Kolose 1:5 - Taaz Weru Witu u Nunuwu'en Tombulu

⁵ Ni kamu é ma'éman wo rumaraaté, pahpaan ni kamu é mahéré'la u niimeko ni Opo Empung wia ni kamu witi kasendukan. Um pahéré'an itii én tinalinga niouo witu u Nuwu' kaulitan, niitumo u Nuwu' Lé'os tumoro si Yesus,

Kolose 1:5 Iomraidhean Croise

Lukas 12:33

Iwangkérola péléng a sangkum niou wo un zoit én iwéhéla wia sé tou zéi'kan siapa apa. Sa téntu um pahwangunen niou, niitu én tanu ni kamu limé'os a sangkum niou witi kasendukan wo niitu én zéi'kan maapu. Niitu én zéi'kan siksiken né meniksik wo zéi'kan siapa si rumemu'.

Kisah Rasul-rasul 10:36

Kata'uan niouo u Nuwu' ni Opo Empung u méipapaayo wia sé tou Israel. Ni Sia éng kimua i sé tou é mawurian sumaup karia ni Opo Empung mengiité si Yesus Kristus, si nimaéndo Mahpiara péléng né tou.

Kisah Rasul-rasul 13:26

Katuari-katuariku suzu ni Abraham wo ni kamu kasii sé maindé' si Opo Empung. U Nuwu' i ni kita én ipilot im witu un ukuman wana a singkéla' é mémoikua ni Opo Empung wia ni kita.

Kisah Rasul-rasul 23:6

Pahpaan kata'uan ni Paulus i sé walina sé méikauntep witu u Mahkamah Agama én tou Saduki wo sé walina kasii é sana réwok tou Farisi, a sia kuméréta, “Katuari-katuari, ni aku én tou Farisi, suzu né tou Farisi. Ni aku méisarumé wia u Mahkamah Agama kenu pahpaan ni aku é ma'éman sa sé tou nimatémo én itou sumaup ni Opo Empung.”

Kisah Rasul-rasul 24:15

Ni aku kasii én tanu ni séra i mahéré' uman wia si Opo Empung in tumou sumaup péléng sé tou nimaté, ni séra in tou ulit kaapa zéi'kan.

Roma 10:8

Taan ung kalakoana tanu u méipantik witu um Pinantik Lenas in téntii: “U Nuwu' ni Opo Empung itii én zéi'kan zou'ma im wia ni kamu, witu u sumahmu wo witu un atému.” Niitu u Nuwu' ni Opo Empung um pahwoka' nai; um pa'émanen né tou.

1 Korintus 13:13

In tarékan, un telu kenu u léwo'zéi' sekezé ém pahwangunenta: ma'éman wia ni Sia, mahéré' uman wia ni Sia wo u raraatéan. Witu un telu itii, un totoz wangko' é raraatéan.

1 Korintus 15:19

Sa um pahéré'anta wia si Kristus én akaz uman witu ung katou-touanta wia ung kaayahan kenu, ni kitamo sé totoz makararaatén im wia péléng sé tou.

2 Korintus 5:19

Ang kenu an ipahwoka' nai: Winangun ni Opo Empung sé tou wia ung kaayahan i mawurian sumaup karia-Na, mengiité si Kristus. Niana im winangun ni Opo Empung, zéi'mo kagenangan-Nala ang kasumalaan pinahwanguné né tou. Ni Sia kasii é niméhé wia ni kai um paayangen mahwoka' u Nuwu' Lé'os i sé tou én toro mawurian sumaup karia-Na.

2 Korintus 6:7

Ni kai é mahtuzu' uman an ulit karia ung kawasa ni Opo Empung. Un ulit pahwangunen nai niitu masuat wo u nimaéndo ipahkoro' i mahsaru sé tou kaapa ing kumelung un tou nai.

Galatia 2:14

I niilekula um pahwangunen néra én zéi'kan maéndoan karia ung kaulitan u Nuwu' Lé'os tumoro si Yesus, a si Petrus kakoro'angkula witu saru-sarun néra péléng, “Sa ko in tou Yahudi menou-nou tanu sé tou zéi'kan Yahudi wo zéi'kan mahkiit ang kinanaram né tou Yahudi, kura kahuman ko toro menutu' mangun sé katuari zéi'kan tou Yahudi in toro menou-nou tanu sé tou Yahudi?”

Galatia 2:5

Taan ni kai én totoz soo ing kumiit ni séra zozo' in tanu uman kauré i mitpita, pahpaan ni kai é soo sa u Nuwu' Lé'os tumoro si Yesus u méituzu' naimo wia ni kamu éng kasemboran karia an tutuzu' zéi'kan ulit pahtuzu' néra.

Galatia 5:5

Pahpaan um pa'émanenta wia si Yesus Kristus, niitumo si Roh Lenas é mahpaayang wia ni kita. Karia in téntu, ni kita é niméré' uman in éndon ulit witu u sinaru ni Opo Empung tanu um pengento-ngento'enta karia in ezen.

