Ibrani 1:4 - Taaz Weru Witu u Nunuwu'en Tombulu

⁴ Niitumo, si Opo Empung é niméhémo wia si Oki'-Na ung kawasa u lumousé ung kawangko'an ung kawasa né malaekat, wo u méingaran ni Opo Empung wia ni Sia é lumouspé'mé ung kawangko' u méingaran wia sé malaekat.

Ibrani 1:4 Iomraidhean Croise

Efesus 1:21

Ung kawasa ni Kristus itii é lumouspé'mé sé pemerénta, lumouspé'mé ung kawasa wia ung kaayahan, lumouspé'mé sé tonaas, lumouspé'mé sé tuang wo séi uman sé pahsigi-sigi'en, séra i menou-nou in tarékan kaapa sé mamenou-nou in tumondong.

Kolose 1:18

Ni Sia én ulu wo sé jamaat én awak. Ni Sia si kataré-taré wo ni Sia si puuna méitoumé ni Opo Empung im wia sé nimaté, niitumo ni Sia si ipahpuu-puuna im wana péléng am péléng.

Kolose 2:10

Wo pahpaan i nimaesamo karia ni Kristus, ni kamu ém winéhan ung katou-touan nimawutul. Ni Siamo si tonaas péleng né roh sé mahpeperénta wo sé mahkakawasa.

2 Tesalonika 1:7

Wo ni Sia é méhé ung kaenaan wia ni kamu sé mahpendan an zézéha wo kasii wia ni kai. Niitu é mamuali i si Yesus Mahpiara tumumpamé im witi kasendukan i mapailek un tou-Na karia né malaekat-Na sé mawuta-wuta ang kawasa wo karia un api melaya-layas.

Ibrani 1:9

Ni Ko én totoz paaz un zéi'kan mahsanaweka wo totoz mazi'zis u mahsanaweka; niitumo si Opo Empung, si Opo Empung-Mu é niméléng ni Ko wo niméhé wia ni Ko u sisigi'an u mahalimé a makapaazen, lumousé sé kakaria-Mu.”

Ibrani 12:17

Kata'uan niouo u nimamuali tumondong niitu, i ni sia paazkan makailek ung kamang itii, taan si ama'na é soomo méhé niitu. Ni sia én zéi'mo winéhan témpo ni ama'na i mahwawangun ung kasumalaanna zozo' ni sia mahamé' i makailek sumaup ung kamang itii.

Ibrani 2:9

Taan im puuna i si Yesus wiapé' ung kaayahan, ni Sia ém winangun ni Opo Empung wawa'pé'mé oki' im wia sé malaekat taan zéi'kan tahlous uré. In toro niitu, pahpaan ung kamang méitambér ni Opo Empung, ni Sia nimaté wia péléng sé tou. Pahpaan ni Sia nimazéhamo makaz i nimaté, niitumo in tarékan ni kita nimileko i si Yesus é nimakaileko u looz wo u sigi' ni Opo Empung.

1 Petrus 3:22

In tarékan si Yesus Kristus é nimangémo witi kasendukan a rumumezla witu u rurumezan totoz pahsigi'en witu ung kakan ni Opo Empung. Wo péléng sé malaekat, péléng sé mahkawasa wo péléng ang kaketezan ém witumo ung kawasa ni Yesus Kristus.