Lukas 18:12 - Taaz Weru Witu u Nunuwu'en Tombulu

¹² sekez minggu ni aku é makahzuzua i mahpuasa, u sana pahpulu' wana péléng ang kinailekangku ém pahwéhéku wia ni Ko.’

Lukas 18:12 Iomraidhean Croise

Matius 5:20

Niitumo ikua-Kuma wia ni kamu: Sa kamu mahwangun ung kapaaz ni Opo Empung zéi'kan lumousé sé tou tulap un Torat wo sé sana réwok tou Farisi, un ulitna ni kamu én zéi'kan ikauntep witi Kakolanoan ni Opo Empung.”

Matius 6:1

Kuano kasii ni Yesus, “Gena-genangen! An tinotoz witu um pahempungan én tia' uman pahlé'osen niou witu saru-sarun né tou wo niitu ileken néramé. Pahpaan sa téntu, ni kamu én zéi'kan makailek um wawaér ni Ama' niou si witi kasendukan.

Matius 6:16

Kuan kasii ni Yesus, “Sa kamu mahpuasa, tia' ang gio niou ém pahileken in tekur tanu sé tou mahgau-gau lé'os. Pahwangu-wangunen néra ang gio néra, wo sé tou é mileké ni séra kare- gas i mahpuasa. Uli-ulit ikua-Kuma wia ni kamu: Ni séra é nima- kailekola um wawaér wia ni séra.

Matius 6:5

“Sa ni kamu mengaléi én tia' tanu sé tou mahgau-gau lé'os i mengaléi. Ni séra sa mengaléi én totoz paaz mererendai witu un untep am walé peraragésan né tou Yahudi wo wana ang kaéngkolan a lalan, wo séra pahilekené né tou. Uli-ulit ikua-Kuma wia ni kamu: Ni séra é nimakailekola um wawaér wia ni séra.

Matius 9:14

Sé woopira im wia sé pahtuzu'en ni Yohanes Menanarani niméyé wia si Yesus a meligau wia ni Sia, “Kaa kai wo sé sana réwok tou Farisi é mahpuasa, taan sé pahtuzu'en-Nu én zéi'kan?”

Lukas 11:42

Ikaléwo'mo ni kamu sé sana réwok tou Farisi! Pahpaan ni kamu é mahwéhé wia si Opo Empung u sana pahpulu' a lasi, an inggu wo a séndé'en, taan ni kamu é mahsanaweka wo zéi'kan rumaraaté si Opo Empung. Un esa é léwo'zéi' im wangunen, wo am walina ém pahwéhanla genang.

Lukas 17:10

Téntumo kasii ni kamu sa nimaayangola péléng a méiperéntama wia ni kamu, ni kamu éng kumuamola in téntii, ‘Ni kai ndootuu én ata zéi'kan siapa torona pahpaan ni kai é mahpaayang uman a méiperéntama im paayangen nai.’ ”

Roma 3:27

Sa téntu, apa un toro ipahloo-loozta? Zéi'kan siapa! Apa pahpaan am pahwangunenta? Zéi'kan! Ni kita én niéndo ulit zéi'kan pahpaan i nimanguno un ukum Torat taan pahpaan um pa'émanenta.

1 Korintus 1:29

Niitu ém winangun ni Opo Empung wo zéi'kan siapa zozo' in esa uman si tou nimaloozan witu u sinaru-Na.

Galatia 1:14

Tumoro u mahkiit an tinotoz um pa'émanen né tou Yahudi, ni aku é lumousé sé kakaria karenganku sé lakez im wia sé tahsasana wanuaku. Ni aku én uli-ulit mahkiit ang kinanaram né nimaopoku.

Efesus 2:9

Ni kamu méipiloté im witu un ukuman wana a singkéla' zéi'kan pahpaan um pinaayang niou, wo zéi'kan siapa si tou toro lumooz un touna in esa.

1 Timutius 4:8

I mahnanaram un awak wo enté' ém wéwéhan un torona taan toyo' uman. Taan i mahnanaram un tou i mahragés wia si Opo Empung ém wéwéhan torona im wana am péléng, pahpaan niitu é mahalimé ung kamang witu ung katou-touan in tarékan wo in tumondong.