Matius 13:22 - Taaz Weru Witu u Nunuwu'en Tombulu

²² Am watuna tatanemen méikagogo wana an zukut menulah é sé tou sé timalinga u Nuwu' itii, taan tahlous maarét ung katou-touan néra wo tawi mapahléla'en im wana a sangkum. Niitumo u Nuwu' ni Opo Empung é méisé'sé' umanla a lelo wo ang genang wana ang kawa'ilanan wia ung kaayahan taka-takazan zéi'kan nimua'mé.

Matius 13:22 Iomraidhean Croise

Matius 12:32

Sa si tou mahkuama a mahsaru si Oki' ni Tou, ni sia én ampungan. Taan sa ni sia mahkuama a mahsaru si Roh Lenas, ni sia én zéi'kan ampungan, im wia ung kaayahan in tarékan kaapa im witi kaayahan in tumondong.”

Matius 13:39

Si kakoro' si kimeroza am watuna an tatanemen tanu ang gandum é si tonaas né sétang. Un oras i mupu' én endo ka- akazan ung kaayahan. Wo sé tou mengungupu' itii é sé malaekat.

Matius 13:40

Niitumo, kuramo an tatanemen tanu ang gandum i rinéwoké an ilombo'ma witu un api, téntumo kangkasii u mamuali witu un endo kaakazan ung kaayahan.

Matius 13:7

Am watuna tatanemen walina é méikagogoma witu un tana' tinouan zukut menulah. I mahtoumomé am watuna itii, an zukut menulah kangkasii éng kaselahna a sumé'sé'la an tinanem itii makaz i nimaté.

Lukas 12:15

Ang kuan-Na wia sé tou lakez, “Mile-ilek wo tuméga-tégam én taa kamu maéndo tou angkum. Pahpaan zozo' in totoz lakez a sangkum ni tou, ung katou-touanna én zéi'kan niméré' uman witu ung kawa'ilananna.”

Lukas 12:21

Téntu u mamuali wia si tou si mahtututu' uman i mahréwok a sangkumna, taan zéi'kan mahtututu' i maéndo wa'ilan witu u sinaru ni Opo Empung.’ ”

Lukas 21:34

“Tuméga-tégam un toumu wo tia' megena-genang uman u mahpaa-paaz im wana am pésta, wo u mahelep makaz i matewelen karia in tahlous mahgenang am pemandungennu i mendo-endo, wo i si Oki' ni Tou méyé sumaup ni kamu én zéi'kan mengompo'.

Lukas 8:14

A méikagogo witu un tana' tinouan an zukut menulah, ung kalakoana é sé tou timalingama u Nuwu' ni Opo Empung, taan ni séra é maarét tumoro ung katou-touan néra, paaz mawa'ilan wo mahkiit uman a lelo wia ung kaayahan, taka-takazan zéi'kan nimaririhan.

Kisah Rasul-rasul 8:18

I nimilekla sé aatu ni Yesus in zimeta'ma u lengen néra wia sé tou itii, a sé tou itii makailekla si Roh Lenas, si Simon meriara itii é mahwéwéhé zoit wia ni séra,

Roma 12:2

Ni kamu én tia'mo mahkii-kiit am pahwangunen né tou wia ung kaayahan, taan iwayamola ung genang lé'os niou im werun ni Opo Empung. Karia in téntu ni kamu én toro makatulap ung kapaaz ni Opo Empung: Am wangun, a mahwangun ni Sia mahpaa-paaz wo zéi'kan siapa pahséro'an.

1 Korintus 1:20

In tarékan, kuramotuu sé tou tulap? Kuramo sé tou tulap un Torat? Kuramo sé tou wia ung kaayahan kenu sé paaz uman mahzéi' an ipahkua né tou wia ni sia? Péléng ang katulapan néra ém winangunola ni Opo Empung nimaéndo kalemouan néra.

1 Korintus 2:6

Zozo' in téntu, im wia sé tou totozo lutu' i ma'éman, ni aku éng kimuamoma ung katulapan. Ung katulapan itii é méyé zéi'kan wia ung kaayahan kaapa wia sé mahkawasa wia ung kaayahan kenu sé mazéi'en.

1 Korintus 2:8

Zéi'kan siapa im wia sé mahkawasa wia ung kaayahan kenu sé mata'u ung katulapan ni Opo Empung itii. Pahpaan sa kata'uan néramo ung katulapan itii, si Yesus Mahpiara si pahloozen wo pahsigi'en én zéi'kan sinalip néra.

1 Korintus 3:18

Tia' wo wéwéhan si tou mahtowo witu un touna in esa. Sa wéwéhan si tou mahkua un touna én tulap mengiit am wia ung kaayahan kenu, ni sia é maéndopé'la lemou wo taré sia toro uli-ulit matulap.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

Galatia 1:4

Karia um paaz ni Opo Empung si Ama'ta, si Yesus Kristus nimayo un tou-Na in tumubus ni kita im wana a singkéla' pahwangunenta wo milot ni kita im wia ung kaayahan léwo' kenu in tarékan.

Efesus 2:2

In toro niitu ni kamu é menou-nou mengiit ang kinanaram né tou wia ung kaayahan, ni kamu mahtali-talinga sé roh léwo' mahkawasa witi langit, ni séramo sé roh mahkawasa witu un até né tou zéi'kan mahtali-talinga si Opo Empung.

1 Timutius 6:17

Ipapagenangla wia sé tou wa'ilan wia ung kaayahan kenu in tia' loozan wo tia' mahéré' wana an zéi'kan mata'u éré'an tanu ung kawa'ilanan. Taan ni séra é mahéré'mola wia si Opo Empung wana ang kawa'ilanan-Na, si mahwéhémé péléng am péléng in toro kaipian.

2 Timutius 4:10

pahpaan si Demas ém paaz uman am wia ung kaayahan kenu wo timula'umoma ni aku. Ni sia é nimangémo witi Tesalonika. Si Kreskes é nimangémo witi Galatia wo si Titus é nimangémo witi Dalmatia.