Ibrani 8:3 - Taaz Weru Witu u Nunuwu'en Tombulu

³ Péléng sé Walian Wangko' én tinotozo i mengangali sé tatamun kinerizo wo mahwéhé a raragés wia si Opo Empung. Niitumo, si Yesus, si Walian Wangko'ta é léwo'zéi' im wéwéhan un iragés-Na.

Ibrani 8:3 Iomraidhean Croise

Yohanes 6:51

Ni Akumo u roti mahwéhé ung katou-touan um witi kasendukan an tumumpamé. Sa wéwéhan si tou kumana u roti kenu é mamenou-nou makaz ing kauré-uré. U roti iwéhé-Ku én awak-Ku, u maiwéhé-Ku wo sé tou wia ung kaayahan kenu mamenou-nou.”

Roma 4:25

Ni Sia é méiayo im wunu'en pahpaan a singkéla'ta. Ni Sia é méitou sumaup ni Opo Empung wo kita niéndo ulit ni Opo Empung.

Roma 5:6

I ni kita zéi'kan makawawa i mapapilot un touta in esa im witu un ukuman pahpaan a singkéla', si Kristus nimaté pahpaan ni kita mahsingkéla', witu un oras tinotozo ni Opo Empung.

Roma 5:8

Taan si Opo Empung é mapailek u raraatéan-Na wia ni kita karia ung kenu: I ni kita mahsingkéla'pé', si Kristus é nimaté pahpaan ni kita.

Galatia 2:20

In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

Efesus 5:2

wo menou-noula karia i mahraa-raatéan tanu si Kristus Yesus rimaraatémo ni kamu. Ni Sia nimayomo un tou-Na wia ni kita, nimaté witu u salip i maéndo tanu u raragés wo sé tatamun kineriz in ipahragés a mahwou tariis, u nimangun un até ni Opo Empung mahpaa-paaz.

Titus 2:14

Ni Sia é nimayomola un tou-Na i milot ni kita im wana péléng a léwo'an wo mangun ni kita maéndo tou lenas wo maéndo tou-Na sé zéi'kan mazéi' mahlé'os am wangun.

Ibrani 2:17

Niitumo, wana péléng am péléng ni Sia é léwo'zéi' i maéndo tou uman kasuat né katuari-Na wo ni Sia maéndo Walian Wangko' si totoz rumaraaté wo ni Sia mahwangun péléng a méiatu ni Opo Empung mengiit un ikapaaz-Na im wangunen, i meresi a singkéla' né tou wo séra mawurian sumaup karia ni Opo Empung.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

Ibrani 5:1

Péléng sé Walian Wangko' ém pinéléng im wia sé tou i sumawel sé tou lakez, mapaayo péléng an ipapaayo néra wia si Opo Empung wo maayang i méhé a raragés wo mahali sé tatamun sé kinerizo, sé iragés né tou wia si Opo Empung i mahaléi ampungan wana a singkéla'.

Ibrani 7:27

Ni Sia én zéi'kan tanu sé walian wangko' walina sé sekez in endo é mengangali sé tatamun kinerizo in iragés in zuméi' a singkéla' néra in esa wo taré mangun un téntu in zuméi' a singkéla' né tou. Pahpaan, niitu ém winangun-Namomé makasa uman makaz ing kauré-uré, i ni Sia nimayo un tou-Na in esa i maéndo raragés in zuméi' a singkéla' né tou.

Ibrani 8:4

Sa si Yesus memia-miapé' wia ung kaayahan kenu, ni Sia én zéi'kan maéndo walian, pahpaan wia ung kaayahan kenu ém wéwéhan sé tinotozo i maéndo walian i mahali a raragés, mengiit un ukum Torat.

Ibrani 9:14

apapé' kasii un zaha' ni Kristus mengiité ung kawasa ni Roh Lenas si makaz ing kauré-uré é méiwéhé-Na in esa wia si Opo Empung i maéndo raragés zéi'kan siapa pahséro'an. Un zaha' ni Kristus itii u mangun un atéta weresi im wana am pemangu-mangunen an zéi'kan siapa torona, wo kita toro lumooz wo maayang wia si Opo Empung si menou-nou.