Kolose 3:5 - Taaz Weru Witu u Nunuwu'en Tombulu

⁵ Niitumo, zéi'ela im wia ni kamu péléng am paaz i memangu-mangun an ipahkiit uman um paaz ung kaayahan, tanu a mahsamek, a makati'tiren, a lelo léwo' un awak, am paaz i memangu-mangun a léwo'an wo kasii an angkum an tanumokan i mahongkot wo mahsigi' sé opo-opo.

Kolose 3:5 Iomraidhean Croise

Matius 15:19

Pahpaan witu un até mahondolé péléng ang genang léwo', u mahwunu' tou, u mahmuali a sinéro' im pahmualin né zéi'kampé' kimawéng, u mahsamek, u mahremu', u mahkua an zéi'kan ulit tumoro a niilek wo an tinalingana, wo kasii u mahtawuruk.

Roma 1:26

Niitumo ni séra é méiwaya ni Opo Empung ing kinawasa a lelo léwo' un awak néra wana ang kaizangnokané. Taka-takazan sé wéwéné zéi'mo mahwangun an toro uman wangunen né wéwéné wo né tuama, sinawelan néra uman taréla im pahwangunen karia né kawéwéné néra.

Roma 1:29

Ang genang néra é mawuta-wuta an totoz léwo', an zéi'kan wangun, ang kaangkuman wo ang kawuulan, téutéu, mahwunu' sé kasuat tou, mahéndo-éndoan, an tantowo, ang genang léwo' wo mahsirita an zéi'kan wangun tumoro sé tou walina.

Roma 6:13

Tia' un awak niou iwéhé ing kawasaan a singkéla' i mangun a léwo'an. Taan iwéhéla un tou niou wia si Opo Empung, tanu si tou im puuna nimatémo wo in tarékan é nimakaileko ung katou-touan weru, wo iwéhémola un awak niou i mahwangun um paaz ni Opo Empung.

Roma 6:6

Kata'uanta sa ung katou-touanta im puuna é sinalipo pinahwali-wali karia ni Kristus, wo ni kita zéi'mo kinawasa ung kinanaram i mahsingkéla', wo ni kita zéi'kan pahata-atan a singkéla'.

Roma 7:23

Taan am witu un touku ém wéwéhan an tinotoz walina u makahkoro' wo an tinotoz ni Opo Empung ung kapaazku witu ung genangku. Niitu u nimangun ni aku im pahata-atan an tinotoz a singkéla' ang kimawasa un awakku.

Roma 7:5

Pahpaan im puuna ni kita i menou-nou é mahkiitpé' um paaz in tou uman, u lelo i mahwangun a léwo'an ung kimawasa witu un awakta. Kata'uanta niitu é singkéla' pahpaan sinéro' un ukum Torat. Pahpaan i mahwangun niitu ni kita makailek um patéan.

Roma 8:13

Pahpaan, sa ung katou-touan niou é mahkiit ung kapaaz un awak in esa, ni kamu é makailek um patéan. Taan sa ung katou-touan niou é mahkiit ung kapaaz ni Roh Lenas, ni kamu é mahpapaté um pahwangunen un awak niou u mahsingkéla', wo ni kamu é mamenou-nou.

1 Korintus 5:1

Wéwéhan sé tou mahkua, im wia ni kamu in jamaat ém wéwéhan si mahsamek karia ni mahayo ni ama'na si zéi'kan totoz ina'na. An téntu én zéi'kan mahmuali zozo'pé' im wia sé tou sé zéi'kampé' mata'u si Opo Empung.

1 Korintus 6:11

Sé woopira im wia ni kamu im puuna é mahlé'os an téntu. Taan in tarékan ni kamu wineresimo im wana a singkéla' niou, ni kamu é linenas ni Opo Empung wo winangun-Na ni kamu ulit witu u sinaru-Na. Niana péléng ém winangun-Na pahpaan ni kamu nimaesamo karia ni Yesus Kristus si Mahpiara wo karia ung kawasa ni Roh ni Opo Empungta.

1 Korintus 6:13

Wéwéhan sé mahkua kasii, “Ung kakanen wéwéhan torona witu um poot wo um poot wéwéhan torona pahpaan ung kakanen.” Taan si Opo Empung é luméwo' ung kakanen wo um poot. Ni kamu én tia' mahwangun un tou niou i mahsamek, taan wangunela un tou niou i mahwangun uman ang kapaaz ni Opo Empung, pahpaan si Opo Empung si makaanu un toumu.

