Filipi 2:15 - Taaz Weru Witu u Nunuwu'en Tombulu

¹⁵ Karia i mahwangun an téntu, ni kamu é mapailek i ni kamu én oki' ni Opo Empung sé zéi'kan siapa sinala' im wia sé tou léwo' wo méikalulu. Karia menou-nou im weresi wo zéi'kan siapa a sinala', ni kamu maéndo sena' wia ni séra, tanu u sena' né tototi'en i mahsena' wia ung kaayahan.

Filipi 2:15 Iomraidhean Croise

Matius 10:16

“Gena-genangen! Ni kamu é méiatu-Ku tanu si domba witu un unez né serigala. Niitumo, ni kamu é léwo'zéi' i siga' tanu si ulé' wo lé'os tanu si bombo.

Matius 17:17

Ang kuan ni Yesus, “É kamu in tou zéi'kan ma'éman wo méikalulu. Makaz sawisa ni Aku i memali-mali karia niou? Makaz sawisa ni Aku i mezen wia ni kamu? Ipahwalimé wia'i si koki' itii!”

Matius 5:45

Pahpaan karia in téntu, ni kamu é nimaéndomola oki' ni Ama' niou si witi kasendukan, si mahserité u sena' ni endo wia sé tou lé'os wo wia sé tou léwo', wo mahtumpamé un uzan wia sé tou ulit witu u sinaru-Na wo wia sé tou zéi'kan ulit witu u sinaru-Na.

Matius 5:48

Niitumo ni kamu é mahtututu'la wo ni kamu malekep tanu si Ama' niou si witi kasendukan i lekep.”

Lukas 1:6

Sé sana séndé' kenu ung katou-touan néra é mahkiit ung kapaaz ni Opo Empung wo karia un ulit ni séra é mahkiit péléng am perénta wo an tinotoz ni Opo Empung.

Lukas 6:35

Taan ni kamu, iraraatéla sé kakoro' niou wo mahwangunla a lé'os wia ni séra. Ipinjangla an anu niou wia ni séra wo tia' mahgenangla in iwuri néramé sumaup. Sa téntu am pahwangunen niou, ni kamu é makailek um wawaér wangko' wo ni kamu é maéndo oki' ni Opo Empung si Totoz Rakék. Pahpaan ni Sia é lé'os im wia sé tou soo mahkua u makasé wo wia sé tou léwo'.

Yohanes 5:35

Si Yohanes Menanarani én tanu u solo mahlayas wo mahsena'ma wo u sena' itii nimangun ni kamu mahpaa-paaz zozo' in zéi'kan mauréma.

Kisah Rasul-rasul 2:40

Lakezpé' kasii a méikua ni Petrus wia ni séra i mahkua am pina'ilekna wo menutu' ni séra, kuana, “Sa kamu paaz in zéi'kan ukumen ni Opo Empung, tia'mo mahkari-karia sé tou memua-muali a singkéla' kenu.”

Kisah Rasul-rasul 20:30

Lumousé niitu, im wia ni kamu ém wéwéhan sé woopira tou sé mahtuzu' an tutuzu' zéi'kan ulit. Ni séra é mahtututu' i mahlululu sé tou ma'émano ing kumiit ni séra.

Roma 16:19

Péléng sé tou én timalingamo i ni kamu é mahkii-kiit um paaz ni Opo Empung. Niitumo, ni aku é mahpaa-paaz in timalingamé tumoro ni kamu. Kapaazku ni kamu én tulap wana am wangun wo weresi im wana a léwo'an.

1 Korintus 1:8

Si Yesus Kristus Mahpiarata kangkasii é sumawang ni kamu wo um pa'émanen niou éng kaenté'na makaz witu un endo kaakazan ung kaayahan, wo im witu un endo itii i ni Sia méyé sumaup, ni kamu én zéi'kan siapa a sinala'.

2 Korintus 6:17

Pahpaano niitu, Mondolé ni kamu im witu un unez né tou zéi'kan ma'éman, wo tumampasé im wia ni séra, Nuwu' ni Opo Empung. Wo tia' kamu memua-muali a singkéla' u mangun ni kamu i makati'tiren, wo kamu sungkuleng-Ku.

Efesus 5:27

Karia in téntu ni Sia nimangun sé jamaat-Na toro rumendai karia in totoz wangun witu u sinaru-Na, in anu-Na sé linenas ni Opo Empung wo zéi'kan siapa sinala' zozo' in esa.

Filipi 1:10

Karia in téntu ni kamu én toro méléng wisa am wangun, wo ung katou-touan niou ém weresi wo zéi'kan siapa sinala' im witu un endo si Kristus i mawurimé sumaup.

Filipi 3:6

Tumoro um wuaya im pahwangunengku, ni aku ém mahzézéha sé tou ma'éman si Yesus Kristus, wo tumoro ung kaulitan pahwangunengku, ni aku én uli-ulit mahkiit un ukum Torat, niitumo zéi'kan siapa tou si toro mapahsasala' ni aku.

