Matius 5:22 - Taaz Weru Witu u Nunuwu'en Tombulu

²² Taan in tarékan ni Aku éng kumuama wia ni kamu: Séi uman sé maupi' wia si katuarina, ni sia é léwo'zéi' in ukumen. Séi si mahsalou si katuarina, ni sia é léwo'zéi' in isaru wia sé Mahkama Agama. Wo séi si mahkua si katuarina i letup, ni sia é léwo'zéi' in ilombo' witu un api naraka zéi'kan mahpaté.

Matius 5:22 Iomraidhean Croise

Matius 10:17

Taan mile-ilek im wia péléng sé tou. Pahpaan wéwéhan sé mayo ni kamu witi mahkama agama wo ni kamu kasii é masaluken néra witi walé peraragésan néra.

Matius 10:28

Ni kamu én tia' maindé' wia sé tou sé makawawa uman i munu' un awak niou, taan zéi'kan makawawa i munu' si roh niou. Taan maindé'la ni Sia si wéwéhan ung kawasa i munu' un awak wo si roh niou witi naraka.

Matius 12:24

Taan i sé sana réwok tou Farisi timalingala niitu, kuan néra, “Ni Sia mahwoho sé sétang karia ung kawasa ni Beelzebul, si tonaas né sétang.”

Matius 17:5

Taan i si Petrus karegaspé' mahnuwu', kumompo'mé an tumumpamé u ninahak mahsena' ang kumungkunga wia ni séra. Im witu un untep u ninahak itii tinalingamé u nuwu' kimuamé, “Si Kenumo si Oki'-Ku si ikararaaté-Ku, ni Sia si mahwangun un até-Ku mahpaa-paaz, pahtalingala Sia.”

Matius 18:21

A méyé si Petrus ang kumuama wia si Yesus, “Tuang, makaz makapira ni aku léwo'zéi' i méhé ampungan wia si katuariku, sa sia sumingkéla'la wia ni aku? Makaz i makapitu?”

Matius 18:35

Téntumo kangkasii um wangunen ni Ama'-Ku si witi kasendukan wia ni kamu. Ni kamu si esa wo si esa én ukumen-Na sa kamu zéi'kan uli-ulit méhéla ampungan wia si katuarimu.”

Matius 23:15

Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu mahleweta un tasik wo mahliklik ang katanaan i menéro tou zozo' in esa uman ing kumiit um pa'émanen niou. I ni sia mahkiito um pa'émanen niou, ni sia winangun nioula maéndo tou si maiuntep witi naraka, si makazuamé ung kaléwo'an niou.

Matius 23:33

É kamu sé tou totoz léwo' sé tanumokan suzu né ulé' melangu! Kura kamu mapapilot un tou niou im witu un ukuman witi naraka?

Matius 25:41

Ang kuan-Na wia sé tou witu ung kawihi-Na, ‘Tumingkasa im witu u sinaru-Ku, é kamu sé tou tinoro un epa'! Muntepoma witu un api zéi'kan mahpaté u niimek in iwéhé wia si tonaas né sétang wo sé malaekatna.

Matius 26:59

Sé tonaas né walian wo sé walina sé méikauntep witu u Mahkama Agama é menéro-néro tou sé kumua an towo tumoro an tinalinga wo niilek néra i sumaru si Yesus, wo Sia toro ukumen i maté.

Matius 3:17

An talingané u Nuwu' witi kasendukan ung kimuamé, “Si kenumo si Oki'-Ku si ikararaaté-Ku. Ni Siamo si mahwangun un até-Ku mahpaa-paaz.”

Matius 5:34

Taan in tarékan ikua-Kuma wia ni kamu: Zozo' i makasa uman, ni kamu én tia' mahtiwa' karia u langit, pahpaan u langit itii é rurumezan ni Opo Empung ing Kolano.

Matius 5:44

Taan in tarékan ikua-Kuma wia ni kamu: Irara- atéla sé kakoro' niou wo ipengaléila sé tou mahzézéha ni kamu.

Markus 14:55

Sé tonaas né walian wo sé tou méikauntep witu u Mahkamah Agama é menéro-néro tou sé toro kumua a niilek wo an tinalinga néra i mapahsasala' si Yesus wo Sia toro ukumen i maté, taan ni séra én zéi'kan méikailekla.

Markus 15:1

In totozpé' woondo, sé tonaas né walian, sé pahtutu'an né tou Yahudi, sé tou tulap un Torat wo sé walina sé méikauntep witu u Mahkama Agama, nimaréwok wo nimaesaan. A si Yesus apusen nérala an ipahwalima i maiayo wia si Pilatus.

Lukas 12:5

In tarékan én ituzu'-Kuma wia ni kamu séi si léwo'zéi' in ikaindé' niou. Ikaindé'la si Opo Empung, pahpaan ni Sia ém wéwéhan kawasa i munu' un awak niou wo lumombo' si roh niou witi naraka. Uli-ulit ikua-Kuma wia ni kamu, ikaindé'la Sia!

