Ibrani 13:7 - Taaz Weru Witu u Nunuwu'en Tombulu

⁷ Genangen nioula sé tonaas niou im puuna sé nimahwoka'momé u Nuwu' ni Opo Empung wia ni kamu. Wéhan nioula genang kura ung katou-touan néra makaz ni séra i nimaté wo kéréala um pa'émanen néra.

Ibrani 13:7 Iomraidhean Croise

Matius 24:45

Kuano kasii ni Yesus, “Sa téntu, séi si ata mahtali-talinga wo tulap si éndon ni tuangna i maéndo tonaas né ata walina wo mahwéhé ung kanen wia ni séra witu un oras tinotozo?

Lukas 12:42

Si Yesus mingkotla, “Séi si ata mahtali-talinga wo tulap si éndon ni tuangna i maéndo tonaas né ata walina wo mahimek ung kanen né ata itii in orasnamo ing kuman?

Lukas 5:1

Makasamé si Yesus é rimendai witi tembir u louz Genesaret. Lakez sé tou nimaréwoké mahsésé'sé'an witu rété-Na in tumalinga u nuwu' ni Opo Empung un ituzu'-Na.

Lukas 8:11

Téntii ung kalakoan un aandéan itii: Am watuna tatanemen itii é Nuwu' ni Opo Empung.

Kisah Rasul-rasul 13:46

Taan karia im wuaya si Paulus wo si Barnabas mahkua wia sé tou itii, “Ulit u Nuwu' ni Opo Empung é léwo'zéi' in ipuuna iwoka' wia ni kamu in tou Yahudi, taan ni kamu é soo ma'éman. Im witu ung genang niou, ni kamu é mahgenangla un tou niou én zéi'kan wangun i makailek ung katou-touan makaz ing kauré-uré. Niitumo in tarékan ni kamu én itula'u nai i mangé wia sé zéi'kan tou Yahudi i mahwoka' u Nuwu' ni Opo Empung itii.

Kisah Rasul-rasul 14:23

Sé zua aatu itii kasii én timotozla sé penatua witu un jamaat esa wo jamaat walina. Tumondong niitu, karia i mahpuasa wo mahmengaléi, sé penatua itii méiayola né aatu itii wia si Mahpiara si pa'émanen néra.

Kisah Rasul-rasul 4:31

Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

Roma 10:17

Niitumo, sé tou é ma'éman pahpaan timalinga, wo an tinalinga itii é Nuwu' tumoro si Kristus.

1 Korintus 10:13

Ni kamu ém pahwa'wa'en karia am pema'wa'en ang kinanaram im pahpendanen né tou, un toro pengalin niou. Pahpaan si Opo Empung zéi'kan maliuz wana a méitaaz-Na, niitumo zéi'kan iwaya-Na ni kamu im pema'wa'en karia am pema'wa'en an zéi'kan kawawaan niou. Sekez kamu i mahsaru am pema'wa'en, si Opo Empung é méhé lalan wia ni kamu makaz ni kamu makawawa i mahsaru am pema'wa'en itii.

1 Korintus 11:1

Wangunela um pahwangunengku tanu ni aku i mahwangun um pahwangunen ni Kristus.

1 Korintus 4:16

Niitumo pahaléiengku wia ni kamu, mahkéréla wana am pahwangunengku.

Filipi 3:17

Katuari-katuari, kéréala am pahwangunengku wo pahwéhanla genang sé menou-nou tanu ni kai sé tou toro maéndo kékéréan niou.

1 Tesalonika 1:6

Ni kamu é nimahkérémola wia ni kai wo nimahkérémola wia si Yesus Mahpiara. Zozo' ni kamu én totoz zézéha, ni kamu é simungkul u Nuwu' ni Opo Empung un ipahtuzu' nai wia ni kamu karia u mahpaa-paaz u méiwéhémé ni Roh Lenas.

