Kisah Rasul-rasul 13:43 - Taaz Weru Witu u Nunuwu'en Tombulu

⁴³ Kumawusa séra i rimagés, lakez sé tou Yahudi karia né tou zéi'kan Yahudi sé maindé' wia si Opo Empung mahkiit si Paulus wo si Barnabas. Sé zua aatu itii é mahtuzu' wo mahsésa wia ni séra wo séra zéi'kan mazéi' i menou-nou niméré' witu ung kamang tatambér ni Opo Empung.

Kisah Rasul-rasul 13:43 Iomraidhean Croise

Matius 23:15

Ikaléwo'la ni kamu sé tou tulap un Torat wo ni kamu sé sana réwok tou Farisi, é kamu sé tou mahgau-gau lé'os. Pahpaan ni kamu mahleweta un tasik wo mahliklik ang katanaan i menéro tou zozo' in esa uman ing kumiit um pa'émanen niou. I ni sia mahkiito um pa'émanen niou, ni sia winangun nioula maéndo tou si maiuntep witi naraka, si makazuamé ung kaléwo'an niou.

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 13:50

Taan sé tou Yahudi é mahaker sé wéwéné pahsigi-sigi'en sé maindé' si Opo Empung wo sé tonaas witu um wanua tua'na itii. Ni séra zimézéha si Paulus wo si Barnabas wo nimohomé ni séra zua im witi tana' itii.

Kisah Rasul-rasul 14:22

Im witu, ni séra nimenté' un até né tou ma'éman wo mahsésa wia ni séra in tia' mazéi' i ma'éman wia si Yesus. Ni séra zua kasii mahkua i sé tou sé muntep witi Kakolanoan ni Opo Empung é léwo'zéi' i mendan an zézéha.

Kisah Rasul-rasul 14:3

Niitumo, si Paulus wo si Barnabas én urékan oki' i nimahento'mé witu. Wo karia im wuaya ni séra mahnuwu' tumoro si Yesus Mahpiara. Ni Sia nimapailek sa an ipahnuwu' néra tumoro ung kamang tatambér-Na én ulit, karia i niméhé ung kawasa wia ni séra i mahwangun a makakompo'en wo an zéi'kan kakuaan.

Kisah Rasul-rasul 16:14

Si esaané im wia sé wéwéné itii é makangaran Lidia. Ni sia ém witi wanua tua'na Tiatira a méyé, memamangkér a roko' tina' wo meraragés wia si Opo Empung. Si Mahpiara é nimangun ni sia nimatulap makaz ni sia én totoz mahwéhé genang wana an ipahkua ni Paulus.

Kisah Rasul-rasul 17:17

Niitumo, im witi walé peraragésan né tou Yahudi ni sia simirita karia né tou Yahudi wo sé tou zéi'kan Yahudi sé maindé' si Opo Empung. Wo sekez in endo im witi pemamangkéran, ni sia mahsirita karia né séi uman sé ipasungkulna.

Kisah Rasul-rasul 17:34

Taan wéwéhan sé woopira tou kimiita si Paulus, pahpaan ni séra é ma'émano. Im wia ni séra itii ém wéwéhan si tuama esa si tou né dewan witi Areopagus, si makangaran Dionisius. Wo si wéwéné makangaran Damaris wo wéwéhampé' kasii sé walina sé nimengiita ni séra.

Kisah Rasul-rasul 17:4

Sé woopira im wia ni séra é nima'éman ang kumariala si Paulus wo si Silas. Téntu kangkasii, lakez sé tou Yunani sé maindé' si Opo Empung é nima'éman, wo im wia ni séra lakez sé wéwéné ipahkua-kua.

Kisah Rasul-rasul 18:7

A si Paulus mondolé im witu um walé peraragésan itii a mangé witi walé ni Titius Yustus, si maindé' wia si Opo Empung. Um waléna é nimatatéran wo um walé peraragésan né tou Yahudi.

Kisah Rasul-rasul 2:10

Frigia wo Pamfilia, Mesir wo an tana' witi Libia u nimarétéan wo ung Kirene, tou Roma sé limepuhmé,

Kisah Rasul-rasul 28:23

A séra tumotozla un endo i mahilekan sumaup karia ni Paulus. I méikaayomola witu un endo tinotoz itii, totoz lakez sé tou niméyé witi pahwéha-wéhan ni Paulus. Rengan im woondo makaz im wengindo, si Paulus mahtuzu' wo mahsirita wia ni séra tumoro ung Kakolanoan ni Opo Empung. Wo ni sia kasii mahtututu' i mangun sé tou itii ma'éman tumoro si Yesus mengiité un ukum ni Musa wo ang kitap né nabi.

Kisah Rasul-rasul 6:5

A méikuamé itii é niénéala péléng né tou ma'éman. A séra méléngla sé pitu tou kenu: si Stefanus si totoz ma'éman wia si Yesus wo kinawasa ni Roh Lenas, wo si Filipus, si Prokhorus, si Nikanor, si Timon, si Parmenas, wo si Nikolaus si zéi'kan tou Yahudi taan kimiitola um pa'émanen né tou Yahudi, ni sia ém witi Antiokhia a méyé.

