Matius 4:10 - Taaz Weru Witu u Nunuwu'en Tombulu

¹⁰ Taan kuan ni Yesus wia si tonaas né sétang, “É tonaas né sétang, mangémo ko im wia'i! Pahpaan wéwéhan u méipantik, ‘Ni ko é léwo'zéi' i mahongkot wo mahsigi' si Mahpiara, si Opo Empungmu wo ni Sia uman si pahragésannu.’ ”

Matius 4:10 Iomraidhean Croise

Matius 16:23

A si Yesus merena wia si Petrus, ang kuan-Na, “Mingkasa ko tonaas né sétang! Ni ko ém watu pahkasangkilan im wia ni Aku pahpaan ni ko én zéi'kan mahgenang ung ginenang ni Opo Empung, taan mahgenang uman ung ginenang ni tou.”

Markus 1:13

Epatna pulu' endo Sia im pema'wa'en ni tonaas né sétang witu. Si Yesus i mahwitu-witu éng karia né liontana' wo sé malaekat mahselewir ni Sia.

Lukas 10:18

Ang kuan ni Yesus wia ni séra, “Niilek-Ku si tonaas né sétang nimagogomé im witi langit tanu an tila'pong.

Lukas 11:18

Téntu kangkasii um witi kakolanoan né sétang sa sé sétang makahkoro' wo sé kasétang nérakan, tantumo ni séra é makayo'. Pahpaan ni kamu é mahkua i ni Aku é mahwoho sé sétang karia ung kawasa méiwéhé ni Beelzebul wia ni Aku.

Lukas 13:16

Si wéwéné kenu é suzu ni Abraham, ni sia é mapulu' wo waluna ta'uno i saki pahpaan sinelazan ni tonaas né sétang. Niitumo, in tarékan witu un endo Sabat kenu ni sia é léwo'zéi' ipilot-Ku im witu ung kawasa ni tonaas né sétang.”

Lukas 22:3

A si tonaas né sétang nimuntepa wia si Yudas, si pahkuan Iskariot, si esaané wia sé mapulu' wo zua pahtuzu'en ni Yesus.

Lukas 22:31

Ang kuan ni Yesus wia si Simon Petrus, “Simon, Simon, amoké talinganuma ung kenu! Si tonaas né sétang é nimenutu'momé i mema'wa' ni kamu wo ni kamu én tanumokan ang gandum im pahgéigéien wo ikatampasé witu un itingna.

Lukas 4:8

Taan kuan ni Yesus wia ni sia, “Wéwéhan u méipantik in téntii: ‘Ni ko é léwo'zéi' mahongkot wo mahsigi' uman si Mahpiara, si Opo Empungmu, wo ni Sia uman si pahragésannu!’ ”

Yohanes 13:27

I si Yudas nimakailekola u roti itii a si tonaas né sétang sumelazla wia ni sia. A si Yesus kumuala wia ni sia, “Apa um paaz im wangunennu, rewekenola i mangun niitu.”

Kisah Rasul-rasul 26:18

i mangun am weren néra mawula', wo ni séra zéi'mo menou-nou witu ung karimbengbengan taan menou-nou witu un ayah. Wo menou-nou zéi'mo kinawasa ni tonaas né sétang taan mahkiito um paaz ni Opo Empung. Wo pahpaan um pa'émanen néra wia ni Aku, ni séra é makailek un ampungan wana a singkéla' néra. Wo ni séra kasii é makailek um wéwéténgan im wana an tinotozo in iwéhé ni Opo Empung wia sé tou sé linenas-Na.’

Kisah Rasul-rasul 5:3

Taan si Petrus éng kimuala, “Ananias, kaa si tonaas né sétang é méiwayamu ing kimawasa un atému, taka-takazan si Roh Lenas én tinowoannu wo wéwéhan an zoit um winangkéran un tana' itii é méilé'osmu?

1 Korintus 5:5

ni kamu én totoz méhéla si tou itii wia si tonaas né sétang, wo un awakna é maléwo'. Karia in téntu si rohna én ipiloté im witu un ukuman wana a singkéla', im witu un oras si Yesus Mahpiara i mawurimé sumaup.

1 Korintus 7:5

Wia sé sana séndé', mahwangunla an toro uman pahwangunen né sana séndé'. Toro in zéi'kan mahwangun niana sa ni kamu zua nimaesaanola, taan tia'mo tahlous uré, wo kamu wéwéhan oras i mengaléi. Kumawusa niitu, ni kamu é mahwali-walila sumaup, wo si tonaas né sétang zéi'kan menou ni kamu, pahpaan ni kamu zéi'kan makaezen u lelo un awak niou.

2 Korintus 11:14

An téntu én tia' ikakompo' niou, pahpaan si tonaas né sétang kangkasii é mahasa-asar sé malaekat nimahalimé un ayah.

2 Korintus 12:7

Taan wo ni aku zéi'kan maloozan pahpaan an zéi'kan kakuaan a méipapata'u ni Opo Empung wia ni aku, ni aku é nimakailek u saki. U saki itii nimangun ni aku in totoz zézéha, niitu én tanu u susulah witu un touku méiwéhémé ni tonaas né sétang wia ni aku wo ni aku zéi'kan maloozan.

2 Korintus 2:11

Winangunku téntu, wo kita zéi'kan towoan ni tonaas né sétang, pahpaan kata'uanta ung ginenangna.

Yakobus 4:7

Niitumo, iwéhéla un tou niou wo kumiitla si Opo Empung, sarula si tonaas né sétang, wo sia tumingkasé im wia ni kamu.

1 Petrus 5:9

Sarula si tonaas né sétang itii karia um pa'émanen enté'. Pahpaan kata'uan niou sa sé katuari niou esa pa'émanen wia péléng ung kaayahan kangkasii é nimendanomé an zézéha tanu am pinahpendan nioué.