Ibrani 13:17 - Taaz Weru Witu u Nunuwu'en Tombulu

¹⁷ Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Ibrani 13:17 Iomraidhean Croise

Lukas 16:2

Niitumo tawahennamé si melélé'os an zoitna itii, ang kuana, ‘Apa itu ulit ung kinatalingaangkula tumoro ni ko? In tarékan ipakakuamumé wia ni aku am pinaayangmu, pahpaan ni ko én zéi'mo toro maéndo melélé'os an zoitku.’

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Roma 14:12

Niitumo, ni kita péléng si esa wo si esa é mamingkot am peligauen ni Opo Empung tumoro am pinahwanguntamé.

1 Korintus 16:16

mahtali-talingala wia sé tou sé tanu ni séra. Ni kamu kasii é mahtali-talingala sé tou sé mahpaayang karia néra, sé totoz ma'ulit mahsawang sé tou ma'éman.

Efesus 5:21

Irorosla un toumu wia si esa wo si esa pahpaan ni kamu mahsigi' si Kristus.

Filipi 1:4

Wo sekez ni aku i mengaléi tumoro ni kamu péléng, ni aku én totoz mahpaa-paaz.

Filipi 2:12

Katuari-katuari ikararaatéku, ni kamu sekezé é mahtali-talinga wia si Opo Empung. Pahwangunela niitu zéi'kan uman i ni aku mahwali-wali karia niou taan kasii i ni aku zéi'kan mahwali-wali karia niou. Ung katou-touan niou ém wangunela tanu ung katou-touan né tou sé méipiloto ni Opo Empung im witu un ukuman wana a singkéla'. Pahwangunela niitu karia i mahtali-talinga wo mahsigi' si Opo Empung.

Filipi 2:16

Ni kamu én tumio-tion witu u Nuwu' ni Opo Empung u mahwéhémé ung katou-touan. Karia in téntu, im witu un endo si Yesus Kristus i mawurimé sumaup, ni aku én toro mahpaa-paaz. Ni aku én toro mahpaa-paaz pahpaan um pinaayangku wo um pahtututu'engku ém wéwéhan torona.

Filipi 2:29

Niitumo, sungkulela sia karia i mahpaa-paaz pahpaan ni sia éng katuari esa pa'émanen wo pahsigi'ela sé tou tanu ni sia.

Filipi 3:18

Pahpaan, tanu u méipengua-nguakumo wia ni kamu wo ikuaku kasiima in tarékan karia i mahamé', i lakez sé tou sé mengua-ngua i ni séra é mahkii-kiit si Yesus Kristus, taan ung katou-touan néra un zéi'kan ulit é nimatamburian karia um winanguna ni Kristus i ni Sia sinalip.

Filipi 4:1

Pahpaano niitu, katuari-katuari sé ikararaatéku wo pelelo-leloku, sé mahwangun ni aku i mahpaa-paaz wo sé pahloo-loozengku pahpaan ma'émano wia si Kristus, menté-enté' i ma'éman wia si Mahpiara.

2 Tesalonika 3:14

Sa wéwéhan tou soo kumiit a méipantik nai witu um pinantik kenu, na'uala si tou itii wo tia' mahkari-karia ni sia wo sia maizangla.

1 Timutius 5:17

Sé penatua sé uli-ulit mahpaayang am papaayangen néra é léwo'zéi' makailek u sisigi'an u makazuamé, lumouspé' kasiimé é sé siga' i mahwoka' u Nuwu' ni Opo Empung wo i mahtuzu' sé jamaat.

Ibrani 13:24

Ipapaayopé'la u sigi'ku wia péléng sé tonaas niou wo wia péléng sé tou linenas ni Opo Empung. Sé katuari esa pa'émanen sé wia Italia é mapaayoma u sigi' wia ni kamu.

Ibrani 13:7

Genangen nioula sé tonaas niou im puuna sé nimahwoka'momé u Nuwu' ni Opo Empung wia ni kamu. Wéhan nioula genang kura ung katou-touan néra makaz ni séra i nimaté wo kéréala um pa'émanen néra.

Yakobus 4:7

Niitumo, iwéhéla un tou niou wo kumiitla si Opo Empung, sarula si tonaas né sétang, wo sia tumingkasé im wia ni kamu.

1 Petrus 5:5

Téntu kangkasii ni kamu im weru tou é léwo'zéi' i mahtali-talingala wia sé tu'a. Wo ni kamu péléng, irorosla un tou niou si esa wo si esa, pahpaan im witu um Pinantik Lenas é méipantik in téntii, “Si Opo Empung é makahkoro' wo sé tou wera', taan sé tou roros até én tambéran-Na ung kamang.”