Lukas 8:48 - Taaz Weru Witu u Nunuwu'en Tombulu

⁴⁸ Ang kuan ni Yesus wia si wéwéné itii, “É oki'-Ku, um pa'émanennu u limé'os ni ko, mangémo karia ung kaluasan witu un até.”

Lukas 8:48 Iomraidhean Croise

Matius 12:20

Um wakélna um wungana ung kuhun um peku'mo én zéi'kan repesen-Na, wo u solo mahpirpirokané én zéi'kan patén-Na. Ni Sia é mangun un zéi'kan mahsanaweka kumala u mahsanaweka.

Matius 8:13

A si Yesus kumuama wia si tonaas né suraro itii, “Mawurimoma wo mamualila wia ni ko tanu um pa'émanennu.” In toro niitukan, si ata ni tonaas né suraro itii é rengan i nimalé'osa.

Matius 9:2

Sé woopira tou nimahwalimé wia si Yesus si tou lailai si méikolo' witu um wuwuléngan. I si Yesus nimilek um pa'émanen néra wia ni Sia, ang kuan-Na wia si tou lailai itii, “É oki'-Ku, enté'ela un atému! A singkéla'mu é niampungano.”

Matius 9:22

Taan si Yesus luméngéma muri wia si wéwéné itii ang kuan-Na, “É oki'-Ku, enté'ela un atému! Um pa'émanennu u limé'os ni ko.” In toro niitukan si wéwéné itii é lé'oso.

Markus 5:34

Ang kuan-Na wia si wéwéné itii, “É oki'-Ku, um pa'émanennu u limé'os ni ko. Mangémo karia ung kaluasan witu un até, ni ko én uli-ulit lé'oso!”

Lukas 17:19

A si Yesus kumuala wia si tou itii, “Rumendaiomé wo mangémo, um pa'émanennu u limé'os ni ko.”

Lukas 18:42

A si Yesus kumuala wia ni sia, “In tarékan ni ko én toromo milek, um pa'émanennu u limé'os ni ko!”

Lukas 7:50

Taan kuan ni Yesus wia si wéwéné itii, “Um pa'émanennu u nimilot ni ko im witu u siningkéla'mu, mangémo karia ung kaluasan witu un até!”

Lukas 8:47

I si wéwéné itii mata'ula um winangunnama éng kata'uan ni Yesus, karia i mahgerger sia kumuruzla ung gio makaz witu un tana' witu u sinaru ni Yesus. A sia sumirita wia sé tou lakez, kaa sia simahiza u rawisna ung karai tonton ni Yesus. Wo méisiritana kasii sa in toro niitukan ni sia é nimalé'osoma.

Kisah Rasul-rasul 14:9

Ni sia é rimumez mahtalinga si Paulus i mahnuwu'. Si Paulus nimileka si tou itii ang kata'uannala i si tou itii é ma'éman wia si Yesus, niitumo ni sia én toro malé'os.

2 Korintus 6:18

Wo ni Aku é maéndo Ama' niou, ni kamu é maéndo koki'-Ku tuama wo koki'-Ku wéwéné. Niitu u Nuwu' ni Mahpiara, ni Sia si kimawasa péléng am péléng.”

Ibrani 4:2

Tanu ni kita ém pinapata'uan u nuwu' makapaazen, téntu kangkasii sé nimaopota ém pinapata'uano u nuwu' makapaazen, taan u nuwu' tinalinga néramo itii én zéi'kan siapa torona im wia ni séra, pahpaan ni séra én zéi'kan ma'éman u nuwu' itii.