Filipi 4:8 - Taaz Weru Witu u Nunuwu'en Tombulu

⁸ Ung kamurian katuari-katuari, péléng an ulit, péléng am wangun im pahloozen, péléng an zéi'kan mahsanaweka, péléng am weresi, péléng an tombal, péléng an tariis im pahtalingan, péléng am wéwéhan torona wo an toro pahloozen, niana péléng é léwo'zéi' ing genangen nioula.

Filipi 4:8 Iomraidhean Croise

Matius 22:16

An iatu nérama sé woopira pahtuzu'en néra wo sé woopira tou mahkii-kiit si kolano Herodes mangé wia si Yesus i lumigau, “Méster, kata'uan nai, ni Ko én zéi'kan mahtowo wo ulit i mahtuzu' u lalan ni Opo Empung. Wo zéi'kan siapa sé ikaindé'-Mu pahpaan ni Ko zéi'kan mahsanaweka.

Markus 6:20

pahpaan si Yohanes ém pahsigi'en ni Herodes wo kata'uanna i si Yohanes én tou ulit wo linenas ni Opo Empung, niitumo si Herodes nimatuma sé touna i matuméiz si Yohanes. Pahpaan zozo' un aténa é nimalinganga i mahtalingamé un ipahkuamé ni Yohanes, taan ni sia é mahpaa-paaz i mahtalinga un ipahkuanamé.

Lukas 16:15

Ang kuan ni Yesus wia ni séra, “Ni kamu é mapailek wia sé tou i ni kamu én ulit, taan kata'uan ni Opo Empung am witu un até niou. Pahpaan am pahgenangela né tou in totoz wangun im wia ung kaayahan, niitu én ikazi'zis ni Opo Empung.

Lukas 2:25

In toro niitu im witi Yerusalem ém wéwéhan si tou makangaran Simeon. Ni sia én tou ulit wo mahkiit uman am paaz ni Opo Empung wo mengento-ngento' un oras ni Opo Empung i milot sé tou Israel. Si Roh Lenas én totoz memali-mali kariana.

Lukas 23:50

Wéwéhan si makangaran Yusuf, si esaané im wia sé Mahkama Agama. Ni sia én tou mahwangun a lé'os wo an ulit.

Yohanes 7:18

Si tou si mahnuwu' karia ung genangna in esa, ni sia é menéro uman u sisigi'an witu un touna in esa, taan si tou mahpenéro u sigi' wia si Opo Empung si nimatumé ni sia, ni sia én ulit wo im wia ni sia én zéi'kan siapa an towo.

Kisah Rasul-rasul 10:22

A séra mingkotla, “Si Kornelius si tonaas né sana atus suraro Romawi, si ulit wo maindé' si Opo Empung wo kata'uan né tou i lé'os uman wia péléng sé tou Yahudi én tinuzu'anomé ni malaekat lenas in tumawah ni ko i mangé witi waléna, wo tumalinga an ikuamu wia ni sia.”

Kisah Rasul-rasul 22:12

Im witu ém wéwéhan si tou makangaran Ananias. Ni sia uli-ulit mahkiit un ukum Torat, wo kata'uan péléng né tou Yahudi sé mahento' witu in tou lé'os.

Kisah Rasul-rasul 6:3

Niitumo katuari-katuari, tawimo kamu i méléngla sé pitu tou im wia ni kamu. Ni séra é léwo'zéi' in tou lé'os, tulap wo kinawasa ni Roh Lenas. Sé tou kenu ém wéhan nai um paayangen i mahimek am pemandungen i mendo-endo,

Roma 13:13

Méyémo kita menou-nou karia im wangun tanu am pahwangunen né tou in endo. Tia' memésta-mésta uman wo mapahtetewelen, tia' mahsamek wo mahkiit uman a lelo léwo' un awak. Tia' mahéndo-éndoan wo mahtétéutéuan si esa wo si esa.

Roma 13:3

Pahpaan, sa si tou nimangun u lé'os, ni sia én tia'mo maindé' wia sé pemerénta, taan maindé'la sa nimangunola a léwo'an. Paaz ko wé i menou-nou zéi'kan maindé' wia sé pemerénta? Mahwangunola a lé'os wo ni kamu makailek u lolooz né pemerénta.

Roma 14:18

Pahpaan séi uman si pakahpaayangna wia si Kristus én tanu niitu, ni sia é nimangun si Opo Empung mahpaa-paaz wo ni sia é sigi'en né kasuat tou.

Roma 2:29

Taan si uli-ulit tou Yahudi é si uli-ulit tou Yahudi witu un aténa, wo si uli-ulit sinunat é si tou witu un aténa ém pahpaayangano ni Roh ni Opo Empung, zéi'kan uman méipantik witu um pahpantikan. U lolooz wia si tou tanu ni sia én zéi'kan wia si kasuat tou a méyé, taan wia si Opo Empung a méyé.

