Kisah Rasul-rasul 19:8 - Taaz Weru Witu u Nunuwu'en Tombulu

⁸ Teluna loloho'en ung kauréna si Paulus i mengangangé witi walé peraragésan né tou Yahudi. Ni sia ém wuaya i mahnuwu' wo mahzéi-zéi'an karia né tou witu, i mahwawangun ni séra wo ma'éman tumoro ung Kakolanoan ni Opo Empung.

Kisah Rasul-rasul 19:8 Iomraidhean Croise

Kisah Rasul-rasul 1:3

Wia sé aatu-Na kenu, kumawusa Sia im pinahzézéhamé makaz nimaté, ni Sia nimapailek un tou-Na un tumuzu'mé i ni Sia én uli-ulit menou-nou. Im witu un epatna pulu' endo, ni Sia é menau-naup i nimapaileka un tou-Na wo nimahnuwu'ma wia ni séra tumoro ung Kakolanoan ni Opo Empung.

Kisah Rasul-rasul 13:14

Wo im witi Perga, si Paulus wo sé kakariana é meméhé-méhé i limampang makaz witi Antiokhia propinsi Pisidia. In endo Sabat ni séra nimuntepa a rumumezla witi walé peraragésan né tou Yahudi.

Kisah Rasul-rasul 13:46

Taan karia im wuaya si Paulus wo si Barnabas mahkua wia sé tou itii, “Ulit u Nuwu' ni Opo Empung é léwo'zéi' in ipuuna iwoka' wia ni kamu in tou Yahudi, taan ni kamu é soo ma'éman. Im witu ung genang niou, ni kamu é mahgenangla un tou niou én zéi'kan wangun i makailek ung katou-touan makaz ing kauré-uré. Niitumo in tarékan ni kamu én itula'u nai i mangé wia sé zéi'kan tou Yahudi i mahwoka' u Nuwu' ni Opo Empung itii.

Kisah Rasul-rasul 14:1

I si Paulus wo si Barnabas méikaayola witi Ikonium, ni séra kasii nimuntepa witu um walé peraragésan né tou Yahudi. Im witu ni séra én totoz ma'ulit i nimahtuzu'mé makaz lakez sé tou Yahudi karia né tou Yunani nima'éman wia si Yesus.

Kisah Rasul-rasul 17:17

Niitumo, im witi walé peraragésan né tou Yahudi ni sia simirita karia né tou Yahudi wo sé tou zéi'kan Yahudi sé maindé' si Opo Empung. Wo sekez in endo im witi pemamangkéran, ni sia mahsirita karia né séi uman sé ipasungkulna.

Kisah Rasul-rasul 18:19

A séra ikaayola witi Efesus. Im witu, si Paulus én timula'umé si Priskila wo si Akwila. Si Paulus mengesama i nimuntepa witu um walé peraragésan né tou Yahudi a sumirita karia né tou Yahudi.

Kisah Rasul-rasul 18:26

Karia im wuaya ni sia rengan i mahtuzu' witi walé peraragésan né tou Yahudi. In tinalingala ni Priskila wo ni Akwila a sia ipahwali nérama mangé witi walé néra. Im witu ni séra én uli-ulit timuzu'la wia ni sia u lalan kura ing kumiit si Opo Empung.

Kisah Rasul-rasul 18:4

Sekez in endo Sabat, si Paulus é mengangangé witi walé peraragésan né tou Yahudi, i mahsirita wo menutu' sé tou Yahudi wo sé tou Yunani i ma'éman wia si Yesus.

Kisah Rasul-rasul 19:10

Zuana ta'un ung kauréna ni sia memamangun un téntu, taka-takazan péléng sé tou mahento' witi Asia én timalinga u Nuwu' ni Mahpiara, ni séra sé tou Yahudi wo sé tou Yunani.

Kisah Rasul-rasul 19:7

Ung kalakez néra péléng ém woo mapulu' wo zua tou.

Kisah Rasul-rasul 19:9

Taan wéwéhan sé woopira tou soo tumalinga wo soo ma'éman. Witu u sinaru né tou lakez, pahséro'an néra uman taré u lalan kura ing kumiit si Mahpiara. Niitumo ni séra é méitula'umé ni Paulus, wo sé tou ma'éman wia si Yesus é méitampasnamé. Sekez in endo ni sia é mahsirita karia néra witi tampa pahtata'uan makangaran Tiranus.

Kisah Rasul-rasul 20:31

Niitumo ni kamu é léwo'zéi' in tuméga-tégam. Gena-genangen, teluna ta'un ung kauréna endo wo wengi ni aku zéi'kan mazéi' i mahsésa wia ni kamu si esa wo si esa karia im pahlué'an.

Kisah Rasul-rasul 28:23

A séra tumotozla un endo i mahilekan sumaup karia ni Paulus. I méikaayomola witu un endo tinotoz itii, totoz lakez sé tou niméyé witi pahwéha-wéhan ni Paulus. Rengan im woondo makaz im wengindo, si Paulus mahtuzu' wo mahsirita wia ni séra tumoro ung Kakolanoan ni Opo Empung. Wo ni sia kasii mahtututu' i mangun sé tou itii ma'éman tumoro si Yesus mengiité un ukum ni Musa wo ang kitap né nabi.

Yudas 1:3

Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.