Filipi 3:10 - Taaz Weru Witu u Nunuwu'en Tombulu

¹⁰ Un totoz kapaazku é mata'u si Yesus Kristus wo kasii totoz im paaz i mata'u ung kawasa un timou sumaup ni Sia im wia sé nimaté. Ni aku kangkasii é nimimeko un touku i mazézéha, tanu ni Sia i nimazézéha, wo nimimeko un touku i maté, tanu ni Sia i nimayo un touna i nimaté.

Filipi 3:10 Iomraidhean Croise

Matius 20:23

Ang kuan ni Yesus wia ni séra, “Totoz ulit, ni kamu é mamendan an zézéha un tanumokan i melep witu un eelepan u léwo'zéi' in elepeng-Ku. Taan tumoro séi sé marumumez witu ung kakan kaapa witu ung kawihi-Ku, ni Aku én zéi'kan siapa kawasa in tumotoz niitu. U rurumezan itii é maiwéhé ni Ama'-Ku wia sé tinotoz-Namo i makailek niitu.”

Yohanes 10:18

Zéi'kan siapa si toro méndo ung katou-touang-Ku im wia ni Aku, taan ni Aku mayo niitu mengiit um paaz-Ku in esa. Ni Aku é mahkawasa i mayo niitu wo mahkawasa i méndo niitu sumaup. Niiamo um perénta kinailekang-Kumé wia si Ama'-Ku.”

Yohanes 17:3

Ung kenumo ung katou-touan makaz ing kauré-uré, i sé tou mata'u si Ama', si Ama' é si Opo Empung si esa uman si ulit wo mata'u ni Aku, si Yesus Kristus si méiatumé ni Ama'.

Roma 8:17

Sa ni kita én oki'-Na, ni kita kangkasii é maéndo tou makasangkum a méitaaz ni Opo Empung. Ni kita é makailek a sangkum itii karia ni Kristus. Niitu éng kailekanta sa ni kita mazéha karia-Na, wo ni kita kangkasii é loozen wo sigi'en karia-Na.

Roma 8:29

Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

Roma 8:36

Tanu u méipantik witu um Pinantik Lenas, “Pahpaan ni Ko, sekez in endo ni kai makalakez nimasaruan karia um patéan. Ni kai én tanumokan sé domba sé mamokerizen.”

2 Korintus 1:10

Ni Sia si nimilotomé wo mamilot ni kai im witu um patéan makaindé'en. Ni kai sekezé é mahéré' wia ni Sia i miloté ni kai kasii im witu u makaindé'en tanu niitu in tumondong.

2 Korintus 1:5

Ni kai é nimahpendanomé lakez a zézéha tanu am pinahpendané ni Kristus, taan ni kai kangkasii é nimakailekomé wia si Kristus ang kaenté'an un até i ni kai mahsaru an zézéha.

2 Korintus 13:4

Si Kristus én zéi'kan enté' i sinalip. Taan in tarékan ni Sia menou-nou pahpaan ung kawasa ni Opo Empung. Téntu kangkasii ni kai zéi'kan enté' tanu si Kristus im puuna, taan ni kamu é milek ni kai i menou-nou karia-Na pahpaan ung kawasa ni Opo Empung witu ung kawangunan niou.

Galatia 2:20

In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

Galatia 6:17

Rengan in tarékan, tia' wo wéwéhampé' si tou mahsususa ni aku, pahpaan im witu un awakku ém wéwéhan am walulang i ni aku pinahzézéhamé, un tumuzu'mé i ni aku én anu ni Yesus.

Efesus 4:13

akaz ni kita péléng nimaesaan pahpaan um pa'émanen wo ung kata'uanta un ulit tumoro si Oki' ni Opo Empung. Ni kita maéndo tou uli-ulit lutu'mo sé kauréna éng kalekepna masuat karia ni Kristus.

Filipi 3:8

Zéi'kan uman niitu, pahpaan in tarékan kata'uangkumo u lumouspé'mé ung kawangunan am walina i ni aku mata'umo si Kristus Yesus, si Mahpiaraku. Pahpaan ni aku mata'umo si Kristus, niitumo péléng am puuna pahgenangengkula ém wéwéhan torona wo mahalimé ung kauntungan wia ni aku witu u sinaru ni Opo Empung é méitula'ukumola. Péléng a mahalimé ung kauntungan wia ni aku im puuna ém pahgenangengkula i rimberek wo ni aku toro makailek si Kristus.

Kolose 1:24

In tarékan, ni aku é mahpaa-paaz i nimazéha pahpaan nimapata'u u Nuwu' Lé'os tumoro si Yesus wia ni kamu wo pahpaan mahpaayang wia si Kristus i lumekep un zéha-Na wia sé jamaat sé tanumokan un awak-Na.

Kolose 2:13

Ni kamu kangkasii, im puuna in zéi'kampé' ma'éman én tanu nimatémo pahpaan a siningkéla' wo pahpaan zéi'kan sinunat witu un awak, taan in tarékan ni kamu é méitoumomé sumaup ni Opo Empung karia ni Kristus, kumawusa si Opo Empung i niméhéla ampungan wana a singkéla'ta,

Kolose 3:1

Niitumo, ni kamu sé méitoumé sumaup karia ni Kristus, mahtututu'la i menéro am witi kasendukan, witi tampa ni Kristus i rimumez witu ung kakan ni Opo Empung.

1 Petrus 1:3

Loozela si Opo Empung, si Ama' ni Yesus Kristus Mahpiarata. Pahpaan ung kawangko'an u raraatéan-Na makaz ni kita én toro nimakailek ung katou-touan weru mengiité si Yesus Kristus si méitoumé sumaup ni Opo Empung im wia sé nimaté. Niitu u mahenté' um pahéré'anta i menou-nou.

2 Petrus 1:13

Karegas ni aku i menou-noupé', ni aku é léwo'zéi' mapagenanga niana péléng wia ni kamu.

1 Yohanes 2:3

Sa kita mahkiit am perénta ni Opo Empung, niitu én tumuzu'mé i ni kita é mata'u ni Sia.

1 Yohanes 2:5

Taan séi si mahkiit a nuwu' ni Opo Empung, u raraaté ni Opo Empung én uli-ulit lekepo im wia si tou itii. Karia in téntu ni kita én toro mata'ula i ni kita ém wia ni Sia a méyé.

Wahyu 1:18

wo Si Menou-nou. Ni Aku é nimatémoma, taan ilekené, ni Aku é Menou-nou makaz ing kauré-uré wo ni Aku si timion péléng ang kusi' um patéan wo um pahwéha-wéhan né tou nimatémo.