Roma 6:16 - Taaz Weru Witu u Nunuwu'en Tombulu

¹⁶ Zéi'kan kata'uan niou wé, sa kamu méhéla un tou niou wia si tou i mahtali-talinga ni sia, ni kamu é nimaéndomola ata ni tou itii? Téntu kangkasii, zéi'kan kata'uan niou wé, sa kamu simingkéla', ni kamu é nimaéndo ata a singkéla' itii? Niitu u mangun ni kamu makailek um patéan. Sa kamu méhé un tou niou i mahtali-talinga si Opo Empung, ni kamu é niéndo-Na ulit.

Roma 6:16 Iomraidhean Croise

Matius 20:4

Kuana wia ni séra, ‘Mamomendula kamu witi umaku un tinaneman an anggor, wo ni kamu ém waérangkumokan um wangun ing kailekan niou.’ Kaitalingamé niitu, a séra mangé i mamendu witi uma itii.

Matius 6:24

Zéi'kan siapa si tou toro maayang wia sé zua tuang. Pahpaan sa téntu si esa é maikazi'zisna wo si walina én iraraaténa. Kaapa ni sia é mahtali-talinga wia si esa wo zéi'kan mahtali-talinga si walina. Ni kamu én zéi'kan mamuali i mahpaayang wia si Opo Empung wo karegas niitu mahpaayang wia si Mamon.”

Yohanes 8:34

Kuan ni Yesus wia ni séra, “Uli-ulit ikua-Kuma wia ni kamu, péléng sé tou mahwangun a singkéla' én ata a singkéla'.

Roma 11:2

Si Opo Empung én zéi'kan timia' sé tou Israel sé pinéléng-Namo rengané im puuna. Kata'uan niouo u méipantik witu um Pinantik Lenas tumoro si nabi Elia in ipahpa'osna sé tou Israel wia si Opo Empung karia mahkua in téntii,

Roma 12:1

Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

Roma 6:17

Ni aku é mapaayo u makasé wia si Opo Empung! Pahpaan im puuna ni kamu én ata a singkéla', taan in tarékan ni kamu én uli-ulit mahkiit an tutuzu' méiwéhémo wia ni kamu.

1 Korintus 3:16

Zéi'kan kata'uan niou wé i ni kamu ém Walé ni Opo Empung wo si Roh ni Opo Empung é mahento' wia ni kamu.

1 Korintus 5:6

Ni kamu én zéi'kan wangun im wera'. Kata'uan niouo ung kukuan kenu, “U ragi toyo' é mangun um wangunen roti i sumegahmé.”

1 Korintus 6:2

Kaapa zéi'kan kata'uan niou wé, i ni kamu in tou ni Opo Empung én tumotoz in ulit kaapa zéi'kan am pahwangunen né tou wia ung kaayahan? Niitumo, sa kamu tumotoz am pahwangunen né wia ung kaayahan, kaa kamu zéi'kan makawawa in tumotoz am pahéndo-éndoan za'i-za'i uman?

1 Korintus 6:3

Zéi'kan kata'uan niou wé, i ni kita én tumotoz am pahwangunen né malaekat? Sa kita toro tumotoz am pahwangunen né malaekat, kaa kita zéi'kan toro in tumotoz a mahmuali i mendo-endo?

1 Korintus 6:9

Kaapa zéi'kan kata'uan niou wé, i sé tou zéi'kan ulit én zéi'kan iwéhé ni Opo Empung i maéndo tou witi Kakolanoan-Na? Tia' kamu ikalulu! Sé tou: memua-muali a sinéro' im pahmualin né zéi'kampé' kimawéng, mahsigi' sé opo-opo, samek, sé tuama mahsamek karia né katuama néra, sé mahwangun a makaizangen wia sé kasuat néra,

1 Korintus 9:13

Kata'uan niou sé tou mahpaayang witi Walé ni Opo Empung, am pemandungen néra ém pahkailekan néramé witi Walé ni Opo Empung. Wo sé tou mahpaayang witi peraragésan, ni séra kangkasii é mahkaileké um wéténg néra im wana a lé'ona méiragés witu.

1 Korintus 9:24

Kata'uan niouo sa sé tou witu um pahlolowaan ing kumara', esa uman si makailek ung kukulu, zozo' im péléng kimiit i mahlolowaan. Niitumo, mahtututu'la i mahlolowaan wo mamakailek ung kukulu.

2 Petrus 2:19

Sé méster towo itii é méhé un taaz wia sé tou i lamaéndo tou zéi'mo ata, taan ndéén sé méster towo itii ém pahata-atan ang kinanaram néra wana a léwo'an a mahléwo' sé tou. Pahpaan si kinalamo é nimaéndomola ata ni kimala ni sia.