Lukas 15:28 - Taaz Weru Witu u Nunuwu'en Tombulu

²⁸ Kaitalingamé niitu, si koki' tu'a itii é maupi' wo soo muntep. A mondolé si ama'na i mémenou ni sia.

Lukas 15:28 Iomraidhean Croise

Matius 20:11

I ni séra nimakailekomé un zoit itii, ni séra é mahpa'os wo menembu-nembut wia si makauma.

Markus 1:40

Si tou tinoro ung kusta niméyé wia si Yesus. Karia ing kimuruz witu u sinaru-Na si tou itii é mekitulung, kuana, “Sa Ko paaz, ni Ko én toro lumé'osé ni aku.”

Lukas 13:34

É tou Yerusalem, é tou Yerusalem! Ni kamu sé nimunu' sé nabi wo nimahwatumé sé tou méiatu ni Opo Empung i mangé wia ni kamu. Makalakezo ni Aku lumelo i ruméwok ni kamu witu u rété-Ku, tanu si makawali-wali i ruméwok sé sisina witu un tétéwélna, taan ni kamu é soo!

Lukas 15:2

Mileka ni séra, sé tou wia sé sana réwok tou Farisi wo sé tou tulap un Torat, menembu-nembut ang kuan néra, “Si tou kenu, mahsungkul wo mahkan karia né tou memua-muali a singkéla'.”

Lukas 15:27

Si atana itii mingkotla, ‘Si tuarimu é nimawurimomé. Niitumo, si ama'mu éng kimerizla si sapi peranggang rembuz, pahpaan kinailekannamola sumaup si tuarimu wo ni sia é lé'o-lé'os uman.’

Lukas 15:29

Taan si ama'na ém winingkotna umanla, ‘Pahta'unano ni aku mahpaayang wia si ama' wo zéi'kampé' kawisa ni aku soo mahtalinga am perénta ni ama', taan zéi'kampé' kawisa ni aku wéhanla ni ama' zozo' ing kambing uman im péstaangku karia né kakariaku.

Lukas 24:47

Witu u ngaran-Na kangkasii um wowoka' tumoro un tumula'ula a singkéla' wo i si Opo Empung zuméi' a singkéla' én totoz maiwoka'la wia péléng sé tahsasana wanua, rengané witi Yerusalem.

Lukas 5:30

Sé sana réwok tou Farisi wo sé tou tulap un Torat é mema'o-ma'os wia sé pahtuzu'en ni Yesus, a mahkua, “Kaa kamu mahkan wo mahelep karia né menanagi am pajak wo né tou mahsingkéla'?”

Lukas 7:39

I niileka ni tou Farisi si kimua si Yesus a nimamuali itii, witu ung genangna ni sia é mahkua, “Sa Sia ulit nabi, tantumo éng kata'uan-Na am pemangu-mangunen ni wéwéné si timion wia ni Sia. Kata'uan-Na si wéwéné kenu ém wéwéné sangaya.”

Kisah Rasul-rasul 13:45

Taan sé tou Yahudi é mahtéutéu pahpaan nimilekla sé tou lakez itii. Wo péléng an ipahkua ni Paulus ém pahséro'an wo ipahzéi' néra.

Kisah Rasul-rasul 13:50

Taan sé tou Yahudi é mahaker sé wéwéné pahsigi-sigi'en sé maindé' si Opo Empung wo sé tonaas witu um wanua tua'na itii. Ni séra zimézéha si Paulus wo si Barnabas wo nimohomé ni séra zua im witi tana' itii.

Kisah Rasul-rasul 14:19

Méyé sé tou Yahudi sé witi Antiokhia wo Ikonium, mahaker sé tou lakez ing kumiit ni séra. A si Paulus pahweriten néra karia am watu. Pahpaan pahgenangen nérala ni sia é nimatémo, a sia kéhongen néramé méiondolé im witi wanua tua'na.

Kisah Rasul-rasul 14:2

Taan sé tou Yahudi sé soo an ipahwoka' néra zua é mahaker sé tou zéi'kan Yahudi, wo nimangun ni séra maupi' wia sé tou ma'éman.

Roma 10:19

Taan ni aku é meligau sumaup: Apa sé tou Israel zéi'kampé' makatulap u Nuwu' Lé'os itii? Zéi'kan! Pahpaan ing kataré-taré si Musa éng kimuamo u méikua ni Opo Empung, “Ni kamu ém wanguneng-Ku in tuméutéu sé tahsasana wanua walina sé zéi'kan tou-Ku. Wo mangun ni kamu maupi' wia sé tahsasana wanua sé pahgenangen nioula i lemou.”

2 Korintus 5:20

Niitumo, ni kaimo sé méiatu ni Kristus i mahtuzu' un tumoro ni Sia. Mengiité ni kai si Opo Empung mahsésa wia ni kamu. Karia u ngaran ni Kristus, ni kai mahaléi wia ni kamu: Iwéhéla un tou niou i mawurian sumaup karia ni Opo Empung.

1 Tesalonika 2:16

Ni kai ém pahapé-apé'an néra i mahwoka' u Nuwu' ni Opo Empung u milot sé tou zéi'kan Yahudi im witu un ukuman wana a singkéla'. Karia in téntu sé tou Yahudi é mengawe-ngawes a singkéla' néra makaz i malekep wo in tarékan un upi' ni Opo Empung én timoromo ni séra.