Filipi 1:27 - Taaz Weru Witu u Nunuwu'en Tombulu

²⁷ Un totoz ipahpuu-puuna in tarékan, pahpaan ni kamu é ma'émano wia si Kristus, ung katou-touan niou é léwo'zéi' i masuat karia an tutuzu' ni Kristus mengiit u Nuwu' Lé'os tumoro ni Sia. Karia in téntu sa aku mangémé, ni aku én toro mileké, kaapa sa aku zéi'kan mangémé wia ni kamu, ni aku én tumalinga i ni kamu én esa genang, nimaesaan i mahtututu' mahwoka' u Nuwu' Lé'os tumoro si Kristus, enté' um pa'émanen, wo ni kamu mahwali-wali i mahtututu' mahwoka' u Nuwu' Lé'os tumoro si Yesus Kristus wia sé tou wo séra toro ma'éman.

Filipi 1:27 Iomraidhean Croise

Matius 12:25

Taan kata'uan ni Yesus am pegena-genangen néra, ang kuan-Na wia ni séra, “Sa sé tou witi kakolanoan esa é makahkoro', ni séra é makayo'. Téntu kangkasii, sa sé tou witi wanua tua'na kaapa sé sana walé é makahkoro', ni séra é makayo'.

Kisah Rasul-rasul 2:46

Wo sekez in endo ni séra én zéi'kan kumana' i meréwo-réwok witi Walé ni Opo Empung wo ni séra én esa genang. Um walé ni esa wo ni esa é mahsasawel im pahangéan néra i mahkan mahwali-wali karia i mahpaa-paaz wo ung genang lé'os.

Kisah Rasul-rasul 24:24

Im woopirana endomo, a méyé si gubernur Feliks karia ni Drusila mahayona. Si mahayona itii én tou Yahudi. Si Feliks matuma tou i matumawahmé si Paulus, a séra tumalinga an tutuzu'na tumoro um pa'émanen wia si Yesus Kristus.

Kisah Rasul-rasul 4:32

Péléng sé tou ma'éman én esa genang wo nimaesaan, wo zéi'kan siapa zozo' in esa si mahkua im péléng an anuna én anuna in esa, taan péléng an anuna én anu néra péléng.

Roma 1:16

Ni aku én zéi'kan maizang i mahwoka' u Nuwu' Lé'os tumoro si Yesus, pahpaan u Nuwu' Lé'os itii éng kawasa ni Opo Empung i milot péléng sé tou sé ma'éman im witu un ukuman wana a singkéla', kataré-taré é sé tou Yahudi wo kasii sé tou zéi'kan Yahudi.

Roma 1:5

Mengiité ni Sia, ni aku nimakailek ung kamang tatambér i maéndo aatu ni Opo Empung wo ni aku toro mahkit sé tahsasana wanua wo séra ma'éman wo mahtali-talinga si Yesus Kristus.

Roma 1:9

Si Opo Empung si pahpaayangangku karia ung genang lé'os i mahwoka' u Nuwu' Lé'os tumoro si Oki'-Na, kata'uan-Na wana am pengaléiengku i ni kamu sé witi Roma sekezé ém pegena-genangengku.

Roma 10:8

Taan ung kalakoana tanu u méipantik witu um Pinantik Lenas in téntii: “U Nuwu' ni Opo Empung itii én zéi'kan zou'ma im wia ni kamu, witu u sumahmu wo witu un atému.” Niitu u Nuwu' ni Opo Empung um pahwoka' nai; um pa'émanen né tou.

Roma 15:16

Ni Siamo si nimatumé ni aku i maéndo memamaayang ni Kristus Yesus i mangé wia sé tou zéi'kan Yahudi i mahwoka' u Nuwu' Lé'os ni Opo Empung. Um paayangengku én tanu sé walian i mengangali a raragés makaz sé tou zéi'kan Yahudi én toro sungkulen ni Opo Empung tanu a raragés a linenas ni Roh Lenas wia si Opo Empung.

Roma 15:29

Wo kata'uangku sa ni aku méyé wia ni kamu, ni aku é mahalima malake-lakez ung kamang ni Kristus wia ni kamu.

