Roma 5:21 - Taaz Weru Witu u Nunuwu'en Tombulu

²¹ Niitumo, im puuna sé tou menou-nou kinawasa u singkéla', niitu kangkasii u nimahwali ni kita witu um patéan. Téntu kangkasii, pahpaan ung kamang méitambér ni Opo Empung éng kimawasa wia ni kita, ni kita é niéndo ulit i makailek ung katou-touan makaz ing kauré-uré, pahpaan si Yesus Kristus Mahpiarata.

Roma 5:21 Iomraidhean Croise

Matius 25:46

Sé tou kenu én iuntep witi tampa pahukuman makaz ing kauré-uré, taan sé tou ulit én iuntep witu ung katou-touan makaz ing kauré-uré.”

Yohanes 1:14

U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

Yohanes 10:28

Ni Aku é mahwéhé ung katou-touan makaz ing kauré-uré wia ni séra wo ni séra uli-ulit zéi'kan maléwo' makaz ing kauré-uré wo zéi'kan siapa zozo' in esa si kumahat ni séra im witu u lengen-Ku.

Roma 4:13

Si Opo Empung é niméhé un taaz wia si Abraham karia né suzuna i ni séra é makailek ung kaayahan. Ni Sia én timaaza un téntu, zéi'kan pahpaan si Abraham mahkiit un ukum Torat, taan niéndo ulit pahpaan um pa'émanenna wia si Opo Empung.

Roma 5:12

U singkéla' é nimuntepé wia ung kaayahan pahpaan si tou esa, ni siamo si Adam. Pahpaan u singkéla' a méyé um patéan. Niitumo um patéan é nimelapu-laputola wia péléng sé tou, pahpaan péléng sé tou nimangunola a singkéla'.

Roma 5:14

Zozo' in téntu, um patéan éng kimawasa rengané witu un oras ni Adam makaz witu un oras ni Musa, téntu kangkasii um patéan éng kimawasa wia sé tou simingkéla' zéi'kan tanu a singkéla' pinahwanguné ni Adam. Si Adam én tumuzu'mé si Kristus si méitaaz ni Opo Empung i méyé in tumondong.

Roma 5:17

Pahpaan si tou esa simingkéla'mo, um patéan éng kimawasamo wia péléng sé tou pahpaan si tou itii. U lumousé um winangun ni tou esa walina, si Yesus Kristus, ni Sia nimangun sé tou nimakailek u raraatéan ni Opo Empung u malake-lakez wo un tatambér-Na makaz ni séra niéndo-Na ulit. Ni séra é mamenou-nou wo mahkawasa makaz ing kauré-uré pahpaan si Yesus Kristus.

Roma 6:12

Niitumo, tia' a singkéla' éng kimawasa witu un awak niou u maté, wo ni kamu én tia'mo mahtali-talinga u lelo léwo' un awak.

Roma 6:14

A singkéla' én zéi'mo kumawasa ni kamu, pahpaan ung katou-touan niou én zéi'mo pahata-atan un ukum Torat, taan méipilotomé pahpaan ung kamang tatambér ni Opo Empung.

Roma 6:16

Zéi'kan kata'uan niou wé, sa kamu méhéla un tou niou wia si tou i mahtali-talinga ni sia, ni kamu é nimaéndomola ata ni tou itii? Téntu kangkasii, zéi'kan kata'uan niou wé, sa kamu simingkéla', ni kamu é nimaéndo ata a singkéla' itii? Niitu u mangun ni kamu makailek um patéan. Sa kamu méhé un tou niou i mahtali-talinga si Opo Empung, ni kamu é niéndo-Na ulit.

Roma 6:23

Pahpaan um wawaér i mahsingkéla' ém patéan, taan un tatambér ni Opo Empung éng katou-touan makaz ing kauré-uré pahpaan nimaesa karia ni Kristus Yesus, si Mahpiarata.

Roma 8:10

Taan sa si Kristus é nimaesamo karia niou, zozo' un tou niou é maté pahpaan a singkéla', taan si Roh ni Opo Empung é méhé ung katou-touan wia ni kamu pahpaan ni kamu é niéndo-Na ulit.

Titus 2:11

Pahpaan si Opo Empung é nimapailekoma ung kamang méitambér-Na i nimilot péléng sé tou im witu un ukuman wana a singkéla'.

Ibrani 4:16

Niitumo, tia'mo kita maindé' i rumété wia si Opo Empung si rimumez witu u rurumezan-Na ing Kolano. Pahpaan i ni kita mangé witu u sinaru-Na, si Opo Empung é rumaraaté ni kita, zéi'kan mengiit un zéi'kan enté' wia ni kita, taan mengiit ung kalé'osan-Na. Si Opo Empung én tumambéré ang kamang wo menté' ni kita, wo kita tulungen-Na witu un oras ni kita i mekitulung.

1 Petrus 5:10

Si Opo Empung si mahtambéré ung kamang, si timawahmo ni kamu sé ma'éman si Kristus witu ung kawangko'an-Na makaz ing kauré-uré é mangun ung katou-touan niou ing kawangunna, menté' am pa'émanen niou, menté' an até niou, wo mangun um pa'émanen niou wia si Kristus zéi'kan mawalina, kumawusla kamu i mendana an zézéha zéi'kan mauréma.

2 Petrus 1:1

Um pinantik kenu ém pinantikku, Simon Petrus, ata wo aatu ni Yesus Kristus, iwéhé wia sé mahwali-wali karia nai sé ma'émano. Ni kita nima'éman wia si Yesus Kristus pahpaan ni Sia é si Opo Empung wo si nimilot ni kita im witu un ukuman wana a singkéla' wo si zéi'kan mahsanaweka.

1 Yohanes 2:25

Ang kenumo a mémoitaaz-Na in esa wia ni kita, niitu éng katou-touan makaz ing kauré-uré.