. Ni kamu ém pahkuan in tou zéi'kan sinunat né tou Yahudi, sé tou sinunat itii u makaizangen néra ém wéwéhan um walulangna i sinunat um winangun né kasuat tou.

Efesus 2:3

Im puuna ni kita péléng é masuat karia néra, ni kita menou-nou mahkiit u lelo léwo' un awakta, mahwangun um paaz un awakta wo ang genang léwo'ta. In toro niitu, ni kita kangkasii én tou sé léwo'zéi' i makailek un upi' makaindé'en ni Opo Empung tanu sé tou walina.

Kolose 3:5

Niitumo, zéi'ela im wia ni kamu péléng am paaz i memangu-mangun an ipahkiit uman um paaz ung kaayahan, tanu a mahsamek, a makati'tiren, a lelo léwo' un awak, am paaz i memangu-mangun a léwo'an wo kasii an angkum an tanumokan i mahongkot wo mahsigi' sé opo-opo.

Titus 3:3

Pahpaan im puuna ni kita kangkasii é menou-nou witu ung kalemouan: zéi'kan mahtali-talinga, méikalulu, nimaéndo ata wana a lelo léwo' un awak wo a makapaazen meléwo' un tou, menou-nou mahwangun a léwo'an wo téutéu, ikazi'zis né tou wo mahzizi'zisan.

Yakobus 1:15

Sa u lelo léwo'na itii éng kiniitannala, niitu é mua'mé u singkéla'. Sa u singkéla' itii lekepo, niitu é mua'mé um patéan.

Yakobus 4:1

Wisa a méyé am pahéndo-éndoan wo am pahkoro'an niou? Zéi'kankuaa wana a lelo léwo' un awak niou a mahkoro' i mahkakawasa un tou niou?

1 Yohanes 3:4

Si tou mahwangun a singkéla', ni sia kangkasii é mahsaru an tinotoz ni Opo Empung, pahpaan u singkéla' é mahsaru an tinotoz ni Opo Empung.