Lukas 10:2 - Taaz Weru Witu u Nunuwu'en Tombulu

² Ang kuan ni Yesus wia ni séra, “An upu'en é lakez taan sé mupu' én toyo' uman. Niitumo, mahaléiola wia si Makauma wo awesan-Namé tou i mémupu'.

Lukas 10:2 Iomraidhean Croise

Matius 20:1

Ang kuan ni Yesus, “Ung Kakolanoan ni Opo Empung én tanu si tou makauma tinaneman anggor, si woondopé' karengan nimondoloma mamenéro tou i mamendu un umana.

Markus 13:34

Niitu é masuat wo si tou timula'u um waléna pahpaan i suméngkot witi zou'. Puunala sia i mangé, um paayangenna é méizéhonama wia sé atana i mahimek um waléna wo timuzu'la um paayangen wia si esa wo si esa. Ni sia kangkasii é nimeréntama sé mahtéiz um pepenet in tuméga-tégamla.

Markus 16:15

Ang kuan-Na wia ni séra, “Mangémo wia péléng ung kaayahan, wo iwoka'la u Nuwu' Lé'os ni Opo Empung wia péléng sé tou.

Markus 16:20

Tumondong niitu, sé pahtuzu'en ni Yesus mangé wana péléng a saruan i mahwoka' wia sé tou u Nuwu' Lé'os tumoro si Yesus. Karegas niitu, si Mahpiara é mahpaayang karia néra mahwangun a makakompo'en i menté' u Nuwu' Lé'os itii.

Lukas 9:1

Si Yesus tumawahmé sé mapulu' wo zua pahtuzu'en-Na, a séra enté'en-Nala am wéhan-Nala ung kawasa i mahwoho sé sétang wo mahlé'os sé tou saki.

Kisah Rasul-rasul 11:19

Kumawusa si Stefanus im winunu', sé katuari esa pa'émanen ém pahzézéhan, a séra tumingkas méikasera wayaan u niangéan. Wéwéhan sé timingkas witi tana' Fenisia, Siprus wo witi Antiokhia. Sé tou timingkas itii é mahwoka' u Nuwu' Lé'os tumoro si Yesus, taan wia uman sé tou Yahudi.

Kisah Rasul-rasul 13:2

I sana endo, i ni séra mahpuasa wo mahragés wia si Mahpiara, a si Roh Lenas numuwu'mé, “I sanapa'mé wia ni Aku si Barnabas wo si Saulus i maayang um papaayangen un tinotoz-Kumo in iwéhé wia ni séra zua.”

Kisah Rasul-rasul 13:4

Pahpaan méiatu ni Roh Lenas, a si Barnabas wo si Saulus mangé witi Seleukia, im witumokan a séra suméngkota witi katanaan Siprus.

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Kisah Rasul-rasul 22:21

Taan kuan ni Tuang wia ni aku, ‘Mangémo, pahpaan ni ko én iatu-Ku i mangé witi tampa zou'ma im wia'i wia sé tou zéi'kan Yahudi.’ ”

Kisah Rasul-rasul 8:4

Sé jamaat méikaserama pahpaan im pahzézéhan itii é mahliklik péléng un tana' itii karia i mahwoka' u Nuwu' Lé'os tumoro si Yesus.

1 Korintus 12:28

Wo wia ni kamu sé jamaat, sé woopira im wia ni kamu ém pinéléng ni Opo Empung i maéndo: kataré, sé tou niéndo aatu ni Yesus, kazua, sé tou niéndo nabi, katelu, sé tou niéndo méster mahtuzu' an tutuzu' ni Mahpiara, wéwéhan sé tou tinambéran u makawawa i mangun u makakompo'en, wéwéhan sé tou tinambéran u makawawa i lumé'os sé tou saki, wéwéhan sé tou tinambéran u makawawa i mahsawang sé tou walina, wéwéhan sé tou tinambéran u makawawa i maéndo tonaas, wo kasii wéwéhan sé tou tinambéran u makawawa i mahnuwu' karia a nunuwu'en walina un akaz uman si Roh Lenas si mata'u.

1 Korintus 15:10

Taan si Opo Empung timambéré ung kamang wia ni aku makaz ni aku in tarékan é niéndo aatu ni Yesus, makaz ung kamang méitambér-Na wia ni aku ém wéwéhan torona. Lumouspé'mé niitu, im wia sé aatu-Na, ni aku si totoz nima'ulit i mahpaayang taan sé aatu walina. Taan am pinaayangku itii, zéi'kan pahpaan ung ketezku in esa, taan pahpaan ung kamang méitambér ni Opo Empung wia ni aku makaz ni aku makawawa i maayang am paayangen itii.

