Ibrani 6:19 - Taaz Weru Witu u Nunuwu'en Tombulu

¹⁹ Si pahéré'anta é si Yesus. Ni Sia én tanumokan un jangkar enté' wo méikateptep, pahpaan ni Sia mahenté' um pa'émanenta. Si Yesus nimahpuunamoma i nimangé witu muri u roko' aapé' witi tampa lenas i rumété si Opo Empung in tumubus a singkéla'ta.

Ibrani 6:19 Iomraidhean Croise

Matius 27:51

U roko' méiapé' witi tampa Totoz Lenas witi Walé ni Opo Empung é nimapahzuama witi atas makaz witi wawa'. A méhzo'mé makaz ang kentur watu é nimaweka.

Kisah Rasul-rasul 23:6

Pahpaan kata'uan ni Paulus i sé walina sé méikauntep witu u Mahkamah Agama én tou Saduki wo sé walina kasii é sana réwok tou Farisi, a sia kuméréta, “Katuari-katuari, ni aku én tou Farisi, suzu né tou Farisi. Ni aku méisarumé wia u Mahkamah Agama kenu pahpaan ni aku é ma'éman sa sé tou nimatémo én itou sumaup ni Opo Empung.”

Kisah Rasul-rasul 27:29

Pahapaan i maindé' én taa u londéi tua'na ikarakama am watu witi tasik, ni séra én timumpama un jangkar epat um witi muri u londéi tua'na wo kapaaz néramokan é maendomomé.

Kisah Rasul-rasul 27:40

Owaren nérala an tali méiapus an jangkar an iwaya nérama an jangkar itii méikatenema witi tasik. Owaren nérala an tali a méiapus ung kamudi, am pitaren néra kasiila u layar witi puuna wo u reges toro mahwali u londéi tua'na itii mangé witi tembir un tasik.

Roma 4:16

Niitumo, pahpaan um pa'émanen wia si Opo Empung a makailek un taaz-Na. Un taaz itii é makailekan pahpaan ung kamang méitambéré ni Opo Empung. Niitu é makailekan péléng né suzu ni Abraham, zéi'kan uman sé tou mahkiit un ukum Torat, taan kasii wia sé tou ma'éman tanu um pa'émanen ni Abraham, si ama'ta péléng sé ma'émano.

Roma 4:18

Zozo' ing kata'uan ni Abraham i ni sia én zéi'mo mahéré'la i makailek oki', taan ni sia mahéré' uman wo kasii ma'éman wia si Opo Empung i ni sia é maéndo ama' né tahsasana wanua mengiit u méipantik witu um Pinantik Lenas, “Sé suzumu én totoz malakez.”

Roma 5:4

wo pahpaan ung kaezenan itii a ni kita makailek ung kaenté'an im wana am pema'wa'en wo pahpaan ung kaenté'an im wana am pema'wa'en itii a ni kita makailek um pahéré'an.

1 Korintus 13:13

In tarékan, un telu kenu u léwo'zéi' sekezé ém pahwangunenta: ma'éman wia ni Sia, mahéré' uman wia ni Sia wo u raraatéan. Witu un telu itii, un totoz wangko' é raraatéan.

1 Korintus 15:58

Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.

Efesus 2:6

Wo pahpaan nimaesa karia ni Kristus Yesus, si Opo Empung tumou sumaup ni kita wo kangkasii mangun ni kita mahperénta witi kasendukan karia ni Kristus Yesus.

Kolose 1:27

Im wia sé tou-Na, si Opo Empung ém paaz i mapata'u, in totoz wa'ilan wo wangko' a méikawunipé' itii im wia sé tou walina sé zéi'kan Yahudi. U méikawunipé' itii én téntii: Si Kristus ém witumo un até niou, ni Siamo si pahéré'an i makailek u sigi' wo looz ni Opo Empung.

Kolose 3:1

Niitumo, ni kamu sé méitoumé sumaup karia ni Kristus, mahtututu'la i menéro am witi kasendukan, witi tampa ni Kristus i rimumez witu ung kakan ni Opo Empung.

2 Timutius 2:19

Taan un to'tolan winangun ni Opo Empung én totoz enté', witu um wawona ém pinantikan téntii, “Si Mahpiara én totoz mata'u sé tou anu-Na” wo “Péléng sé tou mahkua i ni sia én anu ni Mahpiara é léwo'zéi' in tumula'ula a léwo'an.”

Ibrani 4:16

Niitumo, tia'mo kita maindé' i rumété wia si Opo Empung si rimumez witu u rurumezan-Na ing Kolano. Pahpaan i ni kita mangé witu u sinaru-Na, si Opo Empung é rumaraaté ni kita, zéi'kan mengiit un zéi'kan enté' wia ni kita, taan mengiit ung kalé'osan-Na. Si Opo Empung én tumambéré ang kamang wo menté' ni kita, wo kita tulungen-Na witu un oras ni kita i mekitulung.

Ibrani 9:3

Im witu un Tampa Lenas itii ém wéwéhan u roko' méiapé' kazua wo witu muri u roko' méiapé' itii ém wéwéhan un tampa pahkuan Tampa Totoz Lenas.

Ibrani 9:7

Taan um witi tampa kazua um pahkuan Tampa Totoz Lenas, si Walian Wangko' uman si toro muntep witu, makasa uman witu u sana ta'un. Ni sia én zéi'kan mata'u muntep witu sa sia zéi'kan mahalima un zaha' né tatamun sé kinerizo in iragés wia si Opo Empung, in zuméi' a singkéla'na in esa wo a singkéla' né tou Israel an zéi'kan pinahtututu' néra im winangun.

1 Petrus 1:3

Loozela si Opo Empung, si Ama' ni Yesus Kristus Mahpiarata. Pahpaan ung kawangko'an u raraatéan-Na makaz ni kita én toro nimakailek ung katou-touan weru mengiité si Yesus Kristus si méitoumé sumaup ni Opo Empung im wia sé nimaté. Niitu u mahenté' um pahéré'anta i menou-nou.