Kolose 3:10 - Taaz Weru Witu u Nunuwu'en Tombulu

¹⁰ Ni kamu in tarékan é nimakaileko ung katou-touan weru wo zéi'kan mazéi' im pahwerun ni Opo Empung si nimanguné ni kamu wo ni kamu maéndo tanu ni Sia. Karia in téntu ni kamu é mata'u ni Sia makauli-ulit.

Kolose 3:10 Iomraidhean Croise

Yohanes 17:3

Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Roma 12:2

Ni kamu én tia'mo mahkii-kiit am pahwangunen né tou wia ung kaayahan, taan iwayamola ung genang lé'os niou im werun ni Opo Empung. Karia in téntu ni kamu én toro makatulap ung kapaaz ni Opo Empung: Am wangun, a mahwangun ni Sia mahpaa-paaz wo zéi'kan siapa pahséro'an.

Roma 13:12

Un orasta i menou-nou wia ung kaayahan én tawimo maapu masuat wo um wengi i maendomo. Un endo si Mahpiara i méyé én zéi'mo uré. Niitumo, kumana'mola i mahwangun a léwo'an tanu am pemangu-mangunen né tou menou-nou wana ang karimbengbengan. Tanu sé suraro nimimeko ang kokoro' i masumaru sé kakoro', ni kita kangkasii é léwo'zéi' i mahwangunla an toro sumawang ni kita i sumaru a léwo'an.

Roma 13:14

Taan méyémo kita maéndo tanu si Yesus Kristus Mahpiara, wo pahilekené né tou am pahwangunenta. Karia in téntu, ni séra én tanu nimilek ni Sia witu un touta. Wo tia'mo megena-genang uman ing kumiit a lelo léwo' un awakmu in esa.

Roma 6:4

Karia in téntu, ni kita é méilewengo karia-Na pahpaan i sinarani, wo tanu si Kristus i méitou sumaup ni Ama' im wia sé nimaté pahpaan ung kawangko'an ni Opo Empung, ni kita kangkasii é menou-nou witu ung katou-touan weru.

Roma 8:29

Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

2 Korintus 3:18

Ni kita péléng sé ma'éman, zéi'mo siapa u nimapé' um pakahgena-genangta. Niitumo, ni kita én toro milek ung kawangko'an ni Mahpiara, ni kita én tanu u lélénoan u sumena'ma ung kawangko'an ni Mahpiara. Si Mahpiara sekezé é mahweru ung katou-touanta makaz ni kita kauréna éng kasena'na i mahsena'ma u sena' ni Mahpiara. Ni Sia si nimangun ni kita nimaténtu, ni Siamo si Roh Lenas.

2 Korintus 4:16

Niitumo, ni kai én zéi'kan mazéi' i mahéré'. Zozo' ung kaenté'an un awak nai kauréna ém pahkainaan, taan si roh nai sekez in endo ém pahwerun.

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

2 Korintus 5:17

Niitumo, séi uman si mahkiit si Kristus, ni sia ém winerumo. Ung katou-touanna én zéi'mo tanu im puuna in zéi'kampé' mahkiit si Kristus. Taan ung katou-touanna ém werumo, un uré é nimazéi'moma wo um weru ém wiamo.

Galatia 3:27

Ni kamu péléng sé sinaranimo karia u ngaran ni Kristus, ung katou-touan niou én tanumo ung katou-touan ni Kristus.

Galatia 6:15

Pahpaan sinunat kaapa zéi'kan sinunat én zéi'kan siapa torona, taan um wéwéhan torona éng katou-touan weru um wia si Opo Empung a méyé.

Efesus 2:10

Pahpaan ni kita ém winangun ni Opo Empung mengiité si Kristus Yesus, i maayang am wangun a niimeko ni Opo Empung im puuna, wo kita toro menou-nou karia i memangu-mangun a lé'os.

Efesus 2:15

Pahpaan, karia ni Sia nimaté witu u salip, ni Sia nimangun un ukum Torat karia péléng an tinotoz wo am perénta witu zinéi'mo. Wo sé tou Yahudi karia né tou zéi'kan Yahudi maéndo tou wineru sé nimaesa im wia si Kristus wo karia um patéan-Na itii, si Kristus nimangun ni séra toro mahlé'o-lé'osan.

Kolose 3:12

Pahpaan nimaéndomo tou pinéléng wo ikararaaté wo linenas ni Opo Empung, niitumo ni kamu é mapailekla u raraatéan, ung kalé'osan, u roros até, ung kaeluzan wo ung kaezenan.

Kolose 3:14

U lumousé péléng niitu é mahraa-raatéanola, pahpaan karia i mahraa-raatéan um pinaesaan niou é malekep.

Filemon 1:6

Ni aku mengaléi, mengalé-ngaléi uman um pahtuarianta in tou ma'éman kenu é mangun ung kata'uanta tumoro péléng am wangun éng kalousna pahpaan nimaesa karia ni Kristus.

Ibrani 6:6

taan maapuma niitu, ni séra soomo ma'éman, zéi'kan mamuali im werun sumaup in tumula'u a singkéla'. Ni séra én tanu simalip sumaup si Oki' ni Opo Empung wo mahséro' wia ni Sia witu u sinaru né tou lakez.

1 Yohanes 2:3

Sa kita mahkiit am perénta ni Opo Empung, niitu én tumuzu'mé i ni kita é mata'u ni Sia.

1 Yohanes 2:5

Taan séi si mahkiit a nuwu' ni Opo Empung, u raraaté ni Opo Empung én uli-ulit lekepo im wia si tou itii. Karia in téntu ni kita én toro mata'ula i ni kita ém wia ni Sia a méyé.

Wahyu 21:5

Ni Sia si rimumez witu u rurumezan-Na ing Kolano éng kimuamé, “Ilekena, péléng am péléng ém pahwerung-Kumo!” Ang kuan-Na wia ni aku, “Ipantikla, pahpaan péléng a méikuama kenu én toro pa'émanen wo ulit.”