Ibrani 6:20 - Taaz Weru Witu u Nunuwu'en Tombulu

²⁰ Si Yesus si kataré-taré nimuntep witu un tampa itii wo nimuka u lalan wia ni kita wo toro muntep witu. Pahpaano niitu, ni Sia é nimaéndomo Walian Wangko' makaz ing kauré-uré mengiit ung katou-touan wo um pakahpaayang ni Melkisedek im puuna.

Ibrani 6:20 Iomraidhean Croise

Roma 8:34

Si Kristus Yesus si nimaté wo méitou sumaup im wia sé nimaté an irumez witu ung kakan ni Opo Empung, si Kristus itiimo si masumawang ni kita i mamengaléi wia si Opo Empung.

Efesus 1:3

Loozela si Opo Empung, si Ama' ni Yesus Kristus Mahpiarata si timambéré wia ni kita péléng ang kamang witi kasendukan mengiité si Roh Lenas pahpaan nimaesa karia ni Yesus Kristus.

Ibrani 1:3

Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

Ibrani 12:2

Mahweren umana wia si Yesus si mahtu'tul um pa'émanenta wo nimangun um pa'émanenta nimalekep. Ni Sia ezen i nimazézéha witu u salip wo zéi'kan pandungen-Na zozo' niitu makaizangen, ni Sia mahgenang umana u mahpaa-paaz u mapendanen-Na in tumondong. In tarékan ni Sia é rimumezo witu ung kakan u rurumezan ni Opo Empung ing Kolano.

Ibrani 2:10

Si Opo Empung si nimangun péléng am péléng ém wanguno i nimangun si Yesus zéi'kan siapa pahséro'an pahpaan ni Sia é nimazéhamo makaz i nimaté. Karia in téntu, si Yesus é nimaéndo memumuka lalan wo sé tou makailek ung katou-touan makaz ing kauré-uré. Téntu kangkasii, si Opo Empung é nimangun sé tou lakez maéndo oki'-Na taka-takazan pahloozen wo pahsigi'en tanu ni Sia si pahloozen wo pahsigi'en itii.

Ibrani 2:17

Niitumo, wana péléng am péléng ni Sia é léwo'zéi' i maéndo tou uman kasuat né katuari-Na wo ni Sia maéndo Walian Wangko' si totoz rumaraaté wo ni Sia mahwangun péléng a méiatu ni Opo Empung mengiit un ikapaaz-Na im wangunen, i meresi a singkéla' né tou wo séra mawurian sumaup karia ni Opo Empung.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

Ibrani 4:14

Pahpaan kita in tarékan é makaanumo si Walian Totoz Wangko', si nimangémomé witi kasendukan, si Yesus, si Oki' ni Opo Empung, niitumo tio-tionan um pa'émanenta.

Ibrani 5:10

Ni Sia kangkasii én tinawah ni Opo Empung i maéndo Walian Wangko', mengiit ung katou-touan wo um pakahpaayang ni Melkisedek im puuna.

Ibrani 5:6

Witu u rérékénan walina kangkasii si Opo Empung éng kimua, “Ni Ko ém Walian makaz ing kauré-uré, mengiit ung katou-touan wo um pakahpaayang ni Melkisedek im puuna.”

Ibrani 8:1

Un totoz ipahpuu-puuna witu um pahkuaku kenu, ni kita ém wéwéhano si Walian Wangko' téntu, si rimumezo witu ung kakan u rurumezan ni Opo Empung si Kolano Totoz Wangko' witi kasendukan.

Ibrani 9:12

Ni Sia é nimuntepo witi Tampa Totoz Lenas, makasa uman makaz ing kauré-uré. Ni Sia i nimuntep witu én zéi'kan nimahalima un zaha' ni kambing tuama wo un zaha' ni sapi oki', taan ni Sia nimuntep witu nimahalima un zaha'-Na in esa. Karia in téntu, méipilot-Na kita im witu un ukuman wana a singkéla'ta makaz ing kauré-uré.

Ibrani 9:24

Pahpaan si Kristus zéi'kan muntep witi tampa Totoz Lenas um winangun né tou un tanu uman un uli-ulit tampa Totoz Lenas um witi kasendukan, taan si Kristus é nimuntepoma witi kasendukan wo in tarékan ni Sia ém witumo u sinaru ni Opo Empung in tumulung ni kita.

1 Petrus 3:22

In tarékan si Yesus Kristus é nimangémo witi kasendukan a rumumezla witu u rurumezan totoz pahsigi'en witu ung kakan ni Opo Empung. Wo péléng sé malaekat, péléng sé mahkawasa wo péléng ang kaketezan ém witumo ung kawasa ni Yesus Kristus.

1 Yohanes 2:12

É kamu sé koki', ni aku é mantika ang kenu wia ni kamu, pahpaan a singkéla' niou é niampungano pahpaan u ngaran ni Yesus Kristus.