Ibrani 2:11 - Taaz Weru Witu u Nunuwu'en Tombulu

¹¹ Si Yesus si limenas sé tou ma'éman wo ni séra sé linenas-Na ém péléng wia si Esa Ama' a méyé, ni Siamo si Opo Empung. Niitumo, si Yesus én zéi'kan maizang i mahkua ni séra ing katuari-Na.

Ibrani 2:11 Iomraidhean Croise

Matius 25:40

Si Kolano itii é mingkot wia ni séra in téntii, ‘Uli-ulit ikua-Kuma wia ni kamu, péléng am winangun niouola wia si esaané im wia sé katuari-Ku sé totoz roros kenu, niitu ém winangun niouola wia ni Aku.’

Matius 28:10

Ang kuan ni Yesus wia ni séra, “Tia'mo maindé'. Mangémo wo maikuala wia sé katuari-Ku wo séra mangé witi Galilea. Im wana ni séra é mamilek ni Aku.”

Markus 3:34

Werenan-Nama péléng sé tou rimumez limiklik ni Sia ang kuan-Na, “Ni kamu kenumo sé ina' wo sé katuari-Ku!

Markus 8:38

Pahpaan im wia sé tou zéi'kan ma'éman wo mahsingkéla' kenu, séi uman si maizang makaulit i mahkii-kiit ni Aku wo pahpaan an ipahkua-Ku, si Oki' ni Tou kangkasii é maizang pahpaan si tou itii, i ni Sia méyé sumaup karia ung kawangko'an ni Ama'-Na kinariamé né malaekat lenas.”

Lukas 9:26

Pahpaan séi uman si maizang makaulit i mahkii-kiit ni Aku wo an ipahkua-Ku, si Oki' ni Tou kangkasii é maizang i makaulit i si tou itii é mahkii-kiit ni Aku wo an ipahtuzu'-Ku, i ni Sia méyé sumaup karia ung kawasa-Na wo ung kawasa ni Ama'-Na wo né malaekat lenas.

Yohanes 17:19

Ni Aku nimayo un tou-Ku i maéndo anu ni Ama' uman pahpaan sé pahtuzu'eng-Ku, wo séra mayo un tou néra wia si Ama' mengiité ung kaulitan u nuwu' ni Ama'.

Yohanes 17:21

Ni Aku mengaléi, wo ni séra péléng maesa, tanu si Ama' nimaesa karia-Ku wo ni Aku nimaesa karia ni Ama'. Wo ni séra kasii nimaesa karia ni Kita, wo sé tou walina wia ung kaayahan kenu ma'éman i si Ama' si nimatumé ni Aku.

Yohanes 20:17

Ang kuan ni Yesus wia ni sia, “Tia' mahtion wia ni Aku, pahpaan ni Aku én zéi'kampé' nimenéka i mangé wia si Ama'. Taan mangémo wia sé katuari-Ku wo ikuala wia ni séra i ni Aku in tarékan é mangémo wia si Ama'-Ku wo Ama' niou, wia si Opo Empung-Ku wo Opo Empung niou.”

Kisah Rasul-rasul 17:26

Im wia si tou esa ni Sia nimangun péléng sé tahsasana wanua wo péléng sé tou i mento' wia ung kaayahan. Ni Sia kasii si timotoz an oras wia ni séra wo kasii timotoz a susupuan am pahwéha-wéhan néra.

Kisah Rasul-rasul 17:28

Pahpaan karia ung kawasa-Na ni kita menou-nou wo mengogé-ngogé wo memia-mia, tanu u méikua né memamantik ang kukuan sé mahento' wia'i, ‘Ni kita péléng é suzu-Na.’

Roma 8:29

Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

Galatia 4:4

Taan sa méikaayomola witu un orasna, si Opo Empung matumé si Oki'-Na si méitoumé ni raraha wo si Koki' itii é menou-nou mahkiit un ukum Torat.

Ibrani 10:10

Pahpaan un ikapaaz ni Opo Empung itiimo, ni kita maéndo tou linenas-Na, i si Yesus Kristus nimayo un tou-Na makasa uman makaz ing kauré-uré i meresi a singkéla' né tou.

Ibrani 10:14

Pahpaan si Yesus Kristus nimaté makasa uman makaz ing kauré-uré i maéndo raragés, ni Sia nimangun sé tou nimaweresi im wana a singkéla', a séra maéndo tou linenas ni Opo Empung.

Ibrani 11:16

Taan in tarékan, ni séra é lumelo un tana' u lumouspé'mé ung kawangunanna, niitu un tana' witi kasendukan. Niitumo si Opo Empung én zéi'kan maizang im pahkuan néra in Opo Empung néra, pahpaan si Opo Empung é nimimeko um wanua tua'na esa wia ni séra.

Ibrani 13:12

Tanu sé tatamun ém pahtunun witi ondol tampa rinendaian né tou Israel an ténda, si Yesus kangkasii é nimazézéha witi ondolé u Yerusalem i lumenas sé tou-Na karia un zaha'-Na in esa.

Ibrani 2:14

Sé koki' sé méiwéhémé ni Opo Empung itii é sé tou uman sé winangun karia u lé'ona wo un zaha'. Niitumo, si Yesus nimaéndo tou uman si winangun karia u lé'ona wo un zaha' tanu sé tou uman sé toro maté. Karia Sia i nimaté, ni Sia éng kimalamoma si tonaas né sétang si kimawasa witu um patéan.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.