Lukas 2:14 - Taaz Weru Witu u Nunuwu'en Tombulu

¹⁴ “U sigi' wo u looz én iwéhé uman wia si Opo Empung si witi kaséndukan! Wo ung kaluasan witu un até wia sé tou wia ung kaayahan, sé mahwangun si Opo Empung mahpaa-paaz.”

Lukas 2:14 Iomraidhean Croise

Matius 21:9

Sé tou lakez mahlampang mahpuuna wo sé mahmurimé wia si Yesus é mahkérét, “Hosana wia si suzu ni Daud! Loozela Sia si niméyé karia u ngaran ni Opo Empung! Hosana witi tampa totoz rakék!”

Lukas 1:79

i mésumena' wia sé tou sé menou-nou witu ung karimbengbengan, wo sé tou kinaindé'an. Ni Sia é mahkit ni kita, wo ni kita menou-nou karia ung kaluasan witu un até.”

Lukas 19:38

Kuan néra, “Loozen ni Sia si méyé ing Kolano karia u ngaran ni Opo Empung, in tarékan sé tou mahlé'o-lé'osano karia ni Opo Empung witi kasendukan, u sigi' wo u looz witi tampa totoz rakék!”

Lukas 2:13

Kumompo'mé si malaekat itii éng kinariamo né malaekat sé totoz lakez witi kasendukan sé mahlooz si Opo Empung, kuan néra,

Lukas 2:15

Kumawusa niitu sé malaekat mawurima witi kasendukan. A sé memimiara domba mahkuaala, “Méyémo kita mangé witi Betlehem i mamilek u nimamuali wana, tanu u méikua ni Opo Empung wia ni kita.”

Lukas 3:22

an tumumpamé witu um wawo-Na si Roh Lenas tanu si bombo. An talingané u nuwu' witi langit, ung kimuamé, “Ni Komo si Oki'-Ku si ikararaaté-Ku, ni Ko si mahwangun un até-Ku i mahpaa-paaz.”

Yohanes 14:27

Ung kaluasan witu un até én itula'u-Kuma wia ni kamu. Ung kaluasan witu un até-Ku én iwéhé-Kuma wia ni kamu. Wo ung kaluasan witu un até u méiwéhé-Kuma itii én zéi'kan masuat karia ung kaluasan witu un até u méiwéhé né wia ung kaayahan wia ni kamu. Tia'mo un até niou masusa wo maindé'.

Yohanes 17:4

Ni Aku é nimapaileko ung kawangko'an ni Ama' im wia sé tou wia ung kaayahan kenu karia i simampeta um paayangen u méiwéhé-Mu wia ni Aku im paayangeng-Ku.

Yohanes 3:16

Pahpaan si Opo Empung totoz rumaraaté péléng sé tou wia ung kaayahan kenu, niitumo ni Sia timambéré si Oki'-Na si esa uman, wo péléng sé tou ma'éman ni Sia zéi'kan maté, taan makailek ung katou-touan makaz ing kauré-uré.

Kisah Rasul-rasul 10:36

Kata'uan niouo u Nuwu' ni Opo Empung u méipapaayo wia sé tou Israel. Ni Sia éng kimua i sé tou é mawurian sumaup karia ni Opo Empung mengiité si Yesus Kristus, si nimaéndo Mahpiara péléng né tou.

Roma 5:1

Pahpaan um pa'émanenta, ni kita é niéndo ulit ni Opo Empung. Niitumo ni kita menou-nou witu u mahlé'o-lé'osan karia ni Opo Empung, mengiité si Mahpiarata, si Yesus Kristus.

Efesus 1:6

Niitumo, ni Sia ém pahloozen pahpaan ung kamang méitambér-Na én totoz wangko'. Niitu méiwéhé-Na wia ni kita mengiité si Yesus Kristus si Oki'-Na si ikararaaté-Na.

Efesus 1:9

Si Opo Empung nimapata'umo ung ginenang-Na u méikawunipé' wia ni kita. Ung ginenang-Na rengané im puuna mengiit um paaz-Na én tinotoz-Na i lekepen mengiité si Kristus.

Efesus 2:4

Taan si Opo Empung én totoz lé'os uman taka-takazan niitu é méipapailek-Na karia in totoz rumaraaté ni kita.

Efesus 2:7

Si Opo Empung mangun niitu, wo in tumondong sé tou toro milek u raraatéan-Na un zéi'mo kakuaan wo u lé'os-Na wia ni kita pahpaan nimaesa karia ni Kristus Yesus.

Filipi 2:11

wo péléng sé tou é makaulit wo kumua, “Si Yesus Kristus é Mahpiara,” karia in téntu si Opo Empung si Ama' é maloozen wo masigi'en.

Filipi 2:13

Si Opo Empung si mahpaayang witu un até niou i mangun ni kamu ing kumiit wo maayang ang kapaaz-Na.

Kolose 1:20

Wo mengiité ni Sia, si Opo Empung nimangun péléng am wia ung kaayahan wo am witi kasendukan é nimalé'osan karia-Na. Si Opo Empung nimangun niitu karia un zaha' ni Kristus u méikasaroi i ni Sia sinalip makaz nimaté.

2 Tesalonika 2:16

Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

Wahyu 5:13

An talingangkumé péléng sé tumou-tou witi kasendukan, wia ung kaayahan, witi lalem un tana', witi tasik wo péléng sé witu é mahkua, “Wia ni Sia si rimumez witu u rurumezan-Na ing Kolano wo wia si Anak ni Domba, u lolooz, u sisigi'an, ung kawangko'an wo ung kawasa makaz ing kauré-uré!”