Kolose 1:10 - Taaz Weru Witu u Nunuwu'en Tombulu

¹⁰ Karia in téntu, ung katou-touan niou ém wangun im witu u sinaru ni Mahpiara wo ni kamu éng kapaaz-Na im wana am péléng wo mua'mé am wangun im wana péléng am pahpaayangen niou, wo kalousna i mata'u tumoro ang kapaaz ni Opo Empung.

Kolose 1:10 Iomraidhean Croise

Yohanes 15:16

Zéi'kan ni kamu sé niméléng ni Aku, taan ni Aku si niméléng ni kamu. Ni Aku nimatu ni kamu wo ni kamu mangé wo mangun lakez am paayangen lé'os wo am wua'na am paayangen niou é memia-mia makaz ing kauré-uré. Karia in téntu, apa uman um pahaléien niou wia si Ama' mengiité u ngaran-Ku, niitu én iwéhé-Na wia ni kamu.

Yohanes 15:8

Sa am pahwua' nioué é lakez, si Ama'-Ku ém pahloozen wo pahsigi'en, wo karia in téntu ni kamu én uli-ulit maéndo pahtuzu'eng-Ku.”

Yohanes 17:3

Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Roma 1:13

Katuari-katuari, ung kapaazku éng kata'uan nioua i ni aku én urémo megena-genang i mangé wia ni kamu, taan makaz in tarékan én zéi'kampé' méikaangémé pahpaan sekezé ém wéwéhan a mahraung. Kapaazku am pinaayangku im wia ni kamu ém wéwéhan torona, tanu am pinaayangku am wéwéhan torona im wia sé tou zéi'kan Yahudi witi tampa walina.

Roma 4:12

Ni sia kasii é niéndo ama' né tou sinunat, sé zéi'kan uman sinunat, taan kangkasii pahpaan ni séra menou-nou karia i ma'éman wia si Opo Empung tanu um pa'émanen ni Abraham, si ama' né nimaopota, puunala sia i sinunat.

Roma 6:4

Karia in téntu, ni kita é méilewengo karia-Na pahpaan i sinarani, wo tanu si Kristus i méitou sumaup ni Ama' im wia sé nimaté pahpaan ung kawangko'an ni Opo Empung, ni kita kangkasii é menou-nou witu ung katou-touan weru.

2 Korintus 2:14

Taan ni aku éng kumuama u makasé wia si Opo Empung, pahpaan ni Sia si nimaéndo tonaas si sekezé én timatér ni kai karia ung kawasa ni Kristus, makaz ni kai toro muntung. Ni kai é méiatu ni Opo Empung wo séra mata'u si Kristus, tanu u mahwou tariis ing kawouanna né tou lakez wisa uman un angéan nai.

2 Korintus 4:6

Im puuna si Opo Empung éng kimua in téntii, “Im witu u rimbengbeng a mondolé un ayah!” In tarékan ni Sia kangkasii si nimangun un ayah-Na mahsena' witu un atéta wo toro kata'uantala ung kawangko'an-Na. Ung kawangko'an ni Opo Empung én toro ilekenta witu ung gio ni Yesus Kristus.

2 Korintus 5:9

Niitumo, ni kai im wiapé' un awak nai wia ung kaayahan kenu kaapa im witumo un awak weru witi kasendukan, ni kai é mahtututu' i sekezé é mahwangun si Mahpiara i mahpaa-paaz.

2 Korintus 9:8

Si Opo Empung makawawa i méhé péléng ang kamang tatambér-Na wo sekezé péléng am pemandungen niou ém pakawutulen. Lumousé niitu, am wia ni kamu é malake-lakez i mangun a lé'os wia sé tou walina.

Efesus 1:17

Ni aku mahaléi wia si Opo Empung si Ama' ni Yesus Kristus Mahpiarata, si pahloozen wo pahsigi'en itii i méhémé wia ni kamu si Roh-Na, si nimangun ni kamu matulap wo si Roh si matumuzu' tumoro si Opo Empung, wo ni kamu karia in ulit mata'u tumoro ni Sia.

Efesus 2:10

Pahpaan ni kita ém winangun ni Opo Empung mengiité si Kristus Yesus, i maayang am wangun a niimeko ni Opo Empung im puuna, wo kita toro menou-nou karia i memangu-mangun a lé'os.

Efesus 4:1

Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

Efesus 4:13

akaz ni kita péléng nimaesaan pahpaan um pa'émanen wo ung kata'uanta un ulit tumoro si Oki' ni Opo Empung. Ni kita maéndo tou uli-ulit lutu'mo sé kauréna éng kalekepna masuat karia ni Kristus.

Efesus 5:10

Mahtututu'la i mahtata'u um paaz ni Opo Empung.

Efesus 5:15

Niitumo, gena-genangen ung katou-touan niou, tia'mo ung katou-touan niou tanu sé tou lemou sé zéi'kan siapa kata'uan tumoro um paaz ni Opo Empung, taan menou-noula tanu sé tou tulap sé mata'umo um paaz ni Opo Empung.

Efesus 5:2

wo menou-noula karia i mahraa-raatéan tanu si Kristus Yesus rimaraatémo ni kamu. Ni Sia nimayomo un tou-Na wia ni kita, nimaté witu u salip i maéndo tanu u raragés wo sé tatamun kineriz in ipahragés a mahwou tariis, u nimangun un até ni Opo Empung mahpaa-paaz.

Filipi 1:11

Ni aku kasii é mengaléi wo kamu toro memangu-mangun an ulit. Si Yesus Kristus uman si toro mangun ni kamu mangun niitu i mahsigi' wo mahlooz si Opo Empung.