Roma 11:6

Ni séra ém pinéléng ni Opo Empung pahpaan ung kamang tatambér-Na, zéi'kan pahpaan am pahwangunen néra é lé'os. Pahpaan sa si Opo Empung niméléng sé tou mengiit um pahwangunen néra, ni Sia én zéi'kan uli-ulit mapailek ung kamang tatambér-Na.

Roma 3:24

Sé tou é niéndo ulit witu u sinaru ni Opo Empung pahpaan ung kamang tatambér-Na. Wo niitu é méitambér umané pahpaan si Kristus Yesus, si timubus ni kita im witu un ukuman wana a singkéla'.

Roma 5:2

Ni kita sé ma'éman ém winéhan u lalan i mé'an ung kamang itambéré ni Opo Empung pahpaan si Yesus Kristus. Ung kamang kenu u nimangun ni kita menou-nou wo mahpaa-paaz pahpaan mahéré'la i makailek u sigi' wo looz ni Opo Empung.

Roma 5:21

Niitumo, im puuna sé tou menou-nou kinawasa u singkéla', niitu kangkasii u nimahwali ni kita witu um patéan. Téntu kangkasii, pahpaan ung kamang méitambér ni Opo Empung éng kimawasa wia ni kita, ni kita é niéndo ulit i makailek ung katou-touan makaz ing kauré-uré, pahpaan si Yesus Kristus Mahpiarata.

2 Korintus 5:11

Kata'uan nai ung kalakoan u maindé' si Mahpiara. Niitumo, ni kai é mahtututu' makaz sé tou zéi'kampé' ma'éman é ma'éman wia si Mahpiara. Totoz kata'uan ni Opo Empung um witu un até nai, niitumo ni kai mengalé-ngaléi maan ni kamu é mata'u am witu un até nai mengiit ung genang lé'os niou.

2 Korintus 6:1

Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

Galatia 5:1

Pahpaan si Kristus si nimanguno ni kita in zéi'mo ata, ni kita én uli-ulit zéi'mo ata. Niitumo, enté-enté'en um pa'émanenta wia ni Sia, wo tia' iwaya niou un tou niou im pahata-atan sumaup un ukum Torat.

Galatia 5:4

Sa kamu mahtututu' in éndon ulit witu u sinaru ni Opo Empung pahpaan i mahkiit un ukum Torat, ung katou-touan niou én zéi'mo méikauntep witu ung kamang tatambér ni Opo Empung.

Efesus 2:8

Pahpaan ung kamang méitambér ni Opo Empung, ni kamu méipiloté im witu un ukuman wana a singkéla' mengiité um pa'émanen niou, zéi'kan pahpaan um winangun niou taan méitambér umané ni Opo Empung.

Filipi 3:16

Un totoz ipahpuu-puuna, ung katou-touanta é mahkiitla an tutuzu' ulit mémoituzu' ni Opo Empung makaz in tarékan.

Filipi 4:1

Pahpaano niitu, katuari-katuari sé ikararaatéku wo pelelo-leloku, sé mahwangun ni aku i mahpaa-paaz wo sé pahloo-loozengku pahpaan ma'émano wia si Kristus, menté-enté' i ma'éman wia si Mahpiara.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 1:28

Si Kristus itiimo si ipahwoka' nai wia si esa wo si esa, i ni kai mahsésa wo mahtuzu' ni séra karia ung katulapan u méiwéhémé ni Opo Empung, i mangun péléng sé tou uli-ulit ma'éman wia si Kristus.

Titus 2:11

Pahpaan si Opo Empung é nimapailekoma ung kamang méitambér-Na i nimilot péléng sé tou im witu un ukuman wana a singkéla'.

Ibrani 12:15

Mile-ilekla wo zéi'kan siapa zozo' in esa im wia ni kamu si kinaliongan ung kamang tatambér ni Opo Empung. Pahpaan sa wéwéhan si téntu, ni sia é maéndo tanu tinanem melangu un toro lumangu sé tou lakez wo mangun sé tou lakez maléwo'.

Ibrani 13:9

Tia' kamu mahkiit péléng an tutuzu' a nimahwali-walinaan an zéi'kan siapa kaulitan mengiit u Nuwu' Lé'os tumoro si Yesus, an ipahtuzu' né tou walina an toro mangun ni kamu ikalulu. Un atéta é léwo'zéi' nienté' karia ung kamang méitambér ni Opo Empung, pahpaan niitumo um wangun, zéi'kan karia an tinotoz tumoro ang kakanen an zéi'kan siapa torona im wia ni séra sé mahkiit niitu.

1 Petrus 5:12

Karia im pinahsawangala ni Silas, ni aku nimantika um pinantik potot uman kenu. Totoz kata'uangku i si Silas kenu éng katuariku esa pa'émanen wo ni sia én toro pahtali-talingan. Um pinantik kenu ém pinantikku wo iwéhékuma i sumésama wo totoz mapagenanga wia ni kamu sa niia én uli-ulit kamang méitambér um wia si Opo Empung a méyé. Totoz in enté'ela um pa'émanen niou im wana ang kamang méitambér ni Opo Empung itii.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

1 Yohanes 2:28

Niitumo in tarékan, é kamu sé oki'ku, ni kamu é léwo'zéi' i menou-nou nimaesa karia ni Kristus, wo sa Sia méyémo sumaup im witu un endo itii, ni kita én zéi'kan maindé' wo zéi'kan maizang wia ni Sia.

2 Yohanes 1:9

Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.