2 Korintus 6:1

Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

Filipi 2:21

Pahpaan sé tou walina é mahpenéro uman um pemandungen néra in esa, zéi'kan um pemandungen ni Kristus Yesus.

Filipi 2:25

Si Epafroditus, si katuari esa pa'émanen, si méiatu nioué i mésumawang maayang kariaku im wana am pemandungengku, ni sia si pahgenangengkula wangun i mawurima sumaup wia ni kamu. Ni sia éng kapaayangku wo nimahtututu'momé i mahpaayang kariaku.

Filipi 2:30

Pahpaan ni sia ém woanokan a maté i mahpaayang wia si Kristus, wo ni sia én zéi'mo mahgenang un touna i mahwuwutul am pemandungengku an zéi'kan mata'u wangunen niou, pahpaan ni kamu én zou'ma im wia ni aku.

Kolose 1:29

Niitumo um pahtututu'engku wo pa'ulitengku im paayangen karia péléng ung ketez u méiwéhémé mengiité ung kawasa ni Kristus u ma'ulit mahpaayang witu un touku.

Kolose 4:12

U sigi' ni Epafras wia ni kamu; ni sia én tou esaané wia ni kamu, ata ni Kristus Yesus, ni sia én zéi'kan mazéi' i mahpengaléi ni kamu, wo ni kamu enté' im wana am pa'émanen, in tanu tou lutu'mo wo uli-ulit ma'éman wo mata'u péléng ang kapaaz ni Opo Empung.

1 Tesalonika 2:9

Katuari-katuari, kagenangan nioupé'la kura kai in totoz mahtututu' wo ma'ulit i mahpaayang. Endo wo wengi ni kai mahpaayang i mahwuwutul am pemandungen nai. Karia in téntu, ni kai én zéi'kan maéndo pengalin niou i mahtuzu' u Nuwu' Lé'os ni Opo Empung wia ni kamu.

1 Tesalonika 5:12

Katuari-katuari, pahaléien nai wia ni kamu, wo ni kamu mahsigi'la sé tou sé nimahtututu'mola mahpaayang im wia ni kamu. Ni séra mahahkit wo mahsésa wia ni kamu, wo menou-nou nimaesa karia ni Mahpiara.

2 Tesalonika 3:1

Ing kamurian katuari-katuari, pahaléien nai wia ni kamu im pahpengaléila kai. Ipengaléi nioula, wo u Nuwu' ni Mahpiara rewek ikawoka'ma wo sungkulen karia i mahpaa-paaz wo pahsigi'en, tanu u nimamualimo wia ni kamu.

1 Timutius 4:10

Pahpaano niitu ni kita mahtututu' wo ma'ulit i mahpaayang, pahpaan ni kita niméré' uman wia si Opo Empung si Menou-nou, si nimilot péléng sé tou im witu un ukuman wana a singkéla', sé pahpuu-puuna é sé tou ma'éman wia ni Sia.

2 Timutius 4:5

Zozo' in téntu, ni ko é léwo'zéi' i mahime-imek un toumu wo ezen im wana an zézéha, ipahwoka'la u Nuwu' Lé'os, wo paayangela a léwo'zéi' im paayangennu wia si Opo Empung.

Filemon 1:1

Um pinantik kenu ém wia ni aku Paulus wo si Timotius si katuarita esa pa'émanen a mangé. Ni aku ém binui pahpaan si Kristus Yesus. Um pinantik kenu én iwéhé wia si Filemon si ikararaaté nai, kapaayang nai

Ibrani 3:6

Taan si Kristus in Oki' ni Opo Empung é si mahwangun a méiatu ni Opo Empung im witu um walé-Na wo ni kitamo um walé-Na itii, sa kita zéi'kan mazéi' in totoz ma'éman wo niméré' uman un iwéhémé ni Opo Empung u mangun ni kita i mahpaa-paaz.

Wahyu 2:1

A si Oki' ni Tou kumuala wia ni aku, “Ipantikmula wo iwéhéma wia si malaekat si wia sé jamaat witi Efesus in téntii: ‘Kenumo u Nuwu' um wia ni Sia a méyé, si timion sé pitu tototi'en karia u lengen-Na kakan wo mahlampang wana am pinaselat am pitu pahto'tolan solo a mas am wangunen a méipenoo-nooz.