1 Korintus 6:18

Ma'katla im wana ang kasamekan! Pahpaan si tou mahsamek, ni sia é mahwangun a singkéla' u maluméwo' un touna. Taan sa mahwangun a singkéla' walina, niitu é nimamuali zéi'kan witu un untep un awakna.

2 Korintus 12:21

Ni aku kasii é maindé', sa ni aku méyé sumaup, si Opo Empung mapaiza-izang ni aku witu u sinaru niou makaz un atéku i rumara. Pahpaan, im wia ni kamu é lakezpé' sé memangu-mangunpé' a singkéla' rengan im puuna wo zéi'kampé' timula'u a saparuni, a samek wo mahwangun ang kaizangnokané.

Galatia 5:24

Séi uman sé toumo ni Kristus Yesus, ni sia én zéi'mo mahkiit u lelo un awak i mahwangun a léwo' wo ung genang i mangun a léwo'an. Ni sia é simalipo péléng a lelo un awak i mahwangun a léwo' wo um paaz i mangun a léwo'an.

Efesus 4:19

Ni séra én zéi'mo siapa izangna, taka-takazan séra mahkiit uman u lelo un awak néra wo mahsamek mahkiit um paaz néra.

Kolose 2:11

Pahpaan nimaesamo karia ni Kristus, ni kamu é sinunat. U sunat itii én zéi'kan u sunat um pahwangunen uman né tou, taan u sunat um pahwangunen ni Kristus, u nimangun ni kamu méipiloté im witu ung kawasa u lelo un awak u mahwangun ni kamu i mahsingkéla'.

1 Tesalonika 4:3

Ang kenumo ang kapaaz ni Opo Empung: Ni kamu é menou-nou karia ung kalenasan, zou'mé im wana ang kasamekan.

1 Tesalonika 4:5

Ni kamu én tia' mahkiit uman u lelo léwo' un awak niou, tanu um pahwangunen né tou zéi'kan mata'u si Opo Empung.

1 Timutius 6:10

Pahpaan u megena-genang uman an zoit, niitu u nimangun sé tou mahwangun péléng a léwo'an. Wo pahpaan i megena-genang uman an zoit, sé woopira tou én zéi'mo ma'éman wia si Yesus wo un até néra é rumara pahpaan in zézéha.

Ibrani 12:16

Tia' im wia ni kamu wéwéhan si samek wo zéi'kan mahrékén a méiwéhé ni Opo Empung tanu um pahwangunen ni Esau si nimangkér um wéténg anu ni oki' tu'a pahpaan uman u sana piring kakanen.

Ibrani 13:4

Péléng sé tou é léwo'zéi' i mahsigi'la u mahkawéng wo tia' ung kokolo'an maéndo tampa pahsamekan, pahpaan si Opo Empung é mukum sé samek wo sé tou sangaya.

Ibrani 13:5

Tia' megena-genang uman an zoit wo mahpaa-paazola karia un apa uman um wiamo ni kamu. Pahpaan si Opo Empung éng kimua téntii, “Ni ko én zéi'kan iwaya-Ku wo ni ko én zéi'kan kawisa itula'u-Ku.”

Yakobus 4:1

Wisa a méyé am pahéndo-éndoan wo am pahkoro'an niou? Zéi'kankuaa wana a lelo léwo' un awak niou a mahkoro' i mahkakawasa un tou niou?

1 Petrus 2:11

Katuari-katuari ikararaatéku, ni kamu én tou sé siméngkot wana am wanua né tou walina wo sé limepuh umané wia ung kaayahan. Niitumo, isésakuma wia ni kamu i zumou'la im wana a lelo léwo' un awak, u makahkoro' wo a lelo un até niou wana am wangun.

Wahyu 21:8

Taan sé tou talo, sé zéi'kan ma'éman, sé mahwangun a makati'tiren, sé memumunu' tou, sé tou samek, sé meriara, sé mahongkot wo mahsigi' wia sé opo-opo wo péléng sé tantowo, ni séra péléng én ukumen iwerit witu un tasik api wo walélang melaya-layas. Ung kenumo um patéan kazua.”

Wahyu 22:15

Taan sé tou tanumokan sé asu wo sé meriara, sé samek, sé mahwunu' tou, sé mahongkot wo mahsigi' sé opo-opo, wo sé totoz paaz an towo wo mahwangun niana, zéi'kan toro muntep witu um wanua tua'na itii.