Roma 12:8 - Taaz Weru Witu u Nunuwu'en Tombulu

⁸ Sa un tatambér ni Opo Empung é mahenté' un até, wangunenola niitu in uli-ulit mahenté' un até né tou walina. Sa un tatambér ni Opo Empung é mahwéhé wia sé tou walina, wangunenola niitu karia i mahpaa-paaz. Sa un tatambér ni Opo Empung é maéndo tonaas, uli-ulit wangunela niitu. Sa un tatambér ni Opo Empung é rumaraaté sé tou walina, wangunela niitu karia i mahpaa-paaz.

Roma 12:8 Iomraidhean Croise

Matius 25:40

Si Kolano itii é mingkot wia ni séra in téntii, ‘Uli-ulit ikua-Kuma wia ni kamu, péléng am winangun niouola wia si esaané im wia sé katuari-Ku sé totoz roros kenu, niitu ém winangun niouola wia ni Aku.’

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 13:12

I si gubernur nimilekla u nimamuali itii, ni sia é nima'éman wia si Yesus. Ni sia é mengusi-ngusingsing im wana an tutuzu' tumoro si Mahpiara.

Kisah Rasul-rasul 13:15

I nimakabacamola ung kitap Torat wo um pinantik né nabi, sé tonaas um walé peraragésan é nimatuma tou i meligau wia si Paulus wo si Barnabas in téntii, “Katuari-katuari, sa kamu wéwéhan un ipahkukua i maheenté' um pa'émanen né tou kenu, ikuamoma!”

Kisah Rasul-rasul 15:32

Lakez a méikua ni Yudas wo ni Silas u nimangun sé katuari esa pa'émanen mahpaa-paaz wo nimenté' un até néra. Ni séra zua kangkasii é nabi.

Kisah Rasul-rasul 20:2

Ni sia é mahliklik am wanua witi tana' Makedonia wo lakez a sésésana wia sé katuari esa pa'émanen witu i maheenté' un até néra. A sia ikaayola witi Yunani.

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Kisah Rasul-rasul 4:36

Si Yusuf si pahkuan né aatu ni Yesus im ‘Barnabas’ ung kalakoana é mahenté' un até né tou wo ni sia kangkasii é suzu ni Lewi si nimatou witi Siprus é nimangun kangkasii un téntu.

Roma 12:13

Sawangala am pemandungen né tou sé linenas ni Opo Empung wo sungkulela karia u mahpaa-paaz sé tou mento' witu um walému.

Roma 13:6

Niitumo ni kamu léwo'zéi' i mahwaérla am pajak wia sé pemerénta. Pahpaan sé pemerénta é mahpaayang am paayangen méiwéhé ni Opo Empung wia ni séra.

1 Korintus 12:28

Wo wia ni kamu sé jamaat, sé woopira im wia ni kamu ém pinéléng ni Opo Empung i maéndo: kataré, sé tou niéndo aatu ni Yesus, kazua, sé tou niéndo nabi, katelu, sé tou niéndo méster mahtuzu' an tutuzu' ni Mahpiara, wéwéhan sé tou tinambéran u makawawa i mangun u makakompo'en, wéwéhan sé tou tinambéran u makawawa i lumé'os sé tou saki, wéwéhan sé tou tinambéran u makawawa i mahsawang sé tou walina, wéwéhan sé tou tinambéran u makawawa i maéndo tonaas, wo kasii wéwéhan sé tou tinambéran u makawawa i mahnuwu' karia a nunuwu'en walina un akaz uman si Roh Lenas si mata'u.

1 Korintus 14:3

Taan sa si tou tinambéran u makawawa i mahkua wia sé tou a méikuamé ni Opo Empung wia ni sia, an ipahkuana wia sé tou é mahenté' um pa'émanen, mahsésa wo mahenté' un até néra.

2 Korintus 1:12

Ni kai én totoz mahlooz ung katou-touan nai pahpaan um pahwangunen nai wia sé tou wia ung kaayahan é lé'os wo ulit. Niitu un totoz méisanapa' witu um pahile-ilekan nai karia niou. Witu ung genang lé'os nai, ni kai én totoz mata'u sa niitu é lé'os wo ulit wia si Opo Empung a méyé, niitu kangkasii én tumuzu'ma wia sé tou sa am pahwangunen nai én ulit. Wo péléng am pahwangunen nai itii én zéi'kan karia ung katulapan nai in tou, taan karia ung kamang tatambér ni Opo Empung.

2 Korintus 11:3

Taan ikaindé'ku én taa ung genang niou é méilulu makaz kamu zéi'mo uli-ulit mahkiit si Kristus, tanu si Hawa im puuna i méilulula ni ulé' karia ung kasigaanna i mahtowo.

