Markus 3:10 - Taaz Weru Witu u Nunuwu'en Tombulu

¹⁰ Pahpaan lakezo sé tou liné'os-Na, niitumo péléng sé tou saki é mahsésé'sé'an i mahtition wia ni Sia.

Markus 3:10 Iomraidhean Croise

Matius 12:15

Taan kata'uan ni Yesus ang ginenang néra a Sia mondolé im witu. Lakez sé tou mahkiité si Yesus wo ni Sia é mahlé'os sé saki im wia ni séra.

Matius 14:14

I si Yesus timumpamomé im witu u londéi, ileken-Nama sé tou totoz lakez, a mawiamé u raraatéan-Na wia ni séra. A lé'osen-Nala sé tou saki im wia sé tou lakez itii.

Matius 14:36

Ni séra é mahaléi wia si Yesus in énéané zozo' uman i sumahiza witu u rawisna ung karai tonton-Na. Péléng sé tou simahiza u rawisna ung karai tonton-Na é nimalé'os.

Matius 4:23

Si Yesus mahliklik wana péléng an tampa witi Galilea. Ni Sia mahtuzu' wana am walé peraragésan né tou Yahudi wo mahwoka' u Nuwu' Lé'os tumoro ung Kakolanoan ni Opo Empung wo mahlé'os péléng a saki wo a lailai né tou witu.

Markus 5:34

Ang kuan-Na wia si wéwéné itii, “É oki'-Ku, um pa'émanennu u limé'os ni ko. Mangémo karia ung kaluasan witu un até, ni ko én uli-ulit lé'oso!”

Markus 6:56

Wisa uman un angéané ni Yesus, wana am wanua, wana am wanua tua'na kaapa wana am wanua oki', sé tou saki én ipahzeta' néramé wana am pasar a mahaléi wia si Yesus, wo sé tou saki itii toro kiitané zozo' i sumahiz umana u rawisna ung karai tonton-Na. Péléng sé tou simahiza ung karai tonton ni Yesus é nimalé'os.

Markus 8:22

Tumondong niitu, si Yesus karia né pahtuzu'en-Na méikaayola witi Betsaida. A sé tou mahwalima si tou letok wia si Yesus. Ni séra mahaléi wia si Yesus in tumiona wia si tou itii wo sia malé'os.

Lukas 5:3

A si Yesus sumakéla witu u londéi. U londéi itii anu ni Simon. Ikua-Nala wia si Simon u londéi sinakéan-Na in izou'ma oki' im witu un tembir u louz. Sia rumumezla witu londéi itii a mahtuzu' sé tou lakez.

Lukas 6:19

Péléng sé tou lakez itii é mahtututu' in tumiona wia ni Sia, pahpaan wia ni Sia ém wéwéhan ung kawasa u mahondolé i lumé'os ni séra péléng.

Lukas 7:2

Im witu ém wéwéhan si tonaas né sana atus suraro Romawi. Ni sia ém wéwéhan si ata totoz karaaténa. Si ata itii én totoz saki wo tawimo maté.

Lukas 7:21

In toro niitu, lakez sé tou liné'os ni Yesus im wana a saki wo an zézéha néra wo sé sétang simelaz wia sé tou é méiwoho-Na wo sé tou letok ém winangun-Na in toromo mahilek.

Kisah Rasul-rasul 5:15

Lumousé niitu, sé tou saki é méipahondol néramé an ipahwalima witi lalan an ikolo'la witu um wuwuléngan wo sasanih. Winangun néra téntu wo sa si Petrus lumangkoia witu, zozo' u lénona uman én ikatoroma wia sé saki itii.

Ibrani 12:6

Pahpaan sé tou ikararaaté ni Opo Empung ém pahkaupi'an-Na, wo sé tou niéndo-Na in oki'-Na ém pahkakoro'an-Na.”