Efesus 1:13

Téntu kangkasii ni kamu é nimaéndomo tou ni Opo Empung i ni kamu timalingamola u nuwu' kaulitan um wia si Opo Empung a méyé, niitumo u Nuwu' Lé'os u nimilot ni kamu im witu un ukuman wana a singkéla'. I ni kamu nima'émanola u Nuwu' Lé'os itii, si Opo Empung é niméhémé si Roh Lenas wia ni kamu un tumuzu'mé i ni kamu én tou-Na, mengiit u mémoitaaz-Na.

Efesus 4:21

Pahpaan ni kamu én timalingamo an tumoro ni Sia wo ni kamu i mahkii-kiit ni Sia én tinuzu'mo karia an tutuzu' ulit tumoro si Yesus Kristus.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 1:27

Im wia sé tou-Na, si Opo Empung ém paaz i mapata'u, in totoz wa'ilan wo wangko' a méikawunipé' itii im wia sé tou walina sé zéi'kan Yahudi. U méikawunipé' itii én téntii: Si Kristus ém witumo un até niou, ni Siamo si pahéré'an i makailek u sigi' wo looz ni Opo Empung.

Kolose 3:16

U Nuwu' ni Kristus é léwo'zéi' malake-lakez ing kimawasa witu péléng ung katou-touan niou, taka-takazan karia péléng ung katulapan, ni kamu mahtuzu' wo mahsésésaan si esa wo si esa karia i mahkantar a mazmur wo ang kakantaren lolooz wo ang kakantaren né tou ma'éman, wo mahkua u makasé wia si Opo Empung witu un até niou.

1 Tesalonika 2:13

Wéwéhan kasii u nimangun ni kai zéi'kan kumana' i mahkua u makasé wia si Opo Empung, pahpaan i ni kai mahwoka'mé u Nuwu' ni Opo Empung wia ni kamu, ni kamu é simungkul u Nuwu' itii zéi'kan tanu u nuwu' um wia si tou a méyé, taan u Nuwu' um wia si Opo Empung a méyé. U Nuwu' itii én uli-ulit wia si Opo Empung a méyé, ung karegas i mahpaayang wia ni kamu in tou ma'éman.

2 Tesalonika 2:16

Mengalé-ngaléi uman si Yesus Kristus Mahpiarata wo si Opo Empung Ama'ta, si rimaraatémola ni kita wo nimenté'mola un atéta makaz ing kauré-uré wo nimangunola ni kita ezen i ma'ento' am wangun mengiité ung kamang tatambér-Na,

1 Timutius 1:15

A nuwu' kenu én ulit wo uli-ulit toro pa'émanen: “Si Kristus Yesus i niméyé wia ung kaayahan kenu é mémilot sé tou im witu un ukuman wana a singkéla'.” Wo im wia sé tou nimangun a singkéla', ni akumo si totoz lakez a singkéla'.

2 Timutius 4:8

In tarékan ung kukulu iwéhé wia ni aku é niimeko ni Opo Empung, pahpaan ni aku é nimangunola an ulit witu u sinaru-Na. Ni Sia én zéi'kan mahsanaweka i mahtotoz ulit kaapa zéi'kan am pahwangunen né tou. Zéi'kan uman ni aku si makailek niitu, taan maan péléng sé ma'ento' si Yesus i mawurimé sumaup.

Titus 1:2

An tutuzu' ulit itii én ipahtuzu' nai pahpaan ni kita mahéré'la i makailek ung katou-touan makaz ing kauré-uré. Ung katou-touan makaz ing kauré-uré itii é mémoitaaza ni Opo Empung si zéi'kan mahtowo, rengan ung kaayahan im winangun.

Ibrani 7:19

Pahpaan karia i mahkiit un ukum Torat, zéi'kan siapa zozo' in esa si tou niéndo ulit. Taan in tarékan ni kita ém winéhan um pahéré'an u lumouspé'mé un uré, un toro mangun ni kita ing karéténa wia si Opo Empung.

1 Petrus 2:2

Tanumokan si taré itoumé si sekezé é mekisusu, ni kamu kangkasii é léwo'zéi' im paaz un uli-ulit Nuwu' ni Opo Empung um witi kasendukan a méyé. Pahpaan karia in téntu ni kamu é mahtou wo ipiloté im witu un ukuman wana a singkéla'.

1 Petrus 3:15

Taan sigi'ela si Kristus im witu un até niou pahpaan ni Sia é Mahpiara. Tumégamla i mingkot sa wéwéhan si tou meligau tumoro um pahéré'an niou wia si Kristus. Taan ni kamu i mahwingkot é maheluz umanla wo karia i mahsigi',

2 Petrus 1:12

Pahpaano niitu, niana péléng sekezé én ipapagenangkuma wia ni kamu, zozo' niana péléng éng kata'uan niouo wo an tutuzu' ulit itii én totoz im pa'émanen niouo.

1 Yohanes 3:3

Si tou niméré' un téntu wia ni Sia é limenas un touna tanu si Kristus i lenas.