Lukas 22:66

I mawoondomomé a maréwoké sé pahtutu'an né tou Yahudi wo sé tonaas né walian wo sé tou tulap un Torat, a Sia ipahwali nérama witi Mahkamah Agama.

Yohanes 11:47

A sé tonaas né walian wo sé sana réwok tou Farisi tumawahmé sé tou méikauntep witu u Mahkama Agama i maréwok wo ni séra é mahkua, “Si Tou itii é nimanguno lakez makakompo'en, niitumo apa u léwo'zéi' im wangunenta?

Yohanes 15:25

Taan u nuwu' méipantik witu un ukum Torat é léwo'zéi' i malekep: ‘Ni séra é mazi'zis ni Aku, taan zéi'kan siapa zozo' in esa um winangun-Ku u mangun ni séra mazi'zis ni Aku.’

Yohanes 7:20

Sé tou lakez itii nimingkotla, “Sinelazan katu' Ko! Séi si mahtututu' i munu' ni Ko?”

Yohanes 8:48

Sé tonaas né tou Yahudi mingkotla wia si Yesus, “Ulito um pahkua nai i ni Ko én tou Samaria wo sinelazan.”

Kisah Rasul-rasul 17:18

Wo wéwéhan kasii sé woopira méster an tutuzu' Epikuros wo an tutuzu' Stoa mahzéi'-zéi'an kariana. Wéwéhan sé mahkua, “Apa un ipahkukua ni wayaan uman kanuwu'an kenu?” Taan sé walina kasii é mahkua, “An ipahkua ni tou kenu én tumoro sé opo-opo zéi'kan kata'uan.” Ni séra mahkua in téntu pahpaan ni sia é mahwoka' u Nuwu' Lé'os tumoro si Yesus, wo tumoro si Yesus i méitoumé sumaup ni Opo Empung im wia sé nimaté.

Kisah Rasul-rasul 22:30

Si tonaas né sana riwu suraro én totoz paaz i mahtata'u, apa un ulitna ung kinawalian né tou Yahudi i mahtoké si Paulus. Pahpaano niitu, masandomé a sia matuma i mangémé si Paulus witi bui a meréntama sé tonaas né walian wo sé tou walina sé méikauntep witu u Mahkamah Agama i maréwoké. Am pahwalinama si Paulus maisaru wia ni séra.

Kisah Rasul-rasul 23:1

Karia i mahwerenna wia sé tou sé méikauntep witu u Mahkamah Agama si Paulus mahkua, “Katuari-katuari, makaz in endo kenu ni aku é menou-nou karia un até weresi witu u sinaru ni Opo Empung.”

Kisah Rasul-rasul 24:20

Taan, iwayamola sé tou kenu ing kumua a niilek néra tumoro a léwo'an winangunku, i ni aku méisaru witi Mahkamah Agama.

Kisah Rasul-rasul 4:15

Kumawusa niitu, si Petrus wo si Yohanes é méipekiondol néramé im witu um paheruzan itii, a séra rengan i meruz.

Kisah Rasul-rasul 5:21

Kumawusa séra in timalingama u méikuama ni malaekat itii, i maayahmo a séra muntepa witi lésaz um Walé ni Opo Empung a mahtuzu' witu. Karegas niitu, si Walian Wangko' wo sé mahkii-kiit ni sia é riméwoké sé tou méikauntep witu u Mahkamah Agama, ni séra ém péléng sé pahtutu'an né tou Israel. Tumondong niitu an ipekiangé néramé sé aatu ni Yesus im witi bui.

Kisah Rasul-rasul 5:27

Ipahwali néramé sé aatu itii a maisaru wia sé Mahkama Agama. A méhé si Walian Wangko' i meligau wia sé aatu itii.

Kisah Rasul-rasul 6:12

Karia in téntu ni séra mahaker sé tou lakez, sé pahtutu'an wo sé tou tulap un Torat. A sia rengan in tionan néramé, pahkéhongen néramé an ipahwalima witi Mahkamah Agama.

Kisah Rasul-rasul 6:15

In toro niitu, péléng sé tou sé rimumez i mahtotoz witi Mahkamah Agama itii nimerena wia si Stefanus, an ileken nérama ung giona é mahsena' tanu ung gio ni malaekat.

Kisah Rasul-rasul 7:37

Si Musa kenu kasii si kimua wia sé tou Israel in téntii, ‘Im wia sé tahsasana wanua niou é méyé si nabi tanu ni aku si iwéhé ni Opo Empung.’

Roma 12:10

Mengalé-ngaléi ni kamu é mahraa-raatéan tanu a mahtuari wo mahpuu-puunala i mahwéhé a sisigi'an.

1 Korintus 6:10

sé maremu', sé angkum, sé matetewelen, sé mahtawuruk sé tou walina wo sé towo, péléng sé tou memangu-mangun tanu niana én zéi'kan muntep witi Kakolanoan ni Opo Empung.

