Roma 16:2 - Taaz Weru Witu u Nunuwu'en Tombulu

² Sungkulen nioula sia pahpaan i nimaesa karia ni Mahpiara, tanu um pahwangunen né tou ni Opo Empung. Wo sawangala sia sa wéwéhan am pemandungenna, pahpaan lakezo sé sinawanganna, kariamo ni aku.

Roma 16:2 Iomraidhean Croise

Matius 25:40

Si Kolano itii é mingkot wia ni séra in téntii, ‘Uli-ulit ikua-Kuma wia ni kamu, péléng am winangun niouola wia si esaané im wia sé katuari-Ku sé totoz roros kenu, niitu ém winangun niouola wia ni Aku.’

Kisah Rasul-rasul 9:13

A mingkotla si Ananias, “Azo Mahpiara. Tinalingakumola wia sé tou lakez an tumoro si tou itii. Totozo lakez sé tou-Mu witi Yerusalem sé zinézéhana.

Kisah Rasul-rasul 9:15

Taan si Mahpiara nimuwu'ma wia ni sia, “Mangémo! Pahpaan si tou itii ém pinéléng-Kumo i maéndo tou mahpaayang wia ni Aku i mahwoka' u ngaran-Ku wia sé tahsasana wanua walina wo wia sé kolano wo kasii wia sé tou Israel.

Kisah Rasul-rasul 9:36

Im witi Yope, wéwéhan si wéwéné ma'éman si Yesus makangaran Tabita. (Im witu u nunuwu'en Yunani u ngaranna én Dorkas). Ni sia é makalakez mahwangun a lé'os wo meméméhé a sasawang.

Kisah Rasul-rasul 9:39

Timalingala niitu, a si Petrus rengan nimimekla a mangé karia néra witi Yope. I méikaayomoma wana, a sia ipahwali nérama witi welah atas. Péléng sé wéwéné mahesa-esamokan é marimété si Petrus. Karia i mahamé' ipapailek nérala wia ni sia péléng ang karai wo ang karai tonton am winilit ni Dorkas i ni sia memali-malipé' karia néra.

Kisah Rasul-rasul 9:41

Tionala ni Petrus u lengen ni Tabita a sawangannala sia i rimendaié. An tawahené ni Petrus sé tou ni Mahpiara wo sé wéwéné mahesa-esamokan, an ipapaileknala wia ni séra i si Tabita é nimatoumomé sumaup.

Roma 15:7

Niitumo, sungkulela si esa wo sé walina, tanu si Kristus simungkulo ni kamu, i lumooz wo sumigi' si Opo Empung.

Roma 16:15

U sigi'ku wia si Filologus, si Yulia, si Nereus wo si wéwéné katuarina, wo si Olimpas, wo wia sé tou ma'éman sé mahwali-wali karia néra.

Roma 16:23

Si Gayus, si niméhé um waléna in ento'angku wo pahréwo-réwokan péléng né jamaat é mapaayoma u sigi' wia ni kamu. Téntu kangkasii si Erastus, si melélé'os an zoit pajak wia um wanua tua'na kenu wo si Kwartus, si katuari esa pa'émanen é mapaayoma u sigi'na wia ni kamu. [

Roma 16:6

U sigi'ku wia si Maria si totozo nima'ulitla i mahpaayang karia niou.

Roma 16:9

U sigi'ku wia si Urbanus si kakaria i mahpaayang wia si Kristus. U sigi'ku kangkasii wia si kakariaku si Stakhis, si ikararaatéku.

Efesus 5:3

Taan a samek wo a memua-muali a sinéro' im pahmualin né zéi'kampé' kimawéng, kaapa a malo'it, zozo' niitu in inuwu' uman én tia' im wia ni kamu. An téntu é sinéro' in ipahkua né tou linenas ni Opo Empung.

Filipi 1:27

Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

Filipi 2:29

Niitumo, sungkulela sia karia i mahpaa-paaz pahpaan ni sia éng katuari esa pa'émanen wo pahsigi'ela sé tou tanu ni sia.

Kolose 4:10

Si Aristarkhus, si binui kariaku é mapaayoma u sigi'na wia ni kamu. Téntu kangkasii si Markus, si oki' né mahtuari wo si Barnabas. (Tumoro ni sia ni kamu é nimakaileko um perénta; sa sia méyé wia ni kamu, sungkulela sia.)

1 Timutius 2:10

Taan tawimo sé wéwéné itii mahwawangunla un tou néra karia i mahwangun am wangun. Téntu um wangun im pahwangunen né wéwéné sé uli-ulit mahragés wia si Opo Empung.

2 Timutius 1:18

Ni kopé' si totoz mata'u taan ni aku, ung kalakez um pinaayangna im witi Efesus. Mengalé-ngaléi uman si Mahpiara é rumaraatémé ni sia im witu un endo si Opo Empung métumotoz ulit kaapa zéi'kan um pahwangunen né tou.

Titus 2:3

Téntu kangkasii sé wéwéné tu'amo, ni séra é léwo'zéi' i menou-nou mahkiit ung kapaaz ni Opo Empung, zéi'kan toro mahtawuruk sé tou walina wo zéi'kan toro mahelep a menewelen. Taantaré ni séra é léwo'zéi' i mahtuzu' am wangun,

Filemon 1:12

In tarékan méiatukuma si oki'ku si ikararaatéku itii i mawurima wia ni ko.

Filemon 1:17

Sa ko mahgenangla ni aku ing katuarimu esa pa'émanen, sungkulela si Onesimus tanu ni ko i sumungkul ni aku.

2 Yohanes 1:10

Niitumo, sa wéwéhan si méyé wia ni kamu wo zéi'kan mahtuzu' an tutuzu' ni Kristus, si tou itii én tia' pahsungkulen niou i muntep witu um walé niou wo tia' mahwéhé u sisigi'an wia ni sia.