Filipi 1:20 - Taaz Weru Witu u Nunuwu'en Tombulu

²⁰ Un totoz pelelo-lelongku wo um pahéré'engkula i ni aku én zéi'kan ipapaiza-izang im wana péléng am pahwangunengku i menou-nou. Ni aku én totoz ma'éman wo wuaya i mahnuwu' tanu im puuna, téntu kangkasii in tarékan, im wana péléng am pahwangunengku, zozo' ni aku i menou-noupé' kaapa i nimatémo, si Yesus Kristus ém pahloozen wo pahsigi'en.

Filipi 1:20 Iomraidhean Croise

Yohanes 21:19

Niia é méikua-Na i mapata'u kura si Petrus i maté wo karia in téntu si Opo Empung pahloozen wo pahsigi'en. Makakuala niitu a Sia kumuala wia si Petrus, “Kumiitomé ni Aku.”

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 21:13

Taan si Paulus nimingkot umané, “Kaa kamu mahamé', taka-takazan nimangun un atéku i rumara? Ni aku én zéi'kan uman paaz in apusen taan ni aku kangkasii ém paaz i maté witi Yerusalem pahpaan i mahwoka' u ngaran ni Yesus Mahpiara.”

Kisah Rasul-rasul 4:31

Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

Roma 12:1

Niitumo, katuari-katuari, pahpaan ung karipu'an ni Opo Empung wia ni kita, ni aku sumésama wia ni kamu, iragésla un tou niou wia si Opo Empung tanu u raragés menou-nou linenas wo ung kapaaz-Na. Niitumo un uli-ulit raragésmu wia si Opo Empung.

Roma 5:5

Wo um pahéré'an én zéi'kan merara un até, pahpaan si Opo Empung timambéré si Roh Lenas wo kita toro mé'an u raraatéan ni Opo Empung.

Roma 6:13

Tia' un awak niou iwéhé ing kawasaan a singkéla' i mangun a léwo'an. Taan iwéhéla un tou niou wia si Opo Empung, tanu si tou im puuna nimatémo wo in tarékan é nimakaileko ung katou-touan weru, wo iwéhémola un awak niou i mahwangun um paaz ni Opo Empung.

Roma 6:19

Ni aku i mahkuama éng karia u nunuwu'en toro katulapan ung kinanaram im pengungua né tou sekez in endo. Pahpaan ni kamu in tou én zéi'kan enté', niitumo ni kamu ngerez i mahtutulap niitu. Im puuna ni kamu é niméhé péléng un tou niou i maéndo ata im wana ang kasamekan wo a mahsaru si Opo Empung a nimangun ni kamu kalousna i mahsaru ni Sia. In tarékan, ni kamu é léwo'zéi' méhéla péléng un tou niou i maéndo ata im wana ang kaulitan a mangun ni kamu lenasen ni Opo Empung.

Roma 8:19

Pahpaan péléng sé wia ung kaayahan én totoz melelo i ma'ento' un oras i si Opo Empung mapata'u sé maéndo oki'-Na.

Roma 9:33

tanu u méipantik witu um Pinantik Lenas: “Talingana ang kenu. Im witi kentur Sion, ni Aku én zimeta'momé um watu pahkasangkilan né tou, um watu tua'na um pahkazemakan néra, taan sé ma'éman wia ni Sia én zéi'kan papaiza-izang.”

1 Korintus 15:31

Katuari-katuari, ikuakuma wia ni kamu, sekez in endo ni aku é nimasaruan karia um patéan. Niia én ikuakuma in uli-ulit tanumokan ni aku in uli-ulit mahpaa-paaz pahpaan ni kamu ma'émano si Kristus Yesus, Mahpiarata.

1 Korintus 6:20

Ni kamu én tineleso wo pinakawaéro ni Opo Empung. Niitumo, un awak ni esa wo ni esa én ipahsigi' wo ipahlooz uman si Opo Empung.

