Lukas 12:4 - Taaz Weru Witu u Nunuwu'en Tombulu

⁴ Ang kuan kasii ni Yesus, “Ni kamu ing kakaria-Ku, ni kamu én tia' maindé' wia sé tou toro uman munu' un awak niou wo zéi'mo mata'u mangun u lumousé niitu im wia ni kamu.

Lukas 12:4 Iomraidhean Croise

Matius 10:28

Ni kamu én tia' maindé' wia sé tou sé makawawa uman i munu' un awak niou, taan zéi'kan makawawa i munu' si roh niou. Taan maindé'la ni Sia si wéwéhan ung kawasa i munu' un awak wo si roh niou witi naraka.

Yohanes 15:13

Zéi'kan siapa u raraatéan u lumousé ung kenu: si tou nimayo un touna i maté wo sé kakariana toro menou-nou.

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 4:13

Sé tou méikauntep witu u Mahkama Agama é mengusi-ngusingsing i nimilekla si Petrus wo si Yohanes zéi'kan maindé' i mahwingkoté wo ni séra kasii é mata'u i ni séra zua én tou kanaramen wo zéi'kan simikola. Kinata'uan néra kasiila i ni séra zua é mahkii-kiit si Yesus.

Filipi 1:28

Niitumo, ni kamu én tia' maindé' wia sé kakoro' niou. Karia séra i nimilekla ni kamu in zéi'kan maindé', niitu tumuzumé i ni séra é maléwo'en ni Opo Empung, wo im wia ni kamu, niitu én tumuzu'mé i ni kamu én ipilot ni Opo Empung im witu un ukuman wana a singkéla'.

Yakobus 2:23

Karia in téntu, nimalekepola u méipantik witu um Pinantik Lenas in téntii, si Abraham é ma'éman si Opo Empung, wo pahpaan um pa'émanenna itii si Opo Empung éng kimua i ni sia én ulit im witu sinaru-Na. Niitumo, si Abraham ém pahkuan “Kalo ni Opo Empung.”

1 Petrus 3:14

Taan zozo' ni kamu i mendan an zézéha pahpaan i memangu-mangun an ulit, ni kamu é mahpaa-paazola. Tia'mo maindé' kaapa paharétan im wia sé mahzézéha ni kamu.

Wahyu 2:10

Tia'mo maindé' wana an zézéha a léwo'zéi' im pendanen niou. Gena-genangen! Pahpaan i ma'éman ni Aku, sé woopira im wia ni kamu én iuntep ni tonaas né sétang witi bui im pema'wa'en wo zézéhan witu, mapulu'na endo ung kauréna. Taan zozo'pé' in téntu, ni kamu én tia' mazéi' i ma'éman wia ni Aku makaz i maté, wo ni kamu ém wéhang-Ku ung katou-touan makaz ing kauré-uré. Niitu ung kukulu-Ku wia ni kamu.