1 Tesalonika 5:23

Mengalé-ngaléi uman si Opo Empung méhémé ung kaluasan witu un até wo mangun péléng un tou niou malenas. Mengalé-ngaléi uman kasii si Opo Empung é mahtéiz si roh, ung genang wo un awak niou, wo kamu lekep wo zéi'kan siapa u sinala' i si Yesus Kristus, Mahpiarata méyé sumaup.

1 Timutius 3:10

Ni séra kasii é léwo'zéi' im wa'wa'empé'la, sa ikatuzu'mé ung katou-touan néra ém wangun, taré séra totozela i maéndo diaken.

1 Timutius 3:2

Niitumo, si tonaas né jamaat é léwo'zéi' in téntii: zéi'kan penuwu-nuwu'en né tou, makamahayo uman si esa, mata'u mahime-imek un touna, tulap, mahsigi' sé tou, paaz mahsungkul sé tou méyéma witi waléna, tulap i mahtuzu' sé tou,

1 Timutius 5:14

Niitumo sé wéwéné mahesa-esamokan sé zéi'kampé' tahlous tu'a, kapaazku ni séra éng kumawéngla sumaup. Sa séra kumawéngla sumaup, ni séra én toro makaileké koki' wo mahtu'tul sé sana awuna. Karia in téntu, sé kakoro'ta én zéi'kan mata'u mahtawuruk u ngaranta.

1 Timutius 5:20

Si tou mahwangun a singkéla' é léwo'zéi' nuwu'ala witu u saru-sarun né jamaat, wo sé tou walina kangkasii é maindé' i mangun a singkéla'.

1 Timutius 5:7

Totoz ipapagenangla ang kenu wia sé wéwéné mahesa-esamokan itii, wo séra menou-nou zéi'kan penuwu-nuwu'en né tou.

Titus 1:6

Si tou maéndo penatua é léwo'zéi' in zéi'kan siapa pahséro'an, si mahayona én esa uman, sé oki'na é ma'éman wia si Yesus wo zéi'kan pahtawuruken né tou pahpaan zéi'kan ipahkua-kua i sangaya kaapa menou-nou zéi'kan kaimekan.

Titus 2:10

tia' mahremu', taan tia' mazéi' mapailek in uli-ulit mahpaayang wo toro pa'émanen. Karia in téntu, ni séra im wana am péléng é mahsigi' wo mahlooz an tutuzu' ni Opo Empung, si Milot ni kita im witu un ukuman wana a singkéla'.

Titus 2:15

Titus, ipakawoka'la niana péléng, pahsésaala wo pahséro'ela séra karia ung kawasa in aatu ni Opo Empung. Tia' ipahwaya séi uman si meroros ni ko.

Ibrani 7:26

Niitumo, si Walian Wangko' téntu si pemandungenta. Pahpaan ni Sia é linenas ni Opo Empung, zéi'kan nimahsala-sala'la, zéi'kan siapa pahséro'an, méikatampas im wia sé tou simingkéla' wo ni Sia é nimakaileko un tampa totoz rakék wo pahsigi'en witi kasendukan.

1 Petrus 2:12

Wangu-wangunen ung katou-touan niou im witu u saru-sarun né tou zéi'kan mata'u si Opo Empung, wo zozo' ni kamu ém pahkuan né tou itii in tou léwo', taan witu un endo si Opo Empung i méyé, ni séra é malumooz wo sumigi' ni Sia, pahpaan ni séra é mahilek am pahwangunen niou an totoz wangun.

1 Petrus 2:9

Taan ni kamumo sé pinéléng ni Opo Empung, walian i mahpaayang wia si Opo Empung si Kolano, tahsasana wanua linenas, nimaéndo tou méisanapa' wia ni Sia, wo ni kamu mahwoka' am pahwangunen ni Opo Empung an totoz wangko'. Si Opo Empung si timawahmomé ni kamu mondolé im witu ung karimbengbengan a muntep witu un ayah-Na un totoz makakompo'en.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

Wahyu 2:5

Niitumo gena-genangen, ni kamu én totozo zou' im witu u raraaté niou im puuna. Kumana'mola i memangu-mangun an téntu wo mahwangunola tanu am pahwangunen niou im puuna. Sa kamu zéi'kan tumula'u a singkéla' niou, ni Aku é méyé wia ni kamu i mémukum ni kamu, un tanumokan ni Aku i méméndo am penono'tolan niou a solo.

Wahyu 3:9

Genang-genangen! Sé woopira im wia sé jamaat ni tonaas né sétang, sé tantowo, sé mahkua-kua in tou Yahudi taan un ulitna én zéi'kan, iayo-Ku wia ni kamu. Ni séra én uli-ulit wanguneng-Ku i mékumuruz witu u sinaru niou, wo ni séra mata'u i ni Aku é rumaraaté ni kamu.