1 Korintus 4:5

Niitumo, ni kamu én tia'mo mahtotoz si tou simala' kaapa zéi'kan, niitu én zéi'kampé' orasna. Un orasna é si Mahpiara i mawurimé sumaup. In toro niitu, péléng an ipahwuni-wuni wana ang karimbengbengan én ipapailek-Na. Ituzu'-Na péléng ang ginenang ni tou. Tumondong niitu si esa wo si esa é loozen ni Opo Empung mengiité am pinahwanguna.

2 Korintus 13:7

Ni kai mengaléi wia si Opo Empung, wo ni kamu tia' mahwangun a léwo'an. Zéi'kan mapailek i ni kai én uli-ulit aatu ni Kristus, taan wo ni kamu mahwangun ang kapaaz ni Opo Empung, zozo' ni kai ém pahkuan né tou in zéi'kan uli-ulit aatu ni Kristus.

2 Korintus 6:8

Ni kai ém pahsigi'en taan kasii pahséro'an, pahloozen taan kasii ipahsalou, pahkuan in tantowo taan un ulitna én zéi'kan tantowo.

2 Korintus 8:18

Ni kai kasii é nimatuma si katuari esa pa'émanen i mangé karia ni Titus. Si katuarita itii ém pahloozen péléng né jamaat pahpaan um pakahpaayangna i mahwoka' u Nuwu' Lé'os ni Opo Empung.

2 Korintus 8:21

Niitumo kapaaz nai mahwangun a lé'os én zéi'kan uman witu u sinaru ni Mahpiara taan maan im witu u sinaru né tou.

Galatia 5:22

Taan sé tou mahkiit um paaz ni Roh Lenas é mahwangun ang kenu: rumaraaté, mahpaa-paaz, mahlé'o-lé'osan, ezen, lé'os uman, paaz mahsawang si kasuat tou, enté' witu um pa'émanen,

Efesus 4:25

Niitumo, tia'mo mahtowo taan mahkua umanla an ulit wia si esa wo si esa pahpaan ni kita péléng é masuat in esaané im witu un awak ni Kristus.

Efesus 5:9

Pahpaan si tou menou-nou witu un ayah é mahwua'mé ang kawangunan, zéi'kan mahsanaweka wo ulit.

Efesus 6:14

Niitumo, rumendaila menté-enté'. Pakéla ung kaulitan ni Opo Empung maéndo tanu un embetmu u nimangun ni ko nimimeko i makumoro'. Wo pakéla un zéi'kan mahsanaweka maéndo tanu ung karai uaséi u méikelung im pahsaruné né kakoro'.

Filipi 3:1

Ung kamurian, katuari-katuari, mahpaa-paazola pahpaan nimaesamo karia ni Mahpiara. Ni aku én zéi'kan mahgenang wutez i mantika sumaup a mémoipantika im puuna. Niitumo, niana péléng én isaupkupé'ma im wia'i, pahpaan niitu é lé'os i mangun um pa'émanen niou zéi'kan ikalulu.

Kolose 4:5

Ni kamu é léwo'zéi' tulap i menou-nou karia né tou zéi'kan ma'éman wo un témpo ém pahpakéla lumé'o-lé'os.

1 Tesalonika 4:12

Karia in téntu, sé tou walina sé zéi'kan ma'éman si Yesus é mahsigi' ni kamu wo ni kamu kangkasii én zéi'kan niméré' wia ni séra.

1 Timutius 2:2

Ipengaléi kasiila sé kolano wo péléng sé mahkawasa wana am wanua, wo kita toro menou-nou karia in ena' wo zéi'kan siapa u mahraung i mahtali-talinga wo mahsigi' si Opo Empung.

1 Timutius 3:11

Téntu kangkasii sé mahayo néra é léwo'zéi' in tou lé'os sé pahsigi-sigi'en, zéi'kan mahtawuruk sé tou walina, mata'u mahime-imek un tou néra wo toro pa'émanen wana péléng am péléng.

1 Timutius 3:4

Ni sia kasii é mata'u mahime-imek sé sana awuna karia im wangun, pahtali-talingan wo pahsigi-sigi'en né oki'na.

1 Timutius 4:12

Tia' wo wéwéhan sé tou mahgenangla i ni ko én tou roros pahpaan ni ko ém weru tou. Mahtututu'la i maéndo kékéréan wangun né tou ma'éman wia si Opo Empung, wana an ipahkuamu, wana am pemangu-mangunennu, wana a raraatéannu, witu um pa'émanennu wo witu ung katou-touannu un zéi'kan penéro-néro'an né tou.