1 Korintus 1:10

Katuari-katuari! Pahpaan ni aku nimaesa karia ni Yesus Kristus si Mahpiarata, ni aku sumésama wia ni kamu, wo ni kamu én esa nuwu', tia'mo mahéndo-éndoan taan maesaanola wo esa genang.

1 Korintus 15:58

Niitumo, katuari-katuari ikararaatéku, rumendaila menté-enté', tia' mahzua-zua genang i ma'éman. Mahtututu'la i mahpaayang am paayangen méiwéhé ni Mahpiara wia ni kamu, pahpaan kata'uan niouo im witu u sinaru ni Mahpiara, zéi'kan siapa am pinaayang niou an zéi'kan siapa torona.

2 Korintus 13:11

Ung kamurian, katuari-katuari, ni kamu mahpaa-paazla, mahtututu'la wo péléng am pemangu-mangunen niou malekep. Pahwéhanla genang péléng a méisésaku wia ni kamu. Ni kamu én esa genang wo péléng mahlé'o-lé'osan. Si Opo Empung si mahtambéré ung kamang wo ung kaluasan witu un até é menaté-natér ni kamu.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

2 Korintus 9:13

I sé katuarita nimakailekla an zoit sasawang itii, ni séra é mahlooz wo mahsigi' si Opo Empung, un tumuzu'mé i ni kamu én uli-ulit kimiit wo ma'éman u Nuwu' Lé'os tumoro si Kristus. Ni séra é mahlooz wo mahsigi' si Opo Empung pahpaan i niilek nérala ni kamu é meripu' umané i mahwéhé a sasawang wia ni séra wo wia péléng sé tou.

Galatia 1:7

Un ulitna, u nuwu' lé'os walina tumoro si Yesus itii én zéi'kan ulit Nuwu' Lé'os tumoro si Yesus. Wéwéhan uman sé tou mahlilinganga ni kamu wo sé mahsasawel u Nuwu' Lé'os tumoro si Yesus Kristus karia u nuwu' lé'os tumoro si Yesus un zéi'kan ulit.

Efesus 1:13

Téntu kangkasii ni kamu é nimaéndomo tou ni Opo Empung i ni kamu timalingamola u nuwu' kaulitan um wia si Opo Empung a méyé, niitumo u Nuwu' Lé'os u nimilot ni kamu im witu un ukuman wana a singkéla'. I ni kamu nima'émanola u Nuwu' Lé'os itii, si Opo Empung é niméhémé si Roh Lenas wia ni kamu un tumuzu'mé i ni kamu én tou-Na, mengiit u mémoitaaz-Na.

Efesus 1:15

Niitumo, in tinalingakumola ni kamu ma'éman wia si Yesus Mahpiara wo u raraatéan niou wia péléng sé tou linenas ni Opo Empung,

Efesus 4:1

Niitumo, ni aku, si binui pahpaan mahwangun a méiatu ni Mahpiara, mahaléi wia ni kamu, wo ni kamu in tou tinawahmo i ma'éman wia si Opo Empung é menou-noula mengiit ung kapaaz ni Opo Empung tanu in taré ma'émanla wia ni Sia.

Filipi 1:5

Ni aku éng kumua u makasé wia si Opo Empung pahpaan ni kamu simawango ni aku i mahwoka' u Nuwu' Lé'os tumoro si Yesus, rengané in endo ni kamu in taré ma'émanla si Mahpiara makaz in tarékan.

Filipi 2:12

Katuari-katuari ikararaatéku, ni kamu sekezé é mahtali-talinga wia si Opo Empung. Pahwangunela niitu zéi'kan uman i ni aku mahwali-wali karia niou taan kasii i ni aku zéi'kan mahwali-wali karia niou. Ung katou-touan niou ém wangunela tanu ung katou-touan né tou sé méipiloto ni Opo Empung im witu un ukuman wana a singkéla'. Pahwangunela niitu karia i mahtali-talinga wo mahsigi' si Opo Empung.

Filipi 2:24

Taan totoz pa'émanengku i si Mahpiara é sumawang ni aku wo ni aku zéi'mo uré é mangémo wia ni kamu.

Filipi 3:18

Pahpaan, tanu u méipengua-nguakumo wia ni kamu wo ikuaku kasiima in tarékan karia i mahamé', i lakez sé tou sé mengua-ngua i ni séra é mahkii-kiit si Yesus Kristus, taan ung katou-touan néra un zéi'kan ulit é nimatamburian karia um winanguna ni Kristus i ni Sia sinalip.

