Roma 10:19 - Taaz Weru Witu u Nunuwu'en Tombulu

¹⁹ Taan ni aku é meligau sumaup: Apa sé tou Israel zéi'kampé' makatulap u Nuwu' Lé'os itii? Zéi'kan! Pahpaan ing kataré-taré si Musa éng kimuamo u méikua ni Opo Empung, “Ni kamu ém wanguneng-Ku in tuméutéu sé tahsasana wanua walina sé zéi'kan tou-Ku. Wo mangun ni kamu maupi' wia sé tahsasana wanua sé pahgenangen nioula i lemou.”

Roma 10:19 Iomraidhean Croise

Roma 10:18

Taan ni aku é meligau: Apa sé tou Yahudi én uli-ulit zéi'kampé' timalinga u Nuwu' Lé'os tumoro si Yesus itii? Ni séra én timalingamo niitu. Pahpaan witu um Pinantik Lenas é méipantik in téntii, “Si nimahalimé an ipapata'u é nimapata'umoma wia péléng ung kaayahan, wo u méikua nérama én tinalingamoma makaz witi pondolna ung kaayahan.”

Roma 11:11

Niitumo, ni aku é lumigau kasiima, “Apa sé tou Yahudi én ikasangkila téntu wo séra makemu?” Zéi'kan! Taan pahpaan a singkéla' néra, sé tou zéi'kan Yahudi é méipiloté im witu un ukuman wana a singkéla', i mangun sé tou Yahudi mahtéutéu pahpaan mahileka niitu.

Roma 11:14

Ni aku é mahéré'la sa am pahpaayangengku kenu én toro mangun sé kawanuaku in tuméutéu sé tahsasana wanua walina in ipilot witu un ukuman wana a singkéla', wo karia in téntu sé woopira im wia ni séra én toro sawangangku in ipiloté witu un ukuman wana a singkéla'.

Roma 3:26

In tarékan si Yesus nimaté simawel ni kita, niitumo un tumuzu'mé i si Opo Empung én zéi'kan mahsanaweka. Karia in téntu si Opo Empung mapaileké i ni Sia én ulit wo péléng sé ma'éman wia si Yesus én éndon ulit ni Opo Empung witu u sinaru-Na.

1 Korintus 1:12

Ung kalakoana ém, “Wéwéhan sé wia ni kamu é mahkua in téntii, ‘Ni aku é mahkiit si Paulus.’ Sé walina é mahkua, ‘Ni aku é mahkiit si Apolos’, wo sé walina é mahkua, ‘Ni aku é mahkiit si Petrus.’ Wo sé walina kasii é mahkua, ‘Ni aku é mahkiit si Kristus.’ ”

1 Korintus 10:19

Ni aku ing kimuama téntu zéi'kan i mahkukuama sé opo-opo wo a méiragés wia sé opo-opo ém wéwéhan torona. Zéi'kan!

1 Korintus 11:22

Zéi'kan siapa walé kamu wé wo kamu toro kuman wo melep? Kaapa paaz kamu wé i mahséro' sé jamaat ni Opo Empung wo mapaiza-izang sé tou zéi'kan siapa apa? Apapé' un totoz ikuakuma wia ni kamu? Lumooz ni kamu? Wana am pahwangunen niou itii, ni kamu én zéi'kan loozengku!

1 Korintus 12:2

I ni kamu zéi'kampé' mata'u si Opo Empung, wéwéhan sé tinowoan an ikakiitla i mahsigi' sé opo-opo wowo'.

1 Korintus 15:50

Katuari-katuari, kenu un ikuaku wia ni kamu: Un awakta in tarékan én zaha' wo lé'ona u maléwo'. Niitumo, ni kita én zéi'kan toro muntep witi Kakolanoan ni Opo Empung ing Kolano. Un awakta u maléwo' én zéi'kan toro muntep witu pahpaan im witu én zéi'kan siapa a maléwo'.

1 Korintus 7:29

Katuari-katuari! Ung kalakoan u méikuakuma itii én téntii: un endo kaakazan ung kaayahan én zéi'mo uré. Niitumo puunala niitu mamuali, si tuama wéwéhano mahayo wangunenola in tanu ni sia zéi'kampé' siapa mahayo.

Titus 3:3

Pahpaan im puuna ni kita kangkasii é menou-nou witu ung kalemouan: zéi'kan mahtali-talinga, méikalulu, nimaéndo ata wana a lelo léwo' un awak wo a makapaazen meléwo' un tou, menou-nou mahwangun a léwo'an wo téutéu, ikazi'zis né tou wo mahzizi'zisan.

1 Petrus 2:10

Im puuna ni kamu én zéi'kan tou ni Opo Empung, taan in tarékan ni kamu é nimaéndomola tou-Na. Wo im puuna kasii si Opo Empung én zéi'kampé' nimapailek u raraatéan-Na, taan in tarékan ni kamu é nimakaileko u raraatéan-Na.