Roma 13:12 - Taaz Weru Witu u Nunuwu'en Tombulu

¹² Un orasta i menou-nou wia ung kaayahan én tawimo maapu masuat wo um wengi i maendomo. Un endo si Mahpiara i méyé én zéi'mo uré. Niitumo, kumana'mola i mahwangun a léwo'an tanu am pemangu-mangunen né tou menou-nou wana ang karimbengbengan. Tanu sé suraro nimimeko ang kokoro' i masumaru sé kakoro', ni kita kangkasii é léwo'zéi' i mahwangunla an toro sumawang ni kita i sumaru a léwo'an.

Roma 13:12 Iomraidhean Croise

Roma 13:14

Taan méyémo kita maéndo tanu si Yesus Kristus Mahpiara, wo pahilekené né tou am pahwangunenta. Karia in téntu, ni séra én tanu nimilek ni Sia witu un touta. Wo tia'mo megena-genang uman ing kumiit a lelo léwo' un awakmu in esa.

1 Korintus 10:11

Péléng a nimamuali wia sé nimaopota itii, nimaéndo tanu ang kékéréan wia ni kita. Péléng niana é méipantik i mapagenang wia ni kita in tarékan, sé menou-nou wana an endo kaakazan ung kaayahan.

1 Korintus 7:29

Katuari-katuari! Ung kalakoan u méikuakuma itii én téntii: un endo kaakazan ung kaayahan én zéi'mo uré. Niitumo puunala niitu mamuali, si tuama wéwéhano mahayo wangunenola in tanu ni sia zéi'kampé' siapa mahayo.

2 Korintus 10:4

Pahpaan an ipahkoro' nai i mahsaru sé kakoro' én zéi'kan wia ung kaayahan a méyé, taan an ipahkoro' nai ém wia si Opo Empung a méyé karia ung kawasa-Na, un toro kumemu an tampa totoz enté' winangun né kakoro'.

2 Korintus 6:7

Ni kai é mahtuzu' uman an ulit karia ung kawasa ni Opo Empung. Un ulit pahwangunen nai niitu masuat wo u nimaéndo ipahkoro' i mahsaru sé tou kaapa ing kumelung un tou nai.

Efesus 4:22

Niitumo, tumoro ung katou-touan niou im puuna, ni kamu é léwo'zéi' in tumula'u ung katou-touan im puuna itii. Ung katou-touan itii é nimangun uman ni kamu méikaléwo' pahpaan méilulu u lelo léwo' un awak,

Efesus 5:11

Tia' mahwangun an zéi'kan siapa torona tanu am pahwangunen né tou menou-nou wana ang karimbengbengan, taan tawimo ikua nioula wia ni séra sa am pahwangunen néra itii é simala'.

Efesus 5:8

Im puuna ni kamu én zéi'kan mahkiit um paaz ni Opo Empung, ni kamu én tanu menou-nou witu ung karimbengbengan. Taan in tarékan, ni kamu é nimaesamo karia ni Opo Empung, niitumo ni kamu é menou-noula witu un ayah.

Ibrani 10:25

Tia' kita mahzou' im wana am pahréwokan mahwali-wali i mahragés wia si Opo Empung tanu ung kinanaram né tou walina, taan tawimo kita mahsésésaan am wangun pahpaan un endo si Yesus i mawurimé sumaup éng kaleleznamo.

Ibrani 12:1

Katuari-katuari, péléng sé tou ma'éman sé menou-nou im puuna itii é limiklik ni kita tanu u ninahak. Karia ung katou-touan néra i ma'éman wia si Opo Empung u méipapailek néra wia ni kita, toro maéndo kékéréan wia ni kita i menté' um pa'émanenta. Niitumo, itula'umola péléng am mahwutez wo a singkéla' u mengapé-ngapé' ni kita, tanu i mahtututu' im wana am pahlolowaan u léwo'zéi' ing kiitenta.

Yakobus 1:21

Niitumo, itia'la péléng a makazi'zisen wo a léwo' totoz lakez am pemangu-mangunen niou. Wo sungkulela u nuwu' ni Opo Empung u mémoiwéhé witu un até niou karia u roros até. Pahpaan u nuwu' itii ém wéwéhan kawasa i milot ni kamu im witu un ukuman wana a singkéla'.

Yakobus 5:8

Ni kamu kasii é léwo'zéi' i mezenla wo menté'la un até, pahpaan si Mahpiara i mawurimé sumaup én zéi'mo uré.

1 Petrus 2:1

Pahpaano niitu, ni kamu éng kumana'mola i memua-muali a léwo'an. Tia'mo mahtowo, tia'mo mahwangu-wangun i lumé'ospé'mé sé tou walina, tia'mo mahtéutéu wo kasii tia'mo mahtawuruk sé tou.

1 Petrus 4:7

Ung kaakazan ung kaayahan é lelezokan. Niitumo, pahimikela ung katou-touan niou wo tuméga-tégam, wo kamu toro uli-ulit i mengaléi.

2 Petrus 3:11

Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.

2 Petrus 3:9

Si Mahpiara én zéi'kan mahuré-uré i mangun a méitaaz-Na, zozo' im wéwéhan sé tou mahkua ni Sia én tahlous uré. Taan ni Sia én ezen im wia ni kamu, pahpaan kasoo-Na zozo' in esa wéwéhan sé tou maikaléwo'. Kapaaz-Na péléng sé tou én tumula'ula a singkéla' wo mawuri sumaup i mahlé'os ang kapaaz-Na.

1 Yohanes 2:18

É kamu in oki'ku, in tarékan é merétémoma ung kaakazan ung kaayahan, wo tanu an tinalinga niouo i si kakoro' ni Kristus é méyé, wo in tarékan lakez sé kakoro' ni Kristus ém wiamo. Nianamo an tumuzu'mé wia ni kita sa un oras kenu én uli-ulit merétémoma ung kaakazan ung kaayahan.

Wahyu 1:3

Mahpaa-paazola sia si nimacama wo séra sé timalingama a méipantik tumoro a mamuali wo mahkiit a méipantik witu. Pahpaan péléng niana én zéi'mo uré i mamuali.

Wahyu 22:10

Ang kuana kasii wia ni aku, “Tia'mo pahsesegelennu a nuwu' ni Opo Empung méipantik witu ung kitap kenu, pahpaan un oras niana péléng i mamuali é lelezokan.