Filipi 1:27

Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

Filipi 4:18

In tarékan si Epafroditus é nimahalimomé a raragés méiwéhé nioué wia ni aku, niitumo ni aku nimakailekomé péléng am pemandungengku um wia ni kamu a méyé. Lumouspé'tarémé niitu é malake-lakezo a méiwéhé nioué. A méiwéhé nioué én totoz wangun wo niitu én tanu u raragés mahwou tariis ung kapaaz ni Opo Empung.

Kolose 2:19

Ni séra kangkasii én zéi'mo mahkiit un tutuzu' ni Kristus si tanu ulu im witu un awak, wo un awak é sé tou-Na. Am witu un awak itii ém pahtu'tul-Na wo péléng nimaesa, tanu sé tou-Na in zéi'kan mata'u matampasan. Karia in téntu, kuramo un awak mahtu'amé mengiit ung kapaaz ni Opo Empung, téntumo um pa'émanen niou im wia si Opo Empung éng kaenté'na.

Kolose 2:6

Katuari-katuari, ni kamu é simungkulo si Kristus Yesus, si Mahpiarata. Niitumo ni kamu é léwo'zéi' i menou-nou nimaesa karia-Na.

Kolose 3:20

É kamu sé koki', mahtali-talingala wia sé tu'a niou wana am péléng, pahpaan niitu ung kapaaz ni Mahpiara.

Kolose 4:5

Ni kamu é léwo'zéi' tulap i menou-nou karia né tou zéi'kan ma'éman wo un témpo ém pahpakéla lumé'o-lé'os.

1 Tesalonika 2:12

wo totoz mahaléi wia ni kamu i menou-nou mengiit um paaz ni Opo Empung. Ni Siamo si Opo Empung si timawah ni kamu i muntep witu ung Kakolanoan-Na wo witu ung kawangko'an-Na.

1 Tesalonika 4:1

Ing kamurian katuari-katuari, ni kai é niméhémola ung kékéréan wangun wia ni kamu tumoro kura ung katou-touan niou u mahwangun un até ni Opo Empung mahpaa-paaz. Ni kamu é nimenou-noumola tanu niitu. In tarékan karia ung kawasa ni Yesus Mahpiara, ni kai totoz mahaléi wo menutu' wia ni kamu, wo kamu kalousna mahtututu' i mahwangun si Opo Empung mahpaa-paaz.

2 Timutius 2:4

Si suraro karegas i mahpaayang én zéi'kan megena-genang am pemandungenna walina. Karia in téntu ni sia éng kapaaz ni tonaasna.

Titus 3:1

Titus, ipapagenangmula wia sé jamaat wo séra mahsigi-sigi' wia sé pemerénta wo sé mahkawasa. Ni séra kasii é léwo'zéi' i mahtali-talinga wo paaz i maayang péléng am papaayangen wangun.

Titus 3:14

Wo sé touta kangkasii é léwo'zéi' mahtata'ula i mahpaayang am paayangen wangun i mahwuwutul am pemandungen néra i mendo-endo, wo ung katou-touan néra ém wéwéhan un torona.

Ibrani 11:5

Pahpaan i ma'éman, si Henokh zéi'kan nimendané um patéan wo ni sia ém winénéta ni Opo Empung mangé witi kasendukan, niitumo zéi'kan siapa si nimilek ni sia. Wo puunala sia im winénéta mangé witi kasendukan, si Opo Empung éng kimua i ni sia én ikapaaz-Na.

Ibrani 13:16

Tia' kamu maliuz i mangun a lé'os wo mahsawangla wia sé léwo'zéi' i sawangan, pahpaan am wangun pahlé'osenta wo a sasawangta wia sé tou é raragésta wia si Opo Empung. Si Opo Empung én totoz paaz a raragés tanu niitu.

Ibrani 13:21

Mengalé-ngaléi uman si Opo Empung é sumawang ni kamu i mangun péléng am wangun mengiit un ikapaaz-Na, wo maayang witu ung katou-touanta i mangun ni Sia mahpaa-paaz, mengiité si Yesus Kristus. Wia si Kristus uman u sigi' wo looz makaz ing kauré-uré! Amin.

2 Petrus 1:8

Pahpaan sa kamu zéi'kan mazéi' mahwangun niana péléng, nianamo u sumawang ni kamu i makawawa mahtata'u wo lamata'u si Yesus Kristus Mahpiarata.

2 Petrus 3:18

Taan, ni kamu é mahtututu'la wo kalousna i mé'an ung kamang tatambér ni Yesus Kristus Mahpiara wo si nimilot ni kita im witu un ukuman wana a singkéla'. Mahtututu'la wo ni kamu totoz mata'u ni Sia. U looz wo sigi' ém wia uman ni Sia, in tarékan makaz ing kauré-uré. Amin.

1 Yohanes 3:22

wo apa uman am pahaléienta wia ni Sia éng kailekanta, pahpaan ni kita é mahkiit péléng am perénta-Na wo mahlé'os péléng ang kapaaz-Na.

1 Yohanes 5:20

Kata'uanta kasii i si Oki' ni Opo Empung é niméyémo wo niméhémo ung katulapan wia ni kita. Karia in téntu, ni kita mata'u Si Ulit wo maesa karia Si Ulit pahpaan nimaesa karia si Oki'-Na, si Yesus Kristus. Ni Siamo si Opo Empung, si ulit wo si mahwéhémé ung katou-touan makaz ing kauré-uré.

3 Yohanes 1:6

Ni séra é nimahkuamola a niilek néramé tumoro u raraatéannu witu u saru-sarun né jamaat wia'i. Totoz wangun am pahwangunennu sa ko sumawangla ni séra im wana am pemandungen néra i lumampang. Karia in téntu, ni ko é nimangunola si Opo Empung mahpaa-paaz.