Lukas 11:26 - Taaz Weru Witu u Nunuwu'en Tombulu

²⁶ A si sétang itii matumawahmé sé sétang pitu walina sé lumouspé'mé ung kaléwo'. A sé sétang itii méyé a sumelazla wia si tou itii. Ing kamurian, u nimamuali wia si tou itii é luméwo'pé'mé i makasa.”

Lukas 11:26 Iomraidhean Croise

Matius 12:45

A si sétang itii mondola, matumawahmé sé sétang pitu walina sé lumouspé'mé ung kaléwo'. A sé sétang itii méyé a sumelazla wia si tou itii. Ing kamurian, u nimamuali wia si tou itii é luméwo'pé'mé i makasa. Téntumo u mamuali wia sé tou léwo' in tarékan.”

Matius 23:15

Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu mahleweta un tasik wo mahliklik ang katanaan i menéro tou zozo' in esa uman ing kumiit um pa'émanen niou. I ni sia mahkiito um pa'émanen niou, ni sia winangun nioula maéndo tou si maiuntep witi naraka, si makazuamé ung kaléwo'an niou.

Lukas 11:25

A sia mawurima witu. Mailekenna, um pinahento'annamé itii ém weresi wo niimek.

Lukas 11:27

Karegas si Yesus i mahnuwu'pé', ang kumérété si wéwéné si esaané im wia ni séra, “Totoz mahpaa-paaz si ina' nimahawa-awaké wo si simusumé ni Ko.”

Yohanes 5:14

Tumondongé, si Yesus nimahilekan karia ni tou itii witi Walé ni Opo Empung ang kumua wia ni sia, “Gena-genangen, ni ko é lé'oso, tia'mo ko memangu-mangunpé' kasii a singkéla', wo ni ko zéi'kan makailek an zézéha lumouspé'mé ung kawutez u nimamuali wia ni ko.”

1 Yohanes 5:16

Sa wéwéhan si tou milekla si katuarina esa pa'émanen mangunla a singkéla' an zéi'kan mangun ni sia i makailek um patéan, ni sia é léwo'zéi' in ipengaléi nioula wia si Opo Empung. Si Opo Empung é méhé ung katou-touan wia si tou si nimangunla a singkéla' itii. Niia kangkasii én tumoro sé tou nimangunla a singkéla' an zéi'kan nimangun ni séra i nimakailek um patéan. Taan wéwéhan u singkéla' u nimangun si tou i nimakailek um patéan. Tumoro niitu, ni aku én zéi'kan kumuama i ni sia é léwo'zéi' in ipengaléi nioula.