Kisah Rasul-rasul 2:42 - Taaz Weru Witu u Nunuwu'en Tombulu

⁴² Ni séra én uli-ulit mahtalinga an tutuzu' ipahtuzu' né aatu ni Yesus wo meréwo-réwok. Wo ni séra kasii sekezé é mahkan wo mahmengaléi mahwali-wali.

Kisah Rasul-rasul 2:42 Iomraidhean Croise

Lukas 24:30

I si Yesus rimumezola ing kuman karia néra, Sia méndomé u roti, kumuama u makasé wia si Opo Empung, pemété-météngen-Nala an iwéhé-Nama wia ni séra.

Lukas 24:35

A sé tou zua itii kasii sumirita u nimamuali wia ni séra karegas i mahlampang wo kura si Yesus si Mahpiara i nina'u néramokala i nimeni'a-ni'aula u roti.

Kisah Rasul-rasul 1:14

Ni séra péléng é nimaréwok karia un esa genang i mahmengaléi. Ni séra i mengaléi éng karia né woopira wéwéné, karia ni Maria ina' ni Yesus wo sé katuari ni Yesus.

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 14:22

Im witu, ni séra nimenté' un até né tou ma'éman wo mahsésa wia ni séra in tia' mazéi' i ma'éman wia si Yesus. Ni séra zua kasii mahkua i sé tou sé muntep witi Kakolanoan ni Opo Empung é léwo'zéi' i mendan an zézéha.

Kisah Rasul-rasul 2:46

Wo sekez in endo ni séra én zéi'kan kumana' i meréwo-réwok witi Walé ni Opo Empung wo ni séra én esa genang. Um walé ni esa wo ni esa é mahsasawel im pahangéan néra i mahkan mahwali-wali karia i mahpaa-paaz wo ung genang lé'os.

Kisah Rasul-rasul 20:11

A si Paulus menéka sumaup. Pemété-météngennala u roti ang kuman mahwali-wali. I nimakaapumola, ni sia é nimauré-urépé'ma i nimahnuwu'ma makaz i nimaayahmé. A sia tumula'umé un Troas.

Kisah Rasul-rasul 20:7

In endo kataré witu un duminggu itii, i ni kai nimaréwok mahwali-wali i memété-météng u roti ing kanen, si Paulus é mahnuwu' wia sé katuari esa pa'émanen witu makaz im wengi uré. Pahpaan ni sia éng gimenang i mangémo i masandomé.

Kisah Rasul-rasul 4:23

I si Petrus wo si Yohanes mémoiondolé im witi pengengeruzan itii, a séra mawurima wia sé kakaria néra. An isirita nérala zua a méikuamé né tonaas né walian wo né pahtutu'an né tou Yahudi wia ni séra.

Kisah Rasul-rasul 4:31

Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

Kisah Rasul-rasul 6:4

wo kalousna ni kai mahwéhé genang i mengaléi wo mahtuzu' u Nuwu' ni Opo Empung.”

Roma 12:12

Mahpaa-paazola im wana am pahéré'an, meze-ezen im wana am pengalin wo tia' mahkana' i mahmengaléi.

1 Korintus 10:21

Ni kamu én zéi'kan toro melep witu un eelepan ni Mahpiara wo kasii witu un eelepan né roh léwo'. Ni kamu kasii zéi'kan toro kuman witu um perjamuan ni Mahpiara wo kasii witu um perjamuan né roh léwo'.

1 Korintus 11:2

Ni aku é mahlooz ni kamu in jamaat ni Opo Empung wia ang Korintus pahpaan ni kamu sekezé é mahgenang am pahwangunengku wo mahkiit péleng an tutuzu' méipahtuzu'ku wia ni kamu.

