Kisah Rasul-rasul 3:6 - Taaz Weru Witu u Nunuwu'en Tombulu

⁶ Taan si Petrus éng kimuama, “Ni aku én zéi'kan siapa mas kaapa péra'. Taan apa um wia ni aku iwéhéku wia ni ko: Witu u ngaran ni Yesus Kristus si tou Nazaret itii, rumendaiomé wo lumampangoma!”

Kisah Rasul-rasul 3:6 Iomraidhean Croise

Matius 10:9

Ni kamu i mangé én tia' mahalima a mas kaapa am péra' kaapa an tambaga witu um pelélé'osan niou an zoit.

Matius 7:22

Im witu un endo kaakazan ung kaayahan, lakez sé matumawah ni Aku, ‘Tuang, Tuang, ni kai mahkua a méikua-Mumé karia u ngaran-Mu wo mahwoho sé sétang karia u ngaran-Mu wo ni kai kangkasii mahwangun a makakompo'en karia u ngaran-Mu.’

Markus 14:8

Si wéwéné kenu é nimangunola un toro wangunenna. Un awak-Ku kenu ém winéhannamola lana, un tanumokan ni Aku é niimeknamola i mamoileweng.

Markus 16:17

Sé tou ma'éman é mangun a makakompo'en kenu: Moho sé sétang karia u ngaran-Ku, mahnuwu' a nunuwu'en walina an zéi'kampé' pinahnuwu-nuwu' nérala,

Yohanes 19:19

Si Pilatus nimatuma i méhéma witu un atas u salip ni Yesus um papang pinantikan: “Yesus tou Nazaret, Kolano né tou Yahudi”.

Kisah Rasul-rasul 10:38

Kata'uan niouo tumoro si Yesus tou Nazaret. Ni Sia ém winéhan ni Opo Empung si Roh Lenas wo ung kawasa-Na. A Sia lumampang mahliklik wo mahwangun a lé'os wia sé tou wo mahlé'os péléng sé tou sinelazan ni tonaas né sétang pahpaan si Opo Empung é memali-mali karia-Na.

Kisah Rasul-rasul 16:18

Woo pirana endomo si wéwéné itii i mengasa-ngasar téntu. I si Paulus seso'mo a sia luméngéhma muri ang kumua wia si roh si simelaz wia si wéwéné itii, “Karia u ngaran ni Yesus Kristus, mondolé ko im wia si wéwéné itii.” In toro niitukan si roh itii éng kimii-kiit i nimondolé.

Kisah Rasul-rasul 2:22

Ang kuan ni Petrus kasii, “É katuari-katuariku tou Israel! Talingana lé'os un ikuakuma kenu: Si Yesus tou Nazaret itii én tinotoz ni Opo Empung. Niitu én toro pa'ileken im wana a makakompo'en wo an zéi'mo kakuaan wo an tumuzu'mé ung kawasa ni Opo Empung. Niana péléng ém winangun ni Opo Empung wia ni kamu mengiité si Yesus, tanu ung kata'uan niou.

Kisah Rasul-rasul 2:36

Niitumo, ni kamu péléng in tou Israel é léwo'zéi' in totoz mata'ula i si Yesus si salip niouola itii ém winangunola ni Opo Empung maéndo Mahpiara wo Kristus.”

Kisah Rasul-rasul 3:16

In tarékan, pahpaan si tou kata'uan niou wo pengile-ngileken niou kenu ma'éman witu u ngaran ni Yesus, niitumo u Ngaran itii nimangun ni sia nimaenté'. Wo um pa'émanenna itii u nimangun ni sia nimalé'os witu u sinaru niou péléng.

Kisah Rasul-rasul 3:5

Si tou itii rengan nimileka wia ni séra karia i mahéré'la im wéwéhan un iwéhé néramé.

Kisah Rasul-rasul 3:7

A si Petrus tumiona u lengen kakan ni tou itii a sumawanga ni sia i rumendaié. In toro niitukan a maenté'mé an a'é wo am wukuna an a'é ni tou itii.

Kisah Rasul-rasul 4:10

ni kamu wo péléng sé tou Israel é léwo'zéi' i mata'ula, i si tou lailai makarendai witu u sinaru niou kenu é nimalé'osa karia ung kawasa u ngaran ni Yesus Kristus, si tou Nazaret si sinalip niouola itii taan méitoumomé sumaup ni Opo Empung im wia sé nimaté.

Kisah Rasul-rasul 4:7

A si Petrus wo si Yohanes iwali néramé witu um paheruzan né Mahkama Agama im pahtata'un um winangun néra. Tumondong niitu a séra meligau in téntii, “Séi si niméhé ung kawasa wia ni kamu? Kaapa karia u ngaran ni séi kamu i mahwangun péléng niana?”

Kisah Rasul-rasul 9:34

Ang kuan ni Petrus wia ni sia, “Eneas, ni ko é liné'osoma ni Yesus Kristus. Niitumo tumoozomé wo imekenoma un tetekelannu!” In toro niitukan, si Eneas tumoozé.

1 Korintus 4:11

Makaz in endo kenu ni kai é maharem, maré'o, zéi'kan siapa karai sawelen, pahzézéhan wo wayaan uman un ento'an,

2 Korintus 6:10

Ni kai sekezé é mahpaa-paaz zozo' i rumara un até. Ni kai én zéi'kan siapa apa, taan nimangun sé tou lakez nimawa'ilan. Ni kai ém pahileken in zéi'kan siapa apa, taan péléng am péléng ém wia ni kai.

2 Korintus 8:12

Pahpaan sa kamu paaz mahwéhé wo mahwéhé mengiit ung kawawaan niou, si Mahpiara ém paaz i sumungkul a méiwéhé niou. Ni Sia én zéi'kan kawisa mahaléi wia ni kamu i mahwéhé un zéi'kan siapa im wia ni kamu.

2 Korintus 8:9

Ni kamu é mata'umo ung kamang méitambér ni Yesus Kristus si Mahpiarata wia ni kamu. Ni Sia im wa'ilan, winangun-Na un tou-Na zéi'kan siapa apa pahpaan ni kamu, wo kamu toro mawa'ilan pahpaan winangun-Na un tou-Na in zéi'kan siapa apa.

Yakobus 2:5

Katuari-katuari ikararaatéku! Talingana, zéi'kankuaa si Opo Empung é niméléng sé tou sé pahkuan né tou wia ung kaayahan kenu in tou zéi'kan siapa apa, i maéndo tou wa'ilan witu um pa'émanen, wo maéndo tou-Na witi Kakolanoan-Na, tanu u méitaaz-Na wia sé tou rumaraaté ni Sia?

1 Petrus 4:10

Ni kamu si esa wo si esa ém winéhan un tatambér ni Opo Empung. Niitumo ni kamu sé tou lé'os mengimek an tatambér itii, pahimekela lé'os a méitambéré itii i mahsawang sé tou walina.