Filipi 4:17 - Taaz Weru Witu u Nunuwu'en Tombulu

¹⁷ Zéi'kan a méiwéhémé itii am penérongku, taan ung kapaazku si Mahpiara éng kalakezna i mahwéhémé péléng am péléng wia ni kamu pahpaan simawangomé ni aku.

Filipi 4:17 Iomraidhean Croise

Yohanes 15:16

Zéi'kan ni kamu sé niméléng ni Aku, taan ni Aku si niméléng ni kamu. Ni Aku nimatu ni kamu wo ni kamu mangé wo mangun lakez am paayangen lé'os wo am wua'na am paayangen niou é memia-mia makaz ing kauré-uré. Karia in téntu, apa uman um pahaléien niou wia si Ama' mengiité u ngaran-Ku, niitu én iwéhé-Na wia ni kamu.

Yohanes 15:8

Sa am pahwua' nioué é lakez, si Ama'-Ku ém pahloozen wo pahsigi'en, wo karia in téntu ni kamu én uli-ulit maéndo pahtuzu'eng-Ku.”

Roma 15:28

Niitumo, sa ni aku simampetoma wo niméhémoma an zoit sasawang né tahsasana wanua walina itii wia ni séra, taré ni aku mangé witi Spanyol lumangkoié um wanua tua'na niou.

2 Korintus 11:16

Ikuakuma sumaup, kasooku sa wéwéhan si tou im wia ni kamu si mahgenangla i ni aku én tou lemou. Taan sa kamu mahgenangla i ni aku én téntu, sungkulené ni aku, tanu ni kamu sumungkul si tou lemou, makaz ni aku toro lumoozla oki' un touku.

2 Korintus 9:5

Niitumo, méiatuku sé katuari esa pa'émanen itii i mapuunama mangé wia ni kamu witi Korintus, wo séra toro sumawang ni kamu i mimek an zoit sasawang, a méikua niouo in iwéhé. Sa kamu nimimeko, niitu un tumuzu'mé i ni kamu én uli-ulit paaz mahsawang, zéi'kan pahpaan im pahlusun.

Filipi 1:11

Ni aku kasii é mengaléi wo kamu toro memangu-mangun an ulit. Si Yesus Kristus uman si toro mangun ni kamu mangun niitu i mahsigi' wo mahlooz si Opo Empung.

Filipi 4:11

Ni aku kimuama i mahpaa-paaz pahpaan ni kamu mahgenangé ni aku, niitu én zéi'kan pahpaan ni aku mahgenangla im wéwéhan ung kailekangkumé. Zéi'kan téntu, pahpaan zozo' am pemandungengku zéi'kampé' awes taan zéi'kan apa-apa, pahpaan ni aku é nimanaramo karia un apa uman um wiamo ni aku én aweso.

1 Tesalonika 2:5

Pahpaan kata'uan niou i ni kai én zéi'kan kawisa i mahenou ni kamu karia a nunuwu'en tariis uman im pahtalingan wo zéi'kan kawisa i mahtuzu' ni kamu i menéro ung kauntungan karia i mahwuni-wuni. Si Opo Empung si mata'u péléng niitu.

1 Timutius 3:3

zéi'kan matetewelen, zéi'kan uupi'en taan lé'os uman, paaz mahwangun sé tou malé'osan wo zéi'kan megena-genang uman an zoit.

1 Timutius 6:10

Pahpaan u megena-genang uman an zoit, niitu u nimangun sé tou mahwangun péléng a léwo'an. Wo pahpaan i megena-genang uman an zoit, sé woopira tou én zéi'mo ma'éman wia si Yesus wo un até néra é rumara pahpaan in zézéha.

Titus 1:7

Si tonaas né jamaat é mahimek um walé ni Opo Empung, niitumo ni sia é léwo'zéi' in zéi'kan siapa pahséro'an, zéi'kan wera', zéi'kan raranguan, zéi'kan matetewelen, zéi'kan tangkoro'en wo zéi'kan uman megena-genang an zoit,

Titus 3:14

Wo sé touta kangkasii é léwo'zéi' mahtata'ula i mahpaayang am paayangen wangun i mahwuwutul am pemandungen néra i mendo-endo, wo ung katou-touan néra ém wéwéhan un torona.

Ibrani 6:10

Pahpaan si Opo Empung én zéi'kan mahsanaweka, niitumo ni Sia én zéi'kan maliuz am pahpaayangen niou wo u raraatéan niou wia ni Sia u méipapailek niou karia i mahsawang sé tou-Na. Niitu ém pinahwangun niouomé rengané im puuna makaz in tarékan.

1 Petrus 5:2

Piarala sé domba ni Opo Empung sé wia ni kamu. Tia' karia in totoz pahlusun, taan karia u mahpaa-paaz tanu ung kapaaz ni Opo Empung. Tia' menéro-néro uman ang kauntungan, taan iwéhéla un tou niou in uli-ulit mahsawang.

2 Petrus 2:15

Pahpaan ni séra én timula'umola u lalan kaulitan, ni séra é méikalulumo. Ni séra é mahkiit um pahmualin ni Bileam, oki' ni Beor, si paaz im pahwaéran i mahmuali a singkéla'.

2 Petrus 2:3

Pahpaan ung kaangkuman né méster towo itii, ni séra é mahtututu' i menéro zoit lakez wia ni kamu karia i mahsirita a sirita winangun néra uman. Taan pahpaan am pahwangunen néra itii, un ukuman wia ni séra én urémo niimek wo un endo si Opo Empung i luméwo' ni séra én zéi'mo isoro'.

Yudas 1:11

Ikaléwo'la séra pahpaan ni séra éng kimiit um pinahmualimé ni Kain wo ni séra éng kimiit si Bileam si nimahlulumé sé tou pahpaan im pahwaéran. Ni séra kasii én ikaléwo' pahpaan mahsaru si Opo Empung tanu si Korah.