1 Korintus 14:6

Niitumo katuari-katuari, sa aku méyé wia ni kamu wo aku mahnuwu' wia ni kamu karia a nunuwu'en un akaz uman si Roh Lenas si mata'u, tantumo zéi'kan kalakoan niou um pahnuwu'engku itii. Taan tawimo aku mahnuwu' wia ni kamu karia a nunuwu'en un toro kata'uan niou, i mahkua tumoro a méiwunipé' ni Opo Empung, kaapa ang kata'uan, kaapa mahkua wia ni kamu a méikuamé ni Opo Empung wia ni aku, kaapa an tutuzu'.

Galatia 1:6

Ni aku én totoz mengompo' pahpaan ni kamu sé tinawah ni Opo Empung karia ung kamang méitambér ni Kristus én tahlous rewek timamburimé wia si Opo Empung, ang kumiit u nuwu' lé'os tumoro si Yesus un zéi'kan masuat karia un ipahwoka'ku.

Efesus 2:20

Ni kamu sé ma'éman wia si Kristus Yesus én toro pasuaten karia um walé winangun ni Opo Empung. Sé aatu ni Yesus wo sé nabi sé zimeta'ma um watu to'tolan um walé wo um watu to'tolan itii é si Kristus Yesus.

Efesus 6:18

Wangunenola niana péléng karia i mengaléi wia si Opo Empung i sumawang ni kamu. Mengaléila karia ung kawasa ni Roh Lenas sekez in endo, tuméga-tégam wo tia' mahkana' i mengaléi. Tuméga-tégam i mengaléi wo tia'mo mazéi' i mahpengaléi sé tou linenas ni Opo Empung.

Filipi 1:5

Ni aku éng kumua u makasé wia si Opo Empung pahpaan ni kamu simawango ni aku i mahwoka' u Nuwu' Lé'os tumoro si Yesus, rengané in endo ni kamu in taré ma'émanla si Mahpiara makaz in tarékan.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 4:2

Tia' mazéi' i mengaléi wia si Opo Empung wo tuméga-tégamla karia i mahkua u makasé wia si Opo Empung.

2 Timutius 3:14

Taan, ni ko é léwo'zéi' i mahkiitla an tutuzu' ulit a mémoituzu' wia ni ko wo un totozo pa'émanennu, wo tia' kaliuzannu si timuzu' niitu wia ni ko.

Ibrani 10:25

Tia' kita mahzou' im wana am pahréwokan mahwali-wali i mahragés wia si Opo Empung tanu ung kinanaram né tou walina, taan tawimo kita mahsésésaan am wangun pahpaan un endo si Yesus i mawurimé sumaup éng kaleleznamo.

Ibrani 10:39

Ni kita én zéi'kan tanu sé tou timula'umoma ni Sia wo lamaléwo', taan ni kita én tou ma'éman wo maipilot im witu un ukuman wana a singkéla'.

1 Yohanes 1:3

A niilek wo an tinalinga naimo itii én iwoka' nai kasiima wia ni kamu, wo kamu toro maesa karia nai. Wo um pahesa-esaanta ém pahesa-esaan karia ni Ama' wo karia ni Oki'-Na, si Yesus Kristus.

1 Yohanes 1:7

Taan sa kita menou-nou witu un ayah tanu ni Sia ém witu un ayah, ni kita é nimaesa karia né tou walina, wo un zaha' ni Yesus, si Oki'-Na itii é meresi ni kita im wana a singkéla'ta.

1 Yohanes 2:19

Ulit i ni séra ém wia ni kita woan, taan ni séra én zéi'kan uli-ulit méikarékén wia ni kita. Pahpaan sa séra uli-ulit méikarékén wia ni kita, tantumo ni séra é memali-malipé' kariata. Taan niitu é mamuali, wo toro kata'uantala i ni séra péléng én uli-ulit zéi'kan méikarékén wia ni kita.

Yudas 1:20

Taan ni kamu katuari-katuari ikararaatéku, pahimekela ung katou-touan niou karia i mahkiit uman um pa'émanen un totoz lenas wo mengaléila karia ung kawasa ni Roh Lenas.