Filipi 1:7 - Taaz Weru Witu u Nunuwu'en Tombulu

⁷ Ni aku é mapaayo u makasé wia si Opo Empung pahpaan ni kamu ém witu un atéku. Ni aku é nimakailek ung kamang méitambér ni Opo Empung zozo' in tarékan ni aku ém binuipé'. Ni aku kangkasii é nimakailek ung kamang méitambér ni Opo Empung i mahtuzu' sa u Nuwu' Lé'os tumoro si Yesus én ulit, wia sé tou sé mahkua niitu in zéi'kan ulit, wo kasii i mangun ni séra in uli-ulit ma'éman. Ni kamu kangkasii é nimakailek ung kamang méitambér ni Opo Empung tanu ung kinailekangkumé.

Filipi 1:7 Iomraidhean Croise

Kisah Rasul-rasul 20:23

U méipapata'u ni Roh Lenas wia ni aku én akaz uman, i ni aku é maiuntep witi bui wo mazézéha im wana am wanua tua'na angéangku.

Kisah Rasul-rasul 21:33

I méikaayomola witu, si tonaas né suraro itii é rimétéma wia si Paulus, a sia tionannala. An iatunama sé surarona i mamapus ni sia karia u ranté zua, a meligau sa séi sia wo apa um nimualinamola.

1 Korintus 13:7

Ni sia én ezen i mahsaru péléng am péléng, ma'éman péléng am péléng, mahéré' wana péléng am péléng, ezen mengali péléng am péléng.

1 Korintus 9:23

Niana péléng ém winangunku wo kalakezna sé tou toro tumalinga u Nuwu' Lé'os tumoro si Kristus, wo ni aku kangkasii én toro makailek kamang witu u Nuwu' Lé'os itii.

2 Korintus 3:2

Ni kamumo sé tanu um pinantikan u mahlooz ni kai, pahpaan am pinaayang nai én toro kata'uan wo pahileken né tou wana am wangun am pahwangunen niou itii. Wo niitu é mémoikapantik witu un até nai makaz péléng sé tou én toro maca wo mata'u niitu.

2 Korintus 7:3

Ni aku éng kumuama in téntu, zéi'kan i mukum ni kamu, taan tanu u mémoikuaku, ni kamu ém pahwéhan nai genang. Ni kai én zéi'mo toro patampasen karia niou, ni kita é nimaesamo i menou-noupé' kaapa i matéma.

Galatia 5:6

Pahpaan sinunat kaapa zéi'kan sinunat é masuat uman im wia sé tou sé nimaesamo karia ni Kristus Yesus. Un totoz ipahpuu-puuna é ma'éman si Kristus Yesus un toro pa'ileken karia i rumaraaté sé tou walina.

Efesus 3:1

Pahpaano niitu, ni aku Paulus ém binui pahpaan mahwoka' u Nuwu' Lé'os tumoro si Kristus Yesus wo ung kawangunan niou in tou zéi'kan Yahudi.

Efesus 4:1

Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

Efesus 6:20

Pahpaan ni aku nimaéndo aatu ni Opo Empung i mahwoka' u Nuwu' Lé'os tumoro si Yesus, niitumo in tarékan ni aku é méiuntep bui. Ipengaléipé'mé wo ni aku zéi'kan maindé' i mahwoka' u Nuwu' Lé'os, un uli-ulit masuat karia u léwo'zéi' in iwoka'ku.

Filipi 1:12

Katuari-katuari, kapaazku ing kata'uan nioula u nimamuali wia ni aku é nimangun sé tou lakez timalingama u Nuwu' Lé'os tumoro si Yesus wo nimangun ni séra ma'éman niitu.

Filipi 1:13

Niitumo, péléng sé suraro mahtéiz witi istana ni Kaisar wo sé tou walina é nimata'umoma, i ni aku ém binui pahpaan mahkiit si Yesus Kristus.

Filipi 1:14

Wo pahpaan ni aku im binui, nimangun lakez sé katuari esa pa'émanen éng kaenté'namo um pa'émanen néra wo kawuayana wo zéi'mo maindé' i mahwoka' u Nuwu' ni Opo Empung.

Filipi 1:5

Ni aku éng kumua u makasé wia si Opo Empung pahpaan ni kamu simawango ni aku i mahwoka' u Nuwu' Lé'os tumoro si Yesus, rengané in endo ni kamu in taré ma'émanla si Mahpiara makaz in tarékan.