1 Korintus 6:6

Kaa kamu in tou esa pa'émanen é mahéndo-éndoan karia ni kasuat tou esa pa'émanen wo mamenéro si tou zéi'kan ma'éman in tumotoz, séi si ulit kaapa zéi'kan wana am pahéndo-éndoan niou itii?

1 Tesalonika 4:6

Tumoro niitu, tia' si tou mahlé'os an zéi'kan wangun wia si katuarina esa pa'émanen kaapa mahtowo wia ni sia. Pahpaan totoz méipapagenang naimola wia ni kamu i sé tou mahwangun an téntu én ukumen ni Opo Empung.

Titus 3:2

Ni séra kasii én zéi'kan toro mahtawuruk, zéi'kan toro mahéndo-éndoan. Ni séra é léwo'zéi' in eluz uman wo roros até wia péléng sé tou.

Ibrani 12:25

Niitumo mile-ilekla, tia' kamu soo tumalinga si Opo Empung si mahnuwu'mé. Ni séra sé soo mahtalinga ni sia si mahkua u Nuwu' ni Opo Empung én zéi'kan mata'u tumingkas, apapé' kasii ni kita sé mahtalingamé si Opo Empung si mahnuwu'mé witi kasendukan. Sa kita zéi'kan mahtalinga ni Sia, tantumo ni kita én zéi'kan ikatingkas im witu un ukuman wana a singkéla'.

Ibrani 5:9

Im pinakapendan-Namomé péléng am pengalin-Na, taré si Opo Empung mangun ni Sia zéi'kan siapa pahséro'an wo ni Sia uman si milot sé tou im witu un ukuman wana a singkéla' makaz ing kauré-uré wia sé tou mahtali-talinga ni Sia.

Yakobus 2:20

É tou lemou, paaz ko wé in tarékan i makaulité sa um pa'émanen zéi'kan kinaria um pahlé'osen én zéi'kan siapa torona?

Yakobus 3:6

U lila' kangkasii én tanu un api. Im witu un touta, péléng a léwo' ém witu u lila' a lumangkowa wana péléng un awakta. Niitu u mangun ni kita i mahmuali a léwo'. Pahpaan un api itii ém witi naraka a méyé u méluma'ung ung katou-touanta.

1 Petrus 2:23

I ni Sia ipahsalou né tou, ni Sia én zéi'kan mahwingkot karia a sasalou. I ni Sia nimendan an zézéha, ni Sia én zéi'kan timaaz i maér, lumousé niitu un tou-Na é méiwéhé-Nala wia si Opo Empung, si zéi'kan mahsanaweka i mahtotoz ulit kaapa zéi'kan am pahwangunen né tou.

1 Petrus 3:9

Tia' u léwo'an ém waéran niou karia u léwo'an, kaapa u sasalou karia u sasalou. Taan, ipengaléi nioula wia si Opo Empung wo séra kamangené, pahpaan ni kamu én tinawah-Na i maéndo kamang wia sé tou walina, wo karia in téntu ni kamu é makailek ung kamang.

1 Yohanes 2:9

Séi si mahkua i ni sia é menou-nou witu un ayah, taan si mazi'zis sé katuarina esa pa'émanen, ni sia é menou-nou witu ung karimbengbengan makaz in tarékan.

1 Yohanes 3:10

Ang kenumo an tumuzu'mé sé oki' ni Opo Empung wo sé oki' ni tonaas né sétang: Péléng sé tou sé zéi'kan mahwangun ung kaulitan wo kangkasii sé zéi'kan rumaraaté sé katuari néra esa pa'émanen, ni séra én zéi'kan oki' ni Opo Empung.

1 Yohanes 5:16

Sa wéwéhan si tou milekla si katuarina esa pa'émanen mangunla a singkéla' an zéi'kan mangun ni sia i makailek um patéan, ni sia é léwo'zéi' in ipengaléi nioula wia si Opo Empung. Si Opo Empung é méhé ung katou-touan wia si tou si nimangunla a singkéla' itii. Niia kangkasii én tumoro sé tou nimangunla a singkéla' an zéi'kan nimangun ni séra i nimakailek um patéan. Taan wéwéhan u singkéla' u nimangun si tou i nimakailek um patéan. Tumoro niitu, ni aku én zéi'kan kumuama i ni sia é léwo'zéi' in ipengaléi nioula.

Yudas 1:9

Si Mikhael si tonaas né malaekat i mahzéi-zéi'an karia ni tonaas né sétang, soo tumotoz karia a séséro' wia si tonaas né sétang tumoro séi si makailek un awak ni Musa. Si Mikhael éng kimua uman, “Mengalé-ngaléi si Opo Empung é rumekaké ni ko!”

Wahyu 20:14

Kumawusa niitu, um patéan wo um pahwéha-wéhan né tou nimatémo é méiwerita witu un tasik api melaya-layas. Un tasik api itiimo um patéan kazua.