1 Tesalonika 2:13

Wéwéhan kasii u nimangun ni kai zéi'kan kumana' i mahkua u makasé wia si Opo Empung, pahpaan i ni kai mahwoka'mé u Nuwu' ni Opo Empung wia ni kamu, ni kamu é simungkul u Nuwu' itii zéi'kan tanu u nuwu' um wia si tou a méyé, taan u Nuwu' um wia si Opo Empung a méyé. U Nuwu' itii én uli-ulit wia si Opo Empung a méyé, ung karegas i mahpaayang wia ni kamu in tou ma'éman.

2 Tesalonika 3:7

Pahpaan kata'uan niouo i ni kamu é léwo'zéi' mahkéréla witu ung katou-touan nai. I memali-malipé' karia niou, ni kai én zéi'kan kawisa soo maayang.

2 Tesalonika 3:9

Ni kai mahwangun an téntu zéi'kan pahpaan ni kai én zéi'kan siapa u léwo'zéi' ing kailekan naimé im wia ni kamu, taan ni kai mahtututu' i mahpaayang, wo toro maéndo kékéréan niou.

1 Timutius 3:5

Pahpaan sa sia zéi'kan mata'u mahime-imek sé sana awuna karia im wangun, kura sia i mimek sé jamaat ni Opo Empung?

Ibrani 13:17

Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Ibrani 13:24

Ipapaayopé'la u sigi'ku wia péléng sé tonaas niou wo wia péléng sé tou linenas ni Opo Empung. Sé katuari esa pa'émanen sé wia Italia é mapaayoma u sigi' wia ni kamu.

Ibrani 6:12

Kasoo nai ni kamu i maéndo tou sé soo kumura. Taan ikapaaz nai ni kamu menou-nou tanu sé tou nimakailek u méitaaz ni Opo Empung pahpaan ni séra é ma'éman ni Sia wo pahpaan ung kaezenan néra.

1 Petrus 4:11

Sa wéwéhan tou tinambéran i mahkua u Nuwu' ni Opo Empung wia sé tou, ni sia é léwo'zéi' mahnuwu' mahkiit u Nuwu'-Na. Wo sa wéwéhan si tinambéran i sumawang sé kasuat tou, pahwangunennala niitu karia ung ketez méiwéhémé ni Opo Empung wia ni sia. Niitumo, wangunen nioula lumé'o-lé'os an tatambér itii wo sé tou lumooz wo sumigi' si Opo Empung. Karia in téntu si Opo Empung é loozen wo sigi'en wana péléng am péléng mengiité si Yesus Kristus. Ni Siamo si mahkawasa wo wangun i sigi'en wo loozen makaz ing kauré-uré. Amin.

Wahyu 1:9

Ni aku, Yohanes, katuari niou esa pa'émanen. Ni kita é nimendanomé an zézéha pahpaan i mahkiit si Yesus, méikauntep witi Kakolanoan ni Opo Empung wo ezen ma'ento' si Yesus i mawurimé sumaup. Ni aku é méitia' witi katanaan makangaran Patmos pahpaan mahkua u Nuwu' ni Opo Empung wo a mémoipapata'u ni Yesus.

Wahyu 20:4

An ilekengkuma a rurumezan né kolano wo sé tou rimumez witu ém winéhanna ung kawasa in tumotoz ulit kaapa zéi'kan am pinahlé'osé né tou. Ilekengku kasiima sé roh né tou sé im puuna éng kinetoran an ulu pahpaan i mahkua a niilek wo an tinalinga néra tumoro si Yesus wo kasii pahpaan i mahkua u Nuwu' ni Opo Empung, sé zéi'kan mahongkot wo mahsigi' wia si binatang wo wia si patong ni binatang itii wo sé zéi'kan tinandaan an tungtung wo a lengen néra. Ni séra é méitou sumaup ni Opo Empung, a merénta ing kolano karia ni Kristus sana riwuna ta'un ung kauréna.

Wahyu 6:9

I si Anak ni Domba itii mukama u segel kalima, ilekengkuma um witu um wawa' um pahtunuan a raragés wia si Opo Empung ém wéwéhan sé roh né tou winunu'mo, pahpaan u Nuwu' ni Opo Empung wo pahpaan ang kata'uan néra tumoro a niilek wo tinalinga néra.