Ibrani 12:27 - Taaz Weru Witu u Nunuwu'en Tombulu

²⁷ Ung kukuan “Makasapé',” ung kalakoana péléng am winangun ni Opo Empung wia ung kaayahan én iéhzo' wo kemun, taan an zéi'kan nyéhzo' én ikatula'u.

Ibrani 12:27 Iomraidhean Croise

Matius 24:35

U langit wo ung kaayahan é mazéi', taan u Nuwu'-Ku én zéi'kan mahzéi-zéi'la.”

Roma 8:19

Pahpaan péléng sé wia ung kaayahan én totoz melelo i ma'ento' un oras i si Opo Empung mapata'u sé maéndo oki'-Na.

Roma 8:21

Taan wéwéhan um pahéré'an, pahpaan péléng sé wia ung kaayahan én ikapilot im witu ung kawasa u mangun ni séra i léwo'en, wo péléng sé wia ung kaayahan én uli-ulit méikapilot i loozen wo sigi'en karia né oki' ni Opo Empung.

1 Korintus 7:31

Wo sé tou mahpaké uman am pemandungen wia ung kaayahan, tia'mo megena-genang i mahpaké niana, pahpaan ung kaayahan wo péléng am wia ung kaayahan é mazéi'.

Ibrani 1:10

Si Opo Empung kangkasii éng kimua tumoro si Oki'-Na, “Puunala péléng am péléng im winangun, ni Ko Mahpiara, ni Ko é zimeta'moma un to'tolan ung kaayahan, wo u langit ém winangun u lengen-Mu.

Ibrani 13:14

Pahpaan im wia ung kaayahan kenu ni kita én zéi'kan siapa um wanua tua'na um pahento'an makaz ing kauré-uré, taan ni kita é mahpenéro um wanua tua'na ento'anta in tumondong witi kasendukan.

Ibrani 9:11

In tarékan si Kristus é niméyémo im Walian Wangko' si mahalimé péléng am wangun a méitaaz ni Opo Empung wia ni kita. Si Kristus im Walian Wangko' é mahpaayango witi Ténda ni Opo Empung un totoz wangko' wo zéi'kan siapa pahséro'an. Un Ténda itii én zéi'kan winangun né tou; ung kalakoana én zéi'kan wia ung kaayahan um winangun uman kenu a méyé.

Wahyu 11:15

A si malaekat kapitu sumengoma um pontuangna, an talingangkumé a nuwu' totoz rimez witi kasendukan a mahkuamé, “Ung kawasa i mahperénta wia ung kaayahan én anu uman ni Opo Empungta wo ni Kristus si méitaaz-Na, wo ni Sia éng kumawasa ing Kolano makaz ing kauré-uré.”

Wahyu 21:1

An ilekengkuma u langit weru wo un tana' weru, pahpaan u langit kataré wo un tana' kataré é nimazéi'moma, maan kangkasii un tasik é nimazéi'moma.

Wahyu 21:4

Péléng a lué' néra é maisu'en-Na im wana am weren néra. Zéi'mo siapa si maté, zéi'mo siapa si mahpengasi', kaapa mahamé' karia i mahkérét, kaapa mendan u rumara un até. Pahpaan péléng an urémo itii é limangkoioma.”

Wahyu 21:5

Ni Sia si rimumez witu u rurumezan-Na ing Kolano éng kimuamé, “Ilekena, péléng am péléng ém pahwerung-Kumo!” Ang kuan-Na wia ni aku, “Ipantikla, pahpaan péléng a méikuama kenu én toro pa'émanen wo ulit.”