2 Korintus 8:12

Pahpaan sa kamu paaz mahwéhé wo mahwéhé mengiit ung kawawaan niou, si Mahpiara ém paaz i sumungkul a méiwéhé niou. Ni Sia én zéi'kan kawisa mahaléi wia ni kamu i mahwéhé un zéi'kan siapa im wia ni kamu.

2 Korintus 9:11

Ni kamu é mawa'ilan im wana am péléng wo ni kamu sekezé é meripu' umané i mahwéhé, u mangun sé tou lakez mahkua u makasé wia si Opo Empung pahpaan ni kai.

2 Korintus 9:13

I sé katuarita nimakailekla an zoit sasawang itii, ni séra é mahlooz wo mahsigi' si Opo Empung, un tumuzu'mé i ni kamu én uli-ulit kimiit wo ma'éman u Nuwu' Lé'os tumoro si Kristus. Ni séra é mahlooz wo mahsigi' si Opo Empung pahpaan i niilek nérala ni kamu é meripu' umané i mahwéhé a sasawang wia ni séra wo wia péléng sé tou.

2 Korintus 9:7

Péléng sé tou é léwo'zéi' i mahwéhé a sasawang mengiit ung kapaazna. Tia' mahwéhé a sasawang sa niitu é mahwangun uman un até i rumara kaapa im pahlusun, pahpaan si Opo Empung é rumaraaté sé tou mahwéhé karia i mahpaa-paaz.

Efesus 6:5

É ata, ni kamu é mahtali-talingala wia sé tuang niou sé wia ung kaayahan. Ni kamu in ata én uli-ulit i maindé', mahtali-talinga wo mahsigi' sé tuang niou tanu ni kamu in uli-ulit mahtali-talinga wo mahsigi' si Kristus.

Kolose 3:22

É kamu sé ata, mahtali-talingala wia sé tuang niou im wia ung kaayahan im wana péléng am péleng, tia' kamu mapailek i mahtali-talinga witu u sinaru néra uman i mangun ni séra mahpaa-paaz, taan mahtali-talingala wia ni séra karia ung genang lé'os pahpaan i maindé' si Mahpiara.

1 Tesalonika 2:3

Ni kai i mahsésama én zéi'kan i mahlululu ni kamu, zéi'kan karia ang genang léwo' wo kasii zéi'kan in tumowo wia sé kasuat tou.

1 Tesalonika 2:8

Ni kai é rumaraaté ni kamu, niitumo ni kai én zéi'kan uman paaz i mahwoka' u Nuwu' Lé'os ni Opo Empung wia ni kamu, taan ung katou-touan nai kangkasii én iwéhé nai wia ni kamu pahpaan ni kamu én totoz ikararaaté nai.

1 Timutius 4:13

Karegas ko ma'ento' ni aku i méyé, ni ko é léwo'zéi' sekezé é mahbacama um Pinantik Lenas wia sé tou ma'éman witu i mahsésa wo mahtuzu' ni séra.

1 Timutius 5:17

Sé penatua sé uli-ulit mahpaayang am papaayangen néra é léwo'zéi' makailek u sisigi'an u makazuamé, lumouspé' kasiimé é sé siga' i mahwoka' u Nuwu' ni Opo Empung wo i mahtuzu' sé jamaat.

1 Timutius 6:18

Ipapagenangla wia ni séra wo séra mahwangunla am wangun, mawa'ilan wana am wangun, paaz mahsawang wo paaz mahtambér.

Ibrani 10:25

Tia' kita mahzou' im wana am pahréwokan mahwali-wali i mahragés wia si Opo Empung tanu ung kinanaram né tou walina, taan tawimo kita mahsésésaan am wangun pahpaan un endo si Yesus i mawurimé sumaup éng kaleleznamo.

Ibrani 13:17

Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Ibrani 13:22

Katuari-katuari, ni aku é sumésama wia ni kamu, zozo' um pinantikku kenu ém potot uman. Mengalé-ngaléi uman ni kamu é sumungkul um pinantik kenu karia i mahpaa-paaz.

Ibrani 13:24

Ipapaayopé'la u sigi'ku wia péléng sé tonaas niou wo wia péléng sé tou linenas ni Opo Empung. Sé katuari esa pa'émanen sé wia Italia é mapaayoma u sigi' wia ni kamu.

Ibrani 13:7

Genangen nioula sé tonaas niou im puuna sé nimahwoka'momé u Nuwu' ni Opo Empung wia ni kamu. Wéhan nioula genang kura ung katou-touan néra makaz ni séra i nimaté wo kéréala um pa'émanen néra.