Ibrani 4:2 - Taaz Weru Witu u Nunuwu'en Tombulu

² Tanu ni kita ém pinapata'uan u nuwu' makapaazen, téntu kangkasii sé nimaopota ém pinapata'uano u nuwu' makapaazen, taan u nuwu' tinalinga néramo itii én zéi'kan siapa torona im wia ni séra, pahpaan ni séra én zéi'kan ma'éman u nuwu' itii.

Ibrani 4:2 Iomraidhean Croise

Kisah Rasul-rasul 13:46

Taan karia im wuaya si Paulus wo si Barnabas mahkua wia sé tou itii, “Ulit u Nuwu' ni Opo Empung é léwo'zéi' in ipuuna iwoka' wia ni kamu in tou Yahudi, taan ni kamu é soo ma'éman. Im witu ung genang niou, ni kamu é mahgenangla un tou niou én zéi'kan wangun i makailek ung katou-touan makaz ing kauré-uré. Niitumo in tarékan ni kamu én itula'u nai i mangé wia sé zéi'kan tou Yahudi i mahwoka' u Nuwu' ni Opo Empung itii.

Kisah Rasul-rasul 3:26

Niitumo, si Opo Empung ing kataré-taré én timoumé sumaup si Ata-Na an iatu-Nama i mangé wia ni kamu, wo ni Sia kumamang ni kamu karia i nimangun ni kamu timula'ula péléng a singkéla' niou, a mawuri sumaup wia si Opo Empung.”

Roma 2:25

U sunat ém wéwéhan torona sa kita in tou Yahudi mahkiit un ukum Torat. Taan, sa zéi'kan mahkiit un ukum Torat, im witu u sinaru ni Opo Empung ni kita én tanumokan sé tou zéi'kan Yahudi wo um pahsunaten én zéi'kan siapa torona.

Roma 3:3

Niitumo, kura sa im wia ni séra ém wéwéhan sé zéi'mo ma'éman si Opo Empung? Sa téntu, apa niitumo u mangun si Opo Empung maliuz a méitaaz-Na?

1 Korintus 13:3

Zozo' péléng an anuku ipeméténgkula wia sé tou zéi'kan siapa apa, wo zozo' un awakku iwéhéla i la'ungen, taan sa ni aku zéi'kan rumaraaté sé tou walina, péléng niana én zéi'kan siapa torona.

Galatia 3:2

Amoké ikua nioué wia ni aku: Apa ni kamu é makailek si Roh ni Opo Empung pahpaan mahkiit un ukum Torat kaapa pahpaan ma'éman u Nuwu' Lé'os tumoro si Yesus méipahwoka'ku?

Galatia 3:8

Rengan im puuna toro kata'uanta witu um Pinantik Lenas i si Opo Empung éng gimenang i mangun sé tou zéi'kan Yahudi in éndon-Na ulit pahpaan um pa'émanen néra wia ni Sia. Si Opo Empung é nimapata'umo u Nuwu' Lé'os tumoro si Yesus Kristus wia si Abraham, kuan-Na, “Mengiité ni ko, péléng sé tou wia ung kaayahan éng kamangen.”

Galatia 4:13

Kagenangan nioupé'la ing katé-taré ni aku i nimangémé wia ni kamu a mahwoka' u Nuwu' Lé'os tumoro si Yesus. In toro niitu ni aku é saki.

1 Tesalonika 1:5

Pahpaan u Nuwu' Lé'os tumoro si Yesus un ipahtuzu' nai wia ni kamu én zéi'kan uman karia u nunuwu'en, taan karia ung kawasa ni Roh Lenas wo karia ung kaulitan u Nuwu' Lé'os un totoz kata'uan nai. Kata'uan niouo kura ni kai mahpaayang i mahsawang ni kamu, i ni kai memali-mali karia niou.

1 Tesalonika 2:13

Wéwéhan kasii u nimangun ni kai zéi'kan kumana' i mahkua u makasé wia si Opo Empung, pahpaan i ni kai mahwoka'mé u Nuwu' ni Opo Empung wia ni kamu, ni kamu é simungkul u Nuwu' itii zéi'kan tanu u nuwu' um wia si tou a méyé, taan u Nuwu' um wia si Opo Empung a méyé. U Nuwu' itii én uli-ulit wia si Opo Empung a méyé, ung karegas i mahpaayang wia ni kamu in tou ma'éman.

1 Timutius 4:8

I mahnanaram un awak wo enté' ém wéwéhan un torona taan toyo' uman. Taan i mahnanaram un tou i mahragés wia si Opo Empung ém wéwéhan torona im wana am péléng, pahpaan niitu é mahalimé ung kamang witu ung katou-touan in tarékan wo in tumondong.

Ibrani 11:6

Niitumo, zéi'kan mamuali si tou in ikapaaz ni Opo Empung sa zéi'kan ma'éman wia ni Sia. Pahpaan séi si paaz méyé wia si Opo Empung, totoz pa'émanenna i si Opo Empung én uli-ulit im wia, wo totoz pa'émanenna i ni Sia si mahwéhé um wawaér wia si tou uli-ulit mahtututu' i mahragés wia ni Sia.

Ibrani 3:12

Niitumo katuari-katuari, mile-ilek én taa im wia ni kamu ém wéwéhan zozo' in esa si makaaté u léwo'an wo soo ma'éman taka-takazan nimangun ni sia kimana' i mahtali-talinga wia si Opo Empung si menou-nou.

Ibrani 4:6

Pahpaano niitu, mémoikatuzu'mé im wéwéhan sé woopira sé maikauntep witu un tampa makanaan itii. Taan wia sé nimaopota sé puuna timalinga u nuwu' makapaazen itii, zéi'kan nimuntep witu un tampa makanaan itii, pahpaan ni séra é soo mahtali-talinga wia si Opo Empung.

Yakobus 1:21

Niitumo, itia'la péléng a makazi'zisen wo a léwo' totoz lakez am pemangu-mangunen niou. Wo sungkulela u nuwu' ni Opo Empung u mémoiwéhé witu un até niou karia u roros até. Pahpaan u nuwu' itii ém wéwéhan kawasa i milot ni kamu im witu un ukuman wana a singkéla'.

1 Petrus 1:12

Sé nabi itii éng kinuaan sa am pahtata'un néra én zéi'kan méipapata'u in tumulung uman un tou néra in esa, taan in tumulung ni kamu. Sé nabi itii éng kinawasa ni Roh Lenas si witi kasendukan a méyé i mapata'u u Nuwu' Lé'os tumoro si Yesus wia ni kamu. A méipahtuzu' nérama itiimo ang kapaaz né malaekat im pahtata'un.