Lukas 10:22 - Taaz Weru Witu u Nunuwu'en Tombulu

²² Péléng am péléng é mémoiayo ni Ama'-Ku wia ni Aku. Zéi'kan siapa zozo' in esa si mata'u si Oki', akaz uman si Ama'. Zéi'kan siapa zozo' in esa si mata'u si Ama', akaz uman si Oki' wo sé tou sé kapaaz ni Oki' sé makuaan-Na tumoro si Ama'.”

Lukas 10:22 Iomraidhean Croise

Matius 11:25

In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'.

Matius 11:27

A si Yesus kumua kasiima, “Péléng am péléng é mémoiayo ni Ama'-Ku wia ni Aku. Zéi'kan siapa zozo' in esa si mata'u si Oki', akaz uman si Ama' si mata'u si Oki', wo zéi'kan siapa zozo' in esa si mata'u si Ama', akaz uman si Oki' si mata'u si Ama' wo sé tou pinéléng ni Oki' sé makuaan-Na tumoro si Ama'-Na.

Matius 28:18

A si Yesus rumétéla ni séra ang kumuama, “Péléng ang kawasa witi kasendukan wo wia ung kaayahan é mémoiwéhé wia ni Aku.

Yohanes 1:18

Zéi'kan siapa si tou nimahile-ilekola si Opo Empung, akaz uman si Oki'-Na si esa uman si nimileko si Opo Empung. Si Oki'-Na sekezé é mengari-ngaria si Ama' wo ni Siamo si mahtuzu'mé wia ni kita séi si Opo Empung.

Yohanes 10:15

tanu si Ama' mata'u ni Aku wo ni Aku mata'u si Ama', wo ni Aku mahwéhé ung katou-touang-Ku, wo sé domba-Ku toro menou-nou.

Yohanes 13:3

Si Yesus mata'u i si Ama' é niméhémo péléng am péléng wia ni Sia. Wo ni Sia ém wia si Opo Empung a méyé wo mawuri sumaup wia si Opo Empung.

Yohanes 17:10

Péléng sé méiwéhé wia ni Aku én anu ni Ama', wo péléng an anu ni Ama' én anu-Ku kangkasii, wo ni séramo sé nimapailek ung kawangko'an-Ku.

Yohanes 17:2

Si Ama' é niméhémo ung kawasa wia ni Aku ing kumawasa wia péléng sé tou, wo sé tou méiwéhé-Mu wia ni Aku ém wéhang-Ku ung katou-touan makaz ing kauré-uré.

Yohanes 17:26

Séi si Ama' é mémoikua-Ku wia ni séra, wo niitu én zéi'kan ikana'-Ku im wanguneng-Ku, wo séra mahraa-raatéan tanu si Ama' rumaraaté ni Aku wo ni Aku maesa karia néra.”

Yohanes 17:5

Wo in tarékan, o Ama', ipapaileka ung kawangko'an-Ku in Oki'-Mu, karia ung kawangko'an un anu-Ku karia ni Ama' rengan im puuna, puunala ung kaayahan kenu im winangun.

Yohanes 3:35

Si Ama' é rumaraaté si Oki'-Na wo niméhémo wia ni Sia ung kawasa wana péléng am péléng.

1 Korintus 15:24

In toro niitu ung kaayahan é mazéi'. Péléng sé mahperénta, péléng sé mahkawasa wo péléng ang ketez wia ung kaayahan kenu é léwo'en ni Yesus. Kumawusa niitu, ung kawasa-Na ing Kolano én iayo-Na wia si Opo Empung, si Ama'-Na.

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

Efesus 1:21

Ung kawasa ni Kristus itii é lumouspé'mé sé pemerénta, lumouspé'mé ung kawasa wia ung kaayahan, lumouspé'mé sé tonaas, lumouspé'mé sé tuang wo séi uman sé pahsigi-sigi'en, séra i menou-nou in tarékan kaapa sé mamenou-nou in tumondong.

Ibrani 2:8

pahpaan péléng am péléng é méiwéhé-Mu ing kawasaanna tanu i méiwéhé witu um wawa' um palaz un a'éna.” Pahpaan péléng am péléng é mémoiwéhé-Mu ing kawasaan ni tou, niitu én tumuzu'mé zozo' in esa én zéi'kan siapa an zéi'kan méiwéhémé ing kawasaanna. Taan akaz in tarékan ni kita én zéi'kampé' nimilek péléng am péléng éng kinawasaannamo.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.

2 Yohanes 1:9

Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.