Ibrani 12:15 - Taaz Weru Witu u Nunuwu'en Tombulu

¹⁵ Mile-ilekla wo zéi'kan siapa zozo' in esa im wia ni kamu si kinaliongan ung kamang tatambér ni Opo Empung. Pahpaan sa wéwéhan si téntu, ni sia é maéndo tanu tinanem melangu un toro lumangu sé tou lakez wo mangun sé tou lakez maléwo'.

Ibrani 12:15 Iomraidhean Croise

Lukas 22:32

Taan ni Aku é nimengaléio ni ko wo um pa'émanennu zéi'kan mazéi'. Wo sa ko mawurimomé sumaup wia ni Aku, ni ko é léwo'zéi' i menté' um pa'émanen né katuarimu.”

1 Korintus 10:12

Niitumo, séi si mahgenangla um pa'émanenna én enté'mo, ni sia é mile-ilek én taa ikakiit uman i mahwangun a singkéla'.

1 Korintus 13:8

U rumaraaté itii én zéi'kan mazéi'. Taan un tatambér u makawawa i mahkua wia sé tou a méikuamé ni Opo Empung é mazéi'. Téntu kangkasii un tatambér u makawawa i mahnuwu' karia a nunuwu'en un akaz uman si Roh Lenas si mata'u ung kalakoan niitu é mazéi'. Wo un tatambér i lakez ang kata'uan é mazéi'.

1 Korintus 15:33

Tia' kamu ikalulu: mahkari-karia wana an zéi'kan wangun é luméwo' ang kinanaram wangun.

1 Korintus 5:6

Ni kamu én zéi'kan wangun im wera'. Kata'uan niouo ung kukuan kenu, “U ragi toyo' é mangun um wangunen roti i sumegahmé.”

2 Korintus 13:5

Amoké wa'wa'en nioula un tou niou, wo kata'uan nioula sa ni kamu én uli-ulit ma'éman wia si Kristus kaapa zéi'kan. Pahtata'ula un até niou, ni kamu én uli-ulit mata'u i si Kristus Yesus ém witu un até niou kaapa zéi'kan! Pahpaan sa kamu zéi'kan uli-ulit mahkiit si Kristus, um pa'émanen niou én zéi'kan malekep im pema'wa'en.

2 Korintus 6:1

Ni kai éng kapaayang ni Opo Empung, niitumo ni kai sumésama wia ni kamu, tia' ung kamang méitambér ni Opo Empung ung kinailekan niouo én zéi'kan siapa torona.

Galatia 2:13

Sé woopira tou Yahudi walina kangkasii éng kimiita um winangunna ni Petrus i mahgau-gau lé'os. Taka-takazan si Barnabas kangkasii é méikakiita ni séra i mahgau-gau lé'os.

Galatia 5:4

Sa kamu mahtututu' in éndon ulit witu u sinaru ni Opo Empung pahpaan i mahkiit un ukum Torat, ung katou-touan niou én zéi'mo méikauntep witu ung kamang tatambér ni Opo Empung.

Efesus 5:3

Taan a samek wo a memua-muali a sinéro' im pahmualin né zéi'kampé' kimawéng, kaapa a malo'it, zozo' niitu in inuwu' uman én tia' im wia ni kamu. An téntu é sinéro' in ipahkua né tou linenas ni Opo Empung.

Kolose 3:5

Niitumo, zéi'ela im wia ni kamu péléng am paaz i memangu-mangun an ipahkiit uman um paaz ung kaayahan, tanu a mahsamek, a makati'tiren, a lelo léwo' un awak, am paaz i memangu-mangun a léwo'an wo kasii an angkum an tanumokan i mahongkot wo mahsigi' sé opo-opo.

Titus 1:15

Wia sé tou ung katou-touan néra ém weresi, péléng am wia ni sia ém weresi, taan wia sé tou makati'tiren wo sé tou zéi'kan ma'éman, zéi'kan siapa zozo' in esa um weresi. Pahpaan ung genang wo un até néra é makazi'zisen.

Ibrani 3:12

Niitumo katuari-katuari, mile-ilek én taa im wia ni kamu ém wéwéhan zozo' in esa si makaaté u léwo'an wo soo ma'éman taka-takazan nimangun ni sia kimana' i mahtali-talinga wia si Opo Empung si menou-nou.

Ibrani 4:1

Zozo' un taaz ni Opo Empung i muntep witi tampa makanaan-Na én zéi'kampé' méikana', taan mile-ilek wo tia' im wia ni kamu ém wéwéhan si pahgenangela in ikatula'u wo zéi'kan mata'u muntep witi tampa makanaan itii.

Ibrani 4:11

Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

Ibrani 6:11

Taan un ikapaaz nai, ni kamu si esa wo si esa én uli-ulit i mahraa-raatéan makaz ni kamu ing kalekepala, wo am pengéré-ngéré'en niou é makailekan niou.

2 Petrus 1:10

Niitumo, katuari-katuariku, totoz mahtututu'la i mapailek sa kamu én uli-ulit pinéléng ni Opo Empung wo tinawah-Na ing kumiit ni Sia. Pahpaan sa kamu mahwangun niana péléng, zéi'kan itula'u niou um pa'émanen niou masuat wo ni kamu én zéi'kan ikasangkil karegas i mahlampang.

2 Petrus 2:18

Pahpaan ni séra é menuwu-nuwu' am wera' wo an zéi'kan siapa torona. U lelo léwo' un awak ém pahpakén néra i mahenou sé tou taré ikapiloté im witu ung katou-touan né tou méikalulu.

2 Petrus 3:11

Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

2 Yohanes 1:8

Niitumo tuméga-tégamla, én taa um pa'émanen niou wia si Yesus Kristus um pinaayang naimo im puuna én ikaliong, wo péléng um wawaér wia ni kamu én toro kailekan niou.