Filipi 3:20

Ni kita é méikarékéno in tou ni Opo Empung si witi kasendukan. Karia in téntu, in tarékan ni kita é ma'ento' si Yesus Kristus i mawurimé sumaup im witi kasendukan, ni Sia si nimiloto ni kita im witu un ukuman wana a singkéla'.

Filipi 4:1

Pahpaano niitu, katuari-katuari sé ikararaatéku wo pelelo-leloku, sé mahwangun ni aku i mahpaa-paaz wo sé pahloo-loozengku pahpaan ma'émano wia si Kristus, menté-enté' i ma'éman wia si Mahpiara.

Kolose 1:10

Karia in téntu, ung katou-touan niou ém wangun im witu u sinaru ni Mahpiara wo ni kamu éng kapaaz-Na im wana am péléng wo mua'mé am wangun im wana péléng am pahpaayangen niou, wo kalousna i mata'u tumoro ang kapaaz ni Opo Empung.

Kolose 1:4

pahpaan tinalinga naimo tumoro um pa'émanen niou wia si Kristus Yesus, wo kura u raraatéan niou wia péléng sé tou linenas ni Opo Empung.

1 Tesalonika 3:6

In tarékan si Timotius é nimawurimomé im witi Tesalonika, ni sia é simirita u sirita makapaazen tumoro ni kamu u nimangun ni kai i mahpaa-paaz. Méikuana tumoro um pa'émanen niou wo u mahraa-raatéan niou. Méikuana kasii, sekez ni kamu ikagenangla ni kai, ni kamu é mahpaa-paaz wo paaz i mahilekan sumaup karia nai, tanu ni kai kangkasii ém paaz i mahilekan karia niou.

1 Tesalonika 4:1

Ing kamurian katuari-katuari, ni kai é niméhémola ung kékéréan wangun wia ni kamu tumoro kura ung katou-touan niou u mahwangun un até ni Opo Empung mahpaa-paaz. Ni kamu é nimenou-noumola tanu niitu. In tarékan karia ung kawasa ni Yesus Mahpiara, ni kai totoz mahaléi wo menutu' wia ni kamu, wo kamu kalousna mahtututu' i mahwangun si Opo Empung mahpaa-paaz.

1 Timutius 1:11

mengiit u Nuwu' Lé'os ni Opo Empung si wangko' wo pahloozen, tanu u méitarawésamo wia ni aku im paayangengku.

1 Timutius 1:19

Wéwéhan sé woopira tou é soomo mahkiit ung genang weresi néra. Pahpaano niitu ni séra én zéi'mo ma'éman.

2 Timutius 4:7

Ni aku én uli-ulit simapetola um pahlolowaan karia im wangun wo méikaayomola witu un akazna. Ni aku kasii én zéi'kan mazéi' i ma'éman wia si Kristus Yesus makaz ing kamurian.

Titus 2:10

tia' mahremu', taan tia' mazéi' mapailek in uli-ulit mahpaayang wo toro pa'émanen. Karia in téntu, ni séra im wana am péléng é mahsigi' wo mahlooz an tutuzu' ni Opo Empung, si Milot ni kita im witu un ukuman wana a singkéla'.

Filemon 1:5

Tinalinga- kumo tumoro u raraatéannu wia sé tou ni Opo Empung wo um pa'émanennu wia si Yesus Mahpiara un totoz enté'.

Yakobus 3:18

Ung kaulitan ém wua'na u mahlé'o-lé'osan u méikeroz né tou paaz u mahlé'o-lé'osan.

2 Petrus 3:11

Sa péléng niana é maapu tanu niitu, kura ung katou-touan niou? Tantumo, ni kamu i menou-nou é léwo'zéi' i lenas wo mahkiit uman ung kapaaz ni Opo Empung.

2 Petrus 3:14

Niitumo katuari-katuari ikararaatéku, karegas ni kamu i ma'ento' niana péléng i mamuali, ni kamu é léwo'zéi' mahtututu' i menou-nou totoz weresi wo zéi'kan siapa pahséro'an witu u sinaru ni Opo Empung, wo mahlé'o-lé'osan karia-Na.

Yudas 1:3

Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.