1 Timutius 5:10

Wo kasii kata'uan né tou i ni sia é mahwangun a lé'os wia sé tou tanu ang kenu: sé oki'na ém piniaranamé lé'os, paaz mahsungkul si tou mento' witi waléna, mahwo'as un a'é né katuari esa pa'émanen, mahsawang sé tou witu ung kasusaan wo uli-ulit zéi'kan mazéi' i mahwangun péléng am wangun.

1 Timutius 5:2

Téntu kangkasii im wia sé wéwéné tu'amo. Maheluz umanla i mahnuwu' wia ni séra tanu i mahnuwu' wia si ina'mu. Wo pahnuwu'an kasiila sé raraha tanu ko i mahnuwu' wia sé tuarimu. Wangunela niitu karia un até weresimu.

Titus 1:8

taan paaz sumungkul sé tou i mento' witi waléna, paaz péléng am wangun wo lé'os, tulap, zéi'kan mahsanaweka, mahkiit um paaz ni Opo Empung, makaezen wana a lelo,

Titus 2:14

Ni Sia é nimayomola un tou-Na i milot ni kita im wana péléng a léwo'an wo mangun ni kita maéndo tou lenas wo maéndo tou-Na sé zéi'kan mazéi' mahlé'os am wangun.

Titus 2:2

Sésaala sé tuama tu'amo wo séra mahime-imek un tou néra, pahsigi'en né tou, tulap, zéi'kan mazéi' i ma'éman, zéi'kan mazéi' rumaraaté si kasuat tou wo ezen witu un zézéha.

Titus 2:7

wo wangunela ung katou-touannu i maéndo kékéréan wangun wia ni séra. I mahtuzu' wia sé tou, ni ko é léwo'zéi' in uli-ulit mahtuzu' wo tia' mahtowo,

Titus 3:14

Wo sé touta kangkasii é léwo'zéi' mahtata'ula i mahpaayang am paayangen wangun i mahwuwutul am pemandungen néra i mendo-endo, wo ung katou-touan néra ém wéwéhan un torona.

Ibrani 11:2

Pahpaan i ma'éman, sé nimaopo né tou Israel én ikapaaz ni Opo Empung.

Ibrani 13:18

Tia' mazéi' i mahpengaléi tumoro ni kai pahpaan totoz kata'uan nai ung genang lé'os nai ém weresi. Pahpaan im wana am péléng ni kai é mahtututu' i menou-nou mahwangun a lé'os.

Yakobus 1:27

Un uli-ulit mahragés wo zéi'kan siapa um pahséro'an witu u sinaru ni Opo Empung, Ama'ta é mahileké sé zéi'mo siapa tu'a wo sé wéwéné mahesa-esamokan im wana ang kasusaan néra. Téntu kangkasii ni kamu, mile-ilekla én taa kamu ikakiitla i mahwangun a léwo'an wia ung kaayahan.

Yakobus 3:17

Taan ang katulapan am wia si Opo Empung a méyé, ung kataré-taré un até ém weresi, tumondongla niitu ém paaz i mahlé'o-lé'osan, roros até wo mahkii-kiit uman, mawuta-wuta raraaté wo mahwua'mé am wangun, zéi'kan mahsanaweka wo zéi'kan mahgau-gau lé'os.

1 Petrus 1:22

Pahpaan ung katou-touan niou é linenas nioula wia si Opo Empung karia i mahtali-talinga an tutuzu' ulit, taka-takazan ni kamu én uli-ulit rimaraatémola sé katuari niou. Niitumo pahaléiengku wia ni kamu in totoz uli-ulit i mahraa-raatéan.

1 Petrus 2:12

Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

1 Petrus 4:8

Taan un totoz ipahpuu-puuna én uli-ulit i mahraa-raatéan, pahpaan sa kita mahraa-raatéan, ni kita én zéi'mo megenang-genang a siningkéla' né tou.

2 Petrus 3:1

Katuari-katuari ikararaatéku, um pinantikku kenu ém pinantik kazua u méiwéhé wia ni kamu. Im witu un zua pinantik kenu, ni aku é nimahtututu' i mapagenang wia ni kamu wo ang genang niou ém weresi.

1 Yohanes 3:18

É kamu in oki'ku, méyémo kita mahraa-raatéan zéi'kan uman witu u sumah kaapa witu u lila', taan wana am pahlé'osen wo witu ung kaulitan.

1 Yohanes 3:3

Si tou niméré' un téntu wia ni Sia é limenas un touna tanu si Kristus i lenas.

1 Yohanes 4:1

Katuari-katuari ikararaatéku, péléng sé roh én tia' pa'émanen niou, taan pahtata'ula lumé'o-lé'os sé roh itii, sa sé roh itii ém wia si Opo Empung a méyé kaapa zéi'kan. Pahpaan lakez sé nabi towo sé nimapaileko un tou néra wo mahliklik ung kaayahan.