Filipi 2:17 - Taaz Weru Witu u Nunuwu'en Tombulu

¹⁷ Zozo' ni aku ém woo ukumen i maté wo un zaha'ku én isaroi witu um wawo né tatamun kineriz niou in iragés wia si Opo Empung, taan ni aku én zéi'kan mazéi' i mahpaa-paaz tumoro niitu wo ni aku kasii é mahpaa-paaz karia niou péléng.

Filipi 2:17 Iomraidhean Croise

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 21:13

Taan si Paulus nimingkot umané, “Kaa kamu mahamé', taka-takazan nimangun un atéku i rumara? Ni aku én zéi'kan uman paaz in apusen taan ni aku kangkasii ém paaz i maté witi Yerusalem pahpaan i mahwoka' u ngaran ni Yesus Mahpiara.”

Roma 12:1

Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

2 Korintus 12:15

Niitumo, kapaazku i méhé péleng an anuku i sumawang ni kamu, taka-takazan ung katou-touangku én iwéhéku i sumawang ni kamu. Téntu um wangunengku i mapailek i ni aku én totoz rumaraaté ni kamu, taan ni kamu én zéi'kan tahlous rumaraaté ni aku.

2 Korintus 4:12

Niitumo, ni kai sekezé é mahsaru un toro mahwali ni kai witu um patéan, taan ni kamu sekezé é nimasaruan karia an toro mahwali ni kamu witu ung katou-touan.

2 Korintus 6:10

Ni kai sekezé é mahpaa-paaz zozo' i rumara un até. Ni kai én zéi'kan siapa apa, taan nimangun sé tou lakez nimawa'ilan. Ni kai ém pahileken in zéi'kan siapa apa, taan péléng am péléng ém wia ni kai.

2 Korintus 7:4

Ni aku én totoz ma'éman wia ni kamu, lumouspé'tarémé niitu ni kamu én ipahloo-loozku. Im wana péléng an zézéha nai, ni kamu é mahenté' un atéku wo totoz mahwéhé a makapaazen.

Filipi 1:20

Un totoz pelelo-lelongku wo um pahéré'engkula i ni aku én zéi'kan ipapaiza-izang im wana péléng am pahwangunengku i menou-nou. Ni aku én totoz ma'éman wo wuaya i mahnuwu' tanu im puuna, téntu kangkasii in tarékan, im wana péléng am pahwangunengku, zozo' ni aku i menou-noupé' kaapa i nimatémo, si Yesus Kristus ém pahloozen wo pahsigi'en.

Filipi 2:18

Téntu kangkasii ni kamu, mahpaa-paazla tanu niitu wo mahpaa-paazola kariaku.

Filipi 2:30

Pahpaan ni sia ém woanokan a maté i mahpaayang wia si Kristus, wo ni sia én zéi'mo mahgenang un touna i mahwuwutul am pemandungengku an zéi'kan mata'u wangunen niou, pahpaan ni kamu én zou'ma im wia ni aku.

Filipi 4:18

In tarékan si Epafroditus é nimahalimomé a raragés méiwéhé nioué wia ni aku, niitumo ni aku nimakailekomé péléng am pemandungengku um wia ni kamu a méyé. Lumouspé'tarémé niitu é malake-lakezo a méiwéhé nioué. A méiwéhé nioué én totoz wangun wo niitu én tanu u raragés mahwou tariis ung kapaaz ni Opo Empung.

Kolose 1:24

In tarékan, ni aku é mahpaa-paaz i nimazéha pahpaan nimapata'u u Nuwu' Lé'os tumoro si Yesus wia ni kamu wo pahpaan mahpaayang wia si Kristus i lumekep un zéha-Na wia sé jamaat sé tanumokan un awak-Na.

1 Tesalonika 2:8

Ni kai é rumaraaté ni kamu, niitumo ni kai én zéi'kan uman paaz i mahwoka' u Nuwu' Lé'os ni Opo Empung wia ni kamu, taan ung katou-touan nai kangkasii én iwéhé nai wia ni kamu pahpaan ni kamu én totoz ikararaaté nai.

2 Timutius 4:6

Tumoro ni aku, un endo ni aku i maté én zéi'mo uré. Un zaha'ku én tanu un anggor un ipahsaroi i maéndo raragés wia si Opo Empung.

1 Petrus 2:5

Ni kamu é masuat wo um watu menou-nou u niéndo ni Opo Empung im wangunen Walé-Na Lenas. Karia in téntu ni kamu é nimaéndo walian linenas ni Opo Empung i mahali ung katou-touan in iragés wia si Opo Empung. Si Opo Empung ém paaz méndo a raragés niou pahpaan am winanguno ni Yesus Kristus wia ni kita.

1 Yohanes 3:16

Karia ang kenumo ni kita mata'u u raraatéan ni Kristus, i si Kristus é nimayomo un tou-Na wia ni kita. Niitumo ni kita kangkasii é léwo'zéi' i mayola un touta wia sé katuarita esa pa'émanen.