1 Korintus 7:34

Pahpaano niitu am pegena-genangenna é nimawéténg. Si wéwéné zéi'kan siapa mahayo wo si raraha, ni séra én totoz uman megena-genang i mahpaayang wia si Mahpiara, makaz un awak wo si roh néra é méiwéhé uman wia si Mahpiara. Taan si wéwéné wéwéhan mahayo, um pegena-genangenna ém pemandungen wia ung kaayahan, pahpaan u lelona é mangun si mahayona i mahpaa-paaz.

2 Korintus 10:8

Ni aku én zéi'kan maizang zozo' ni aku tahlous mahlooz un touku, i mahkua ung kawasa méiwéhé ni Opo Empung wia ni kai. Pahpaan ni Sia i niméhé ung kawasa itii wia ni kai, zéi'kan i luméwo' um pa'émanen niou, taan i mahenté' um pa'émanen niou.

2 Korintus 3:12

Pahpaan ni kai niméré' witu um pinataazan weru um wia si Opo Empung, niitumo ni kai én zéi'kan maindé' i mahwoka' u Nuwu' Lé'os tumoro si Yesus wia sé tou.

2 Korintus 4:10

Ni kai sekezé é mahpendan witu un tou nai ung kinawalian si Yesus i nimaté. Karia in téntu, sé tou walina én toro milek ung katou-touan ni Yesus witu ung katou-touan nai.

2 Korintus 5:15

Si Kristus nimatémo pahpaan péléng sé tou, wo ni séra sé menou-noupé' wia ung kaayahan kenu, ung katou-touan néra én zéi'mo anu néra taan anumo ni Kristus, si nimatémo wo méitoumomé sumaup ni Opo Empung pahpaan ung kawangunan néra.

2 Korintus 7:14

I si Titus zéi'kampé' nimangé wia ni kamu, ni kamu é méipahloo-loozku wia ni sia, wo ni kamu én zéi'kan mapaiza-izang ni aku. Péléng a méikua nai wia ni kamu én ulit. Téntu kangkasii péléng a méipahloo-looz nai tumoro ni kamu wia si Titus én ulit.

2 Korintus 7:4

Ni aku én totoz ma'éman wia ni kamu, lumouspé'tarémé niitu ni kamu én ipahloo-loozku. Im wana péléng an zézéha nai, ni kamu é mahenté' un atéku wo totoz mahwéhé a makapaazen.

Filipi 1:14

Wo pahpaan ni aku im binui, nimangun lakez sé katuari esa pa'émanen éng kaenté'namo um pa'émanen néra wo kawuayana wo zéi'mo maindé' i mahwoka' u Nuwu' ni Opo Empung.

Filipi 2:17

Zozo' ni aku ém woo ukumen i maté wo un zaha'ku én isaroi witu um wawo né tatamun kineriz niou in iragés wia si Opo Empung, taan ni aku én zéi'kan mazéi' i mahpaa-paaz tumoro niitu wo ni aku kasii é mahpaa-paaz karia niou péléng.

Kolose 1:24

In tarékan, ni aku é mahpaa-paaz i nimazéha pahpaan nimapata'u u Nuwu' Lé'os tumoro si Yesus wia ni kamu wo pahpaan mahpaayang wia si Kristus i lumekep un zéha-Na wia sé jamaat sé tanumokan un awak-Na.

1 Tesalonika 5:23

Mengalé-ngaléi uman si Opo Empung méhémé ung kaluasan witu un até wo mangun péléng un tou niou malenas. Mengalé-ngaléi uman kasii si Opo Empung é mahtéiz si roh, ung genang wo un awak niou, wo kamu lekep wo zéi'kan siapa u sinala' i si Yesus Kristus, Mahpiarata méyé sumaup.

1 Petrus 4:16

Taan sa ni kamu nimazézéha pahpaan ni kamu én tou Sarani, ni kamu én tia'mo maizang. Tawimo ni kamu i lumoozla wo sumigi'la si Opo Empung pahpaan ni kamu é mahkiito si Kristus.

1 Yohanes 2:28

Niitumo in tarékan, é kamu sé oki'ku, ni kamu é léwo'zéi' i menou-nou nimaesa karia ni Kristus, wo sa Sia méyémo sumaup im witu un endo itii, ni kita én zéi'kan maindé' wo zéi'kan maizang wia ni Sia.