Filipi 2:22

Taan ni kamu nimileko un ulitna si Timotius. Pahpaan ni sia é nimapaileko i ni sia én toro pa'émanen wo uli-ulit mahpaayang i mahsawang ni aku i mahwoka' u Nuwu' Lé'os tumoro si Yesus, tanumokan si koki' mahsawang si ama'na.

Filipi 4:14

Zozo' in téntu, um pahwangunen niou én totoz lé'os, ni kamu mahsawango ni aku im wana ang kasusaangku.

Filipi 4:15

É kamu tou Filipi, kata'uan niouo, i ni aku timula'umé u Makedonia wo taré mahwoka' u Nuwu' Lé'os tumoro si Yesus, ni kamu uman sé jamaat nimahtulungé ni aku wana péléng am pemandungengku, karia i mahwéhémé zoit wia ni aku. Zéi'kan siapa jamaat walina sé nimahwanguné an téntu wia ni aku.

Filipi 4:3

Pahaléiengku kasii wia si Sunsugos, si kakariaku totoz mahtali-talinga: Pahsawangampé'la si Euodia wo si Sintikhe, wo sé wéwéné zua itii malé'osala. Pahpaan ni séra é simawango ni aku karia ni Klemens wo sé kapaayangku walina i mahwoka' u Nuwu' Lé'os. Pahpaan ni séra péléng é ma'émano wia si Yesus wo nimakaileko ung katou-touan makaz ing kauré-uré, niitumo a ngaran néra é méikapantiko witu ung kitap katou-touan.

Kolose 4:18

Ni aku Paulus kasii é mapaayoma u sigi wia ni kamu. U sigi' kenu ém pinantikku in esa. Gena-genangen, ni aku é rinantépé' im wia um bui! Mengalé-ngaléi uman ung kamang tatambér ni Opo Empung menaté-natér ni kamu.

Kolose 4:3

Ipahpengaléipé' kasiimé kai, wo si Opo Empung mukamé lalan wia ni kai i mangé mahwoka', wo kai toro makumua u méikawunipé' tumoro si Kristus. Pahpaano i mahwoka' niitu, ni aku in tarékan ém wiapé' um bui.

1 Tesalonika 5:5

pahpaan ni kamu péléng é menou-nou witu un ayah wo menou-nou in endo. Ni kita én zéi'kan menou-nou im wengi kaapa menou-nou witu ung karimbengbengan.

2 Timutius 1:8

Niitumo, tia'mo maizang i mahkua an tinalinga wo niilekmu tumoro si Mahpiarata. Téntu kangkasii, tia'mo maizang tumoro ni aku im binui pahpaan ni Sia. Taantaré, karia ung ketez méiwéhémé ni Opo Empung, ni ko kangkasii é mazézéhala pahpaan mahkua u Nuwu' Lé'os tumoro ni Sia.

2 Timutius 2:9

Pahpaan i mahwoka' u Nuwu' Lé'os kenumo, ni aku nimazézéha an apusen tanu sé tou léwo'. Taan u Nuwu' ni Opo Empung itii én zéi'kan mata'u apusen.

Filemon 1:13

Un ulitna kapaazku ni sia é mahwia-wia sumawel ni ko, i sumawang ni aku im wiapé' um bui pahpaan mahwoka' u Nuwu' Lé'os tumoro si Yesus wia sé tou.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

1 Petrus 4:13

Taan, ni kamu é mahpaa-paazola, pahpaan an zézéha itii én tanu an zézéha pinahpendané ni Kristus. Karia in téntu, i si Kristus méyé sumaup wo mapailek ung kawangko'an-Na, ni kamu én toro mahpaa-paaz makaz i mahkonta-konta'.

1 Petrus 5:1

Ni aku ém penatua tanu ni kamu wo ni aku éng kumuama a niilekku wo an tinalingaku tumoro an zézéha pinahpendané ni Kristus im puuna. Ni aku kangkasii é lamakailek wéténg im witu ung kawangko'an-Na i si Kristus mémapailek ung kawangko'an-Na. Niitumo ni aku é sumésama wia ni kamu:

2 Petrus 1:13

Karegas ni aku i menou-noupé', ni aku é léwo'zéi' mapagenanga niana péléng wia ni kamu.

1 Yohanes 3:14

Kata'uanta, i ni kita é niméramomé im witu um patéan a mangé witu ung katou-touan, pahpaan ni kita é rumaraaté sé katuarita esa pa'émanen. Séi si zéi'kan rumaraaté, ni sia éng kinawasapé' um patéan.