Ibrani 12:24 - Taaz Weru Witu u Nunuwu'en Tombulu

²⁴ Ni kamu kasii mahilekan karia ni Yesus Kristus si nimahalimé un taaz weru u niénéan ni Opo Empung wo karia un zaha'-Na u nimangun sé tou nimaweresi, taka-takazan si Opo Empung niméhé ampungan wana a singkéla' né tou. Niitumo, un zaha' ni Yesus é lumouspé'mé ung kawangunan un zaha' ni Habel. Pahpaan un zaha' ni Habel é méisaroi pahpaan un téutéu.

Ibrani 12:24 Iomraidhean Croise

Matius 23:35

Niitumo, ni kamu én ukumen ni Opo Empung pahpaan am winangun niou wo am winanguné né nimaopo niou i nimahwunu'mé sé tou zéi'kan siapa sinala' rengané wia si Habel, si tou ulit itii makaz wia si Zakharia si oki' ni Berekhya, si winunu' niou witu um pinaselat un tampa lenas wo um pahtunuan a raragés.

Matius 26:28

Pahpaan ung kenumo un zaha'-Ku, un zaha' nimenté' um pinataazan ni Opo Empung, un isaroi wia sé tou lakez i méhé un ampungan wana a singkéla' néra.

Markus 14:24

Ang kuan-Na wia ni séra, “Ung kenumo un zaha'-Ku, u nimenté' um pinataazan ni Opo Empung, un isaroi wia sé tou lakez.

Lukas 11:51

Niitu é rengané wia si Habel im winunu', makaz si Zakharia im winunu' witu um pinaselat um pahtunuan an ipahragés wia si Opo Empung wo um Walé ni Opo Empung. Ni Aku éng kumuama wia ni kamu, ‘Péléng niana é mapenutu'en wia sé tou in tarékan.’

Lukas 22:20

Téntu kangkasii um winangun-Na i nimakaapumola. Ni Sia niméndomé um pengengelepan tinahu'an un anggor ang kumua, “Um pengengelepan kenu ém pinataazan weru ni Opo Empung u nienté' karia un zaha'-Ku, un isaroi wia ni kamu.

Galatia 3:20

Sa wéwéhan tou mangun um pinataazan é léwo'zéi' im wéwéhan si tou sumawang, wo sé zua tou mangun um pinataazan toro masungkul. Taan si Opo Empung zéi'kan memandung si tou i sumawang ni Sia i masungkul karia ni Abraham i mangun um pinataazan pahpaan si Opo Empung in esa si nimangun um pinataazan itii.

1 Timutius 2:5

Pahpaan si Opo Empung én esa uman. Wo esa uman si nimangun sé tou mawurian sumaup karia ni Opo Empung, ni Siamo si Kristus Yesus si tou uman.

Ibrani 10:22

Niitumo, méyémo kita rumété si Opo Empung karia ung genang lé'os wo uli-ulit ma'éman uman wia ni Sia. Pahpaan tanumokan im pinikpikana un zaha' in zuméi' a singkéla', a léwo'an witu un atéta ém wineresimoma ni Yesus wo un awakta én tanu wino'asano karia un zano totoz weresi wo kita toro rumété wia si Opo Empung.

Ibrani 11:28

Pahpaan i ma'éman, si Musa nimatu sé tou Israel i lumé'os un endo wangko' um pahkuan Paskah wo mahpikpika un zaha' wana am pepenet am walé né tou Israel, wo am walé itii én talezen umana ni malaekat um patéan si mahwunu' sé koki' tu'a.

Ibrani 11:4

Pahpaan i ma'éman, si Habel niméhé u raragés wia si Opo Empung u lumouspé'mé ung kawangunan u méiragés ni Kain. Karia in téntu si Opo Empung kimua ni sia én ulit pahpaan u méiragésna én ikapaaz ni Opo Empung. Niitumo, zozo' nimatémoma taan ni sia én toro maéndo kékéréanta tumoro um pa'émanenna.

Ibrani 13:20

In tarékan si Opo Empung si mahwéhémé ung kaluasan witu un até én timoumomé sumaup si Yesus im wia sé nimaté. Si Yesus si Mahpiarata ém winangun ni Opo Empung i maéndo menanatér sé tou-Na, si totoz wangko', tanu si memimiara sé domba, si totoz pahsigi'en. Wo un zaha'-Na é nimangun um pinataazan ni Opo Empung karia né tou makaz ing kauré-uré.

Ibrani 7:22

Niitumo, im witu un tiwa' ni Opo Empung, uli-ulit toro kata'uanta i si Yesus é nimenté' un taaz ni Opo Empung wia ni kita wo un taaz itii é lumouspé'mé un taaz winangun ni Opo Empung karia né nimaopo né tou Israel.

Ibrani 8:13

I si Opo Empung mahkua tumoro um pinataazan weru, ni Sia nimangun um pinataazan puuna én tewuhmo. Wo apa un tu'amo wo tewuhmo é mamomazéi'.

Ibrani 8:6

Taan in tarékan si Yesus ém winéhan um paayangen u lumouspé'mé um paayangen né walian wia ung kaayahan. Pahpaan ni Sia si nimahalimé um pinataazan niénéan ni Opo Empung u lumouspé'mé ung kawangunan um pinataazan méiwéhé wia si Musa im puuna.

Ibrani 8:8

Taan si Opo Empung é nimileko ang kasumalaan né tou Israel a Sia kumua, “Uli-ulit ikua-Kuma! Un orasna é méyé, ni Aku é mangun um pinataazan weru karia né tou Israel wo né tou Yehuda.

Ibrani 9:15

Pahpaano niitu, si Kristus nimahalimé um pinataazan weru niénéan ni Opo Empung wia sé tou. Karia in téntu, péléng sé tinawah ni Opo Empung é makailek ung kamang zéi'kan mahléwo-léwo'la makaz ing kauré-uré u méitaaz-Na, pahpaan si Kristus nimatémo i maér sé tou im witu un ukuman patéan pahpaan péléng a singkéla' néra, i ni séra mahkiitpé' um pinataazan kataré.

Ibrani 9:19

Pahpaan i si Musa nimapata'u péléng un ukum Torat wia sé tou Israel, ni sia é niméndomé un zaha' ni sapi oki' wo un zaha' ni kambing tuama u sinembor karia un zano, an ipahpikpika witu um pinantikan ung kitap Torat wo wia sé tou Israel, nimaké um wuuk rangdang ni domba wo u hisop,

Ibrani 9:21

Téntu kangkasii um pahwangunen ni Musa i nimikpika un zaha' witu un Ténda ni Opo Empung karia péléng am pemamakén i mahragés wia si Opo Empung witu un untep un Ténda itii.

1 Petrus 1:2

Si Opo Empung, Ama'ta é niméléngo ni kamu mengiité ung ginenang-Na rengané im puuna. Si Roh Lenas si limenas ni kamu wo kamu mahwangun ang kapaaz ni Yesus Kristus, wo kamu weresin im wana a siningkéla' niou karia im pinikpikan un zaha'-Na. Mengalé-ngaléi uman ung kamang tatambér ni Opo Empung wo ung kaluasan witu un